بۇگىن وبلىس اكىمى اماندىق باتالوۆ الماتى وبلىسىندا 2018 جىلدىڭ قورىتىندىسى بويىنشا ۇزدىك سپورتشىلار مەن جاتتىقتىرۋشىلاردى، سپورت بولىمدەرى مەن مەكەمەلەردى، وسى سالانى ناسيحاتتاعان جۋرناليستەردى ماراپاتتادى. سالتاناتتى شاراعا قازاقتىڭ ماڭدايىنا بىتكەن سپورتشىلار جاقسىلىق ۇشكەمپىروۆ، ەرماحان يبرايىموۆ، قانات يسلام، ارداق نازاروۆ، ماۋلەن مامىروۆ قۇرمەتتى قوناق رەتىندە قاتىستى.

الماتى وبلىسى اكىمدىگىنىڭ رەسمي سايتىندا جازىلۋىنشا، جينالعانداردى العىس ايتۋ كۇنىمەن قۇتتىقتاعان اماندىق باتالوۆ وبلىستاعى سپورت سالاسىنىڭ دامۋى مەن سپورتشىلاردى قولداۋ بارىسىنا قىسقاشا توقتالىپ ءوتتى.

- ەلباسى نۇرسۇلتان ءابىشۇلى نازارباەۆ «سالاماتتى ءومىر سالتى ۇلت دەنساۋلىعىنىڭ كىلتى. دەنە شىنىقتىرۋ مەن سپورت مەملەكەتتىڭ ايرىقشا نازارىندا بولۋى ءتيىس»، – دەگەن بولاتىن. بۇل ورايدا سالانى دامىتۋعا جۇيەلى جۇمىس جاسالۋدا. ماتەريالدىق-تەحنيكالىق بازاسى نىعايتىلىپ، جاڭا نىساندار سالىنۋدا. بۇگىنگى كۇنى وبلىستا 30 مىڭ سپورت نىسانى بار. ەلباسى ەلىمىز بويىنشا 100 دەنە شىنىقتىرۋ-ساۋىقتىرۋ كەشەنىن سالۋدى جۇكتەگەن بولاتىن. وسى رەتتە ءبىزدىڭ وبلىستا 8 دسك سالىنىپ جاتىر، سونىڭ 4-ەۋى بيىلعى جىلى ىسكە قوسىلادى. بۇل ىستە بىزگە مەملەكەتتىك-جەكەمەنشىك ارىپتەستىك تەتىگى زور مۇمكىندىك بەرىپ وتىر. مىسالى، جاقىن كۇندەرى وسى تەتىك نەگىزىندە تالدىقورعاندا وليمپيادالىق ءجۇزۋ باسسەينىنىڭ قۇرىلىسى باستالادى. ءبىز جەرگىلىكتى بيۋدجەتتەن سپورتشىلارعا قولداۋ كورسەتۋدى تۇراقتى اتقارىپ كەلەمىز. ول ءوز ناتيجەسىن كورسەتىپ وتىر. ماسەلەن، وتكەن جىلى ءبىزدىڭ سپورتشىلار ءتۇرلى دەڭگەيدەگى 2 مىڭداي مەدالعا يە بولدى. وسى مەرەكە كۇنى بارشاڭىزدى جەتكەن جەتىستىكتەرىڭىزبەن قۇتتىقتاي وتىرىپ، ەلىمىزدىڭ سپورتتىق ءيميدجىن كوتەرۋ جولىنداعى ەڭبەكتەرىڭىزگە العىس ايتامىن، - دەدى ا. باتالوۆ.

2018 جىلعى وبلىستىق سپورت مەكەمەلەرىنىڭ، اۋداندىق، قالالىق بولىمدەردىڭ جۇمىسىن رەيتينگتىك جۇيەدە باعالاۋدىڭ قورىتىندىسىنا سايكەس جەڭىمپاز دەپ تانىلعان وبلىستاعى سپورتتىق ۇيىمداردىڭ ارقايسىسى 500 مىڭ تەڭگەنىڭ اقشالاي سەرتيفيكاتىنا يە بولدى. ولاردىڭ اراسىندا تالدىقورعان قالاسىنىڭ دەنە شىنىقتىرۋ جانە سپورت ءبولىمى، تالدىقورعانداعى № 1 وليمپيادالىق رەزەرۆتەگى بالالار جانە جاسوسپىرىمدەر سپورت مەكتەبى، الماتى وبلىسى بويىنشا گرەك-ريم، ەركىن جانە ايەلدەر كۇرەسى فەدەراتسياسى بار.

700 مىڭ تەڭگەنىڭ سەرتيفيكاتى سامبودان قازاقستان رەسپۋبليكاسىنىڭ حالىقارالىق دارەجەدەگى سپورت شەبەرى، 2018 جىلعى ءXVىII جازعى ازيا ويىندارىنىڭ جەڭىمپازى ءدىلداش قۇرىشباەۆاعا بەرىلدى.

حالىقارالىق جارىستاردا جوعارى ناتيجەلەرگە قول جەتكىزگەنى ءۇشىن گرەك-ريم كۇرەسىنەن قازاقستان رەسپۋبليكاسىنىڭ ەڭبەك سىڭىرگەن سپورت شەبەرى، 2018 جىلعى ءXVىII جازعى ازيا ويىندارىنىڭ كۇمىس جۇلدەگەرى نۇرماحان تىناليەۆ، مۇگەدەك-سپورتشىلار اراسىندا پاۋەرليفتينگتەن III پارازيا ويىندارىنىڭ كۇمىس جۇلدەگەرلەرى راۋشان قويشىباەۆا مەن راحمەتجان حاماەۆ جانە قولا جۇلدەگەرى گۇلبانۋ ابدىحالىكوۆا 400 مىڭ تەڭگە اقشالاي سەرتيفيكاتتارىنا يە بولدى.

سول سياقتى كاراتە شينكيوكۋشينكايدان ەرلەر اراسىندا الەم چەمپيوناتىنىڭ كۇمىس جۇلدەگەرى مەرەي سۇيىنوۆكە، بوكستان جاستار اراسىندا الەم چەمپيوناتىنىڭ قولا جۇلدەگەرى انەل قۇدايبەرگەنگە، سامبودان ايەلدەر اراسىندا الەم چەمپيوناتىنىڭ قولا جۇلدەگەرى، ازيا چەمپيوناتىنىڭ جەڭىمپازى گۇلنۇر ەربولوۆا، قول كۇرەسىنەن 2018 جىلعى جاستار اراسىندا الەم چەمپيونى الەنا ستانسكاياعا 300 مىڭ تەڭگە اقشالاي سەرتيفيكاتتار بەرىلدى.

سونداي-اق ازيا چەمپيوناتىنىڭ جۇلدەگەرلەرى، سالاماتتى ءومىر سالتىن، سپورت سالاسىن ناسيحاتتاعان جۋرناليستەر 150 مىڭ تەڭگەنىڭ سەرتيفيكاتىن الدى.

باپكەرلەر دە نازاردان تىس قالعان جوق. ولاردىڭ قاتارىندا ۆياچەسلاۆ شاپران، ۆيكتور يۋرايتيس، ازامات كوكەباەۆ، ماحاببات تۋعانبەكوۆا، دەنيس ورلوۆ، باقىت جازىقباەۆ، الەكساندر گەتالو، بورانبەك قوڭىراتوۆ، دميتري كالتەنبەرگەر جانە باسقالار بار. جاتتىقتىرۋشىلارعا 300, 200 جانە 100 مىڭ تەڭگەنىڭ سەرتيفيكاتتارى ۇسىنىلدى.

مىنبەگە قازاقتان شىققان تۇڭعىش وليمپيادا چەمپيونى، كسرو-نىڭ ەكى دۇركىن چەمپيونى، قازاقستاننىڭ ەڭبەك ەرى جاقسىلىق ۇشكەمپىروۆ كوتەرىلىپ، كوپشىلىكتى مەرەكەمەن قۇتتىقتاي وتىرىپ، ەل سپورتىنىڭ بولاشاعى جارقىن بولاتىنىنا سەنىم ءبىلدىردى.

ءوز سوزدەرىندە مۇگەدەك-سپورتشىلار اراسىندا پاۋەرليفتينگتەن III پارازيا ويىندارىنىڭ كۇمىس جۇلدەگەرى راۋشان قويشىباەۆا مەن بوكستان جاستار اراسىندا الەم چەمپيوناتىنىڭ قولا جۇلدەگەرى انەل قۇدايبەرگەن پرەزيدەنتتىڭ سپورتقا دەگەن قامقورلىعىنا، وبلىستا سپورتشىلارعا جاسالىپ وتىرعان جاعدايلارعا ريزاشىلىقتارىن ءبىلدىرىپ، قاشاندا ەل تۋىن بيىكتەتەر بەلەستەردى باعىندىرا بەرەتىندەرىن ايتتى.

شارا سوڭىندا وبلىستاعى ونەر ۇجىمدارىنىڭ كونتسەرتتىك باعدارلاماسى قويىلدى.

اتاپ وتسەك، 2018 جىلى الماتى وبلىسىنىڭ سپورتشىلارى 1779 مەدال يەلەنىپتى، سونىڭ 637-ءسى – التىن، 529-ى – كۇمىس، 613-ءى – قولا مەدال. 49 حالىقارالىق دارەجەدەگى سپورت شەبەرى، 111 سپورت شەبەرى، 818 سپورت شەبەرلىگىنە كانديدات، 504 ءبىرىنشى رازريادتى سپورتشى دايىندالعان.

Abai.kz