بۇرناعى زاماندا ادامدار اڭشىلىققا اشتىقتان، مۇقتاجدىقتان شىعاتىن. قازىرگى كەزدە توقتىقتان، ەرىككەندىكتەن، زەرىككەندىكتەن شىعاتىن بولدى.

بۇرىن اڭشىلىق كەدەي-كەپشىكتىڭ تىرلىگى ەدى. بۇگىندە مەيماناسى تاسىعان، ەنىن ۋقالاۋدىڭ ءوزى قىزىق بولماي قالعان ەرىككەن سارتتاردىڭ ەرمەگى بولدى. بۇرىنعىنىڭ مەرگەندەرى ءبىر ءوزى ءبىر ەلدى اسىراعان. سويتە تۇرا اڭنىڭ كيەلىسىن اتپاعان. بۇگىنگىلەر اڭىڭدى ۇرىپ قويىپتى، ادام اتا باستادى...

ادامنىڭ كوزىنە ەت وسەدى. ونى سىلىپ تاستاۋدىڭ ارنايى، ناقتى باعاسى بار. ادامنىڭ كوزىن شەل باسادى. ونىڭ اشىلۋىنىڭ قۇنى ناقتىلانباعان...
مىلتىقتى قولدانۋداعى باستى ماقسات - وتانىڭدى جاۋدان قورعاۋ ەدى. بۇگىندە وتانداسىڭدى اتاتىن قارۋعا اينالدى. 

سايىندالادا ەكى ادام كەزىكتى. ونىڭ ءبىرى تابيعاتتى قورعاۋ ءۇشىن امالسىزدان بالا-شاعاسىنان جىراق كەتىپ، ءتۇن قاتىپ، ءتۇس قاشىپ جۇرسە، ەكىنشىسى ەرىككەننەن، زەرىككەننەن ەرمەك قۋىپ كەلىپ ەدى. ەكەۋى دە مىلتىق كەزەندى. ءبىرىنشىسى تابيعاتتى قورعاۋ ءۇشىن، ەكىنشىسى ءوزىنىڭ قارا باسىن قورعاۋ ءۇشىن. تاعدىر دەگەنىڭىزدىڭ دە كەيدە ءوستىپ تارىلمايتىن جەردە تارىلاتىنى بار. تابيعاتتى قورعاماق بولعان ىزگى نيەتتىنىڭ مىلتىعى اتىلماي، قارا نيەتتىنىڭ وعى ءدال ءتيدى. 

ءبىرىنشىسىن اللا الدىنان جارىلقاسىن. مىنا زاماندا قۇرباندىققا بارا الاتىن ادامداردىڭ بار ەكەنىن دالەلدەپ بەرە العان اعامىزدىڭ جانى ءجانناتتا بولعاي.

بەيبىت سارىبايدىڭ facebook پاراقشاسىنان

Abai.kz