سەيسەنبى, 26 قاڭتار 2021
2137 0 پىكىر 27 جەلتوقسان, 2018 ساعات 10:32

مەكتەپ اسحاناسىنداعى تاماققا بايلانىستى 14 ديرەكتور جازالانعان

استانانىڭ قوعامدىق دەنساۋلىق ساقتاۋ دەپارتامەنتى مەكتەپ اسحاناسىنداعى تاماق ساپاسىن قاتىستى 14 ديرەكتوردى جازالاعان. بۇل تۋرالى استانا قالالىق ءبىلىم باسقارماسىنىڭ جەتەكشىسى ءانۋار جانعوزين ايتتى.

ونىڭ سوزىنشە، سەگىز مەكتەپتە ءتارتىپ ورناتۋ ماقساتىندا جاۋاپتى ادامدارعا سوگىس جاريالانىپ، كەيبىرى جۇمىستان شىعارىلعان جانە مەكتەپ اسحاناسىنا تاماق تاسۋشىلارمەن جاساسقان كەلىسىمشارت ۇزىلگەن.

"14 مەكتەپتە انىقتالعان كەمشىلىكتەن سوڭ تاماق جەتكىزۋشىلەرمەن كەلىسىمشارتتى ۇزارتپاۋ تۋرالى شەشىم قابىلداندى. جاقىن ارادا تاماق تاسۋشىلارعا قايتا كونكۋرس جاريالانادى" دەدى ءانۋار جانعوزين.

باسقارما جەتەكشىسىنىڭ ايتۋىنشا، مەكتەپ اسحاناسىنا تاماق اكەلەتىندەر كەلەر جىلدىڭ باسىندا انىقتالادى جانە مۇنداي شارا تاعى 27 مەكتەپتە ءجۇرىپ جاتىر.

جانعوزيننىڭ سوزىنشە، ءبىلىم جانە عىلىم مينيسترلىگىنىڭ ازىق-تۇلىك ساتىپ الۋ جانە تاماقتاندىرۋدى ۇيىمداستىرۋ تۋرالى №717 بۇيرىعىنا وزگەرىس ەنگەن.

"بۇيرىقتىڭ جاڭارعان نۇسقاسىنا سايكەس كونكۋرس بۇرىنعىداي وتپەيدى. بۇرىن ءار مەكتەپ، ءار ديرەكتور كونكۋرس جاريالايتىن جانە بۇدان كوپ ماسەلە شىقتى. جاڭا ەرەجە بويىنشا ورتالىقتاندىرىلعان كونكۋرس وتەدى. بىرنەشە مەكتەپ بىرىگىپ جاريالاۋى مۇمكىن. بۇل جاقسى جۇمىس ىستەيتىن تاماق جەتكىزۋشىلەردى انىقتاۋعا كومەكتەسەدى" دەدى ءبىلىم باسقارماسىنىڭ باسشىسى.

ءۇش جىل بۇرىن قازاقستان مەكتەپتەرىندە تەگىن تاماق بەرۋ جۇيەسى توقتاتىلدى. 2015 جىلى اقپان ايىندا ەكونوميكالىق داعدارىستى العا تارتقان پرەزيدەنت نۇرسۇلتان نازارباەۆ "قازاقستان ازاماتتارى بالالارىنىڭ ايرانى مەن توقاشى ءۇشىن وزدەرى تولەۋى ءتيىس" دەگەن.

قازىر مەكتەپتەگى اسحانالاردا ارنايى تەندەرگە قاتىسىپ، ەڭ ارزان باعا ۇسىنىپ جەڭگەن كومپانيالار جۇمىس ىستەيدى. ولار ۇسىنعان تاماقتى بالالار ساتىپ الادى.

Abai.kz

0 پىكىر