ەلباسى نۇرسۇلتان نازارباەۆ جاڭادان قۇرىلعان تۇركىستان وبلىسىنا ەرەكشە نازار اۋدارىپ وتىرعانى بەلگىلى. وڭىردەگى ءار سالانى دامىتۋعا ناقتى تاپسىرمالار دا بەرگەن بولاتىن. ەلباسىنىڭ سول تاپسىرمالارىنا سايكەس، وڭىردە ءار سالا بويىنشا قارقىندى جۇمىستار اتقارىلىپ جاتىر.

سولاردىڭ ءبىرى - تۇركىستان قالاسىنداعى اكىمشىلىك-ىسكەرلىك ورتالىعىندا باستالعان «ىسكەرلىك ورتالىقتىڭ» قۇرىلىس جۇمىستارى.تۇتىنۋدىڭ جاڭا تەحنولوگيالارى قولدانىلاتىن زاماناۋي نىساننىڭ كاپسۋلاسىن سالعان ءوڭىر باسشىسى جانسەيىت تۇيمەباەۆ وسىناۋ تاريحي ءساتتىڭ ماڭىزدىلىعىنا توقتالىپ، بولاشاق ورتالىقتىڭ جوسپارىمەن ءبولىستى. جيىنعا تۇركىستاندىقتار دا قاتىسىپ،  اقساقالدار اق باتاسىن بەردى.

«اۋدانى 50 مىڭ شارشى مەتردى قامتيتىن عيمارات 4 قاباتتان تۇرادى. مۇندا زاماناۋي ءتيىمدى كەڭسەلەر، سۋ مەن ەنەرگيانى ءتيىمدى پايدالانۋ جۇيەسى قاراستىرىلعان. ياعني، ىسكەرلىك ورتالىق اۆتوماتتاندىرىلعان "اقىلدى عيمارات" قاعيداسىمەن جوبالانعان»، - دەدى وبلىس باسشىسى. نىساننىڭ قۇرىلىسىن «BI group» جاۋاپكەرشىلىگى شەكتەۋلى سەرىكتەستىگى ءوز قاراجاتى ەسەبىنەن جۇرگىزۋدى ۇسىنىپ وتىر. العاشقى ىرگەتاسى 2019 جىلدىڭ قاڭتار ايىنان باستاپ قالاناتىن ورتالىقتىڭ جوسپار بويىنشا اياقتالۋى 2020 جىلدىڭ ناۋرىز ايىنا تۋرا كەلەدى دەپ كۇتىلۋدە.

ەستەرىڭىزدە بولسا، قر پرەزيدەنتىنىڭ قاتىسۋىمەن 2018 جىلعى 29 قىركۇيەكتەگى وتكەن كەڭەستە ەلباسى ن.نازارباەۆ تۇركىستان قالاسىندا سالىناتىن بىرقاتار نىسانداردىڭ قۇرىلىسىن بيزنەس وكىلدەرىنىڭ ءوز قاراجاتى ەسەبىنەن جۇرگىزۋ جونىندە تاپسىرما بەرگەن بولاتىن. ناتيجەسىندە، سول كەزدە وبلىستار مەن ۇلتتىق كومپانيالار، ءىرى قۇرىلىس ۇيىمدارى، بيزنەس وكىلدەرى جانە شەتەلدىك ينۆەستورلار تاراپىنان بىرقاتار قۇرىلىس نىساندارىن ىسكە اسىرۋعا ۇسىنىستار ەنگىزىلىپ، قولداۋ تاپقان-دى. سولاردىڭ ءبىرى بۇگىنگى قۇرىلىسى باستالعالى وتىرعان دەمەۋشىسى «BI group» جشس-ءى بولىپ تابىلاتىن ىسكەرلىك ورتالىق عيماراتى بولعالى وتىر.

Abai.kz