بيىلعى جىلدىڭ قازان ايىندا مەملەكەت باسشىسى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا ۇكىمەتكە 2019 جىلدىڭ 1 قاڭتارىنان باستاپ ەڭ تومەنگى جالاقىنى 1,5 ەسەگە ارتتىرۋدى تاپسىرعان بولاتىن.

تۇركىستان قالاسىنداعى كاسىپورىنداردا جۇمىس ىستەيتىن جەرگىلىكتى 230 ازاماتتىڭ جالاقىسى ارتپاق. يگى ءىس ەلباسى جولداۋى نەگىزىندە جۇزەگە اسادى. قالا اكىمىنىڭ جەرگىلىكتى بيزنەسمەندەرمەن ءوزارا جاسالعان كەلىسسوزى تاعى قانداي باستامالارعا جول اشپاق؟

تۇركىستان قالاسى شاعىن شاھار بولعانىمەن، مۇندا كاسىپكەرلىك كەڭ ەتەك جايعان. جىل باسىنان بەرى كەنتتە 56 ميلليارد تەڭگەنىڭ ءونىمى ءوندىرىلىپ، جوسپار 104 پايىزعا ارتىعىمەن ورىندالىپ وتىر. سونداي-اق، سوڭعى 9 ايدا 16 ميلليارد تەڭگەنىڭ ينۆەستيتسياسى تارتىلعان.

الىپبەك وسەرباەۆ – تۇركىستان قالاسىنىڭ اكىمى

ول ءبىز ماقتانىپ تا ايتا الامىز، مىناۋ وبلىس ورتالىعى بولعالى بەرى بىزگە كەلىپ، كاسىپ اشقىسى كەلەتىندەر كوبەيدى. مىسالى 16 ميلليارد تەڭگەنىڭ ينۆەستيتسياسىن تارتساق، 3 ميلليارد تەڭگە بيۋدجەتتەن الىپ وتىرمىز.

تۇركىستاندا ءونىمدى تەرەڭ وڭدەۋ شارالارى جۇزەگە اسۋدا. «فاراب» ماقتا زاۋىتى اق التىننان  120 ءتۇرلى ءونىم الادى. قازىر كاسىپورىندا 100 جەرگىلىكتى ازامات تۇراقتى جۇمىسپەن قامتىلدى. سونىڭ 30-ى قاراپايىم جۇمىسشى. ەندى ولاردىڭ جالاقىسى 28 پايىزعا ارتپاق.

ءابدىراسىل قۇرماناليەۆ – «فاراب» فابريكاسىنىڭ ديرەكتورى

جۇمىسشىلارىڭنىڭ جالاقىسى جاقسى بولسا، جۇمىس تا جاقسى جۇرەدى. سول ءۇشىن ءبىز وسى جالاقى كوتەرۋ ماسەلەسىن وسىدان 2 جىل بۇرىن قولعا العان بولاتىنبىز. ەندى مىنە، جولداۋدىڭ ارقاسىندا تاعى دا كوبەيتەمىز دەپ وتىرمىز.

ءابۋتالىپ مىرزاليەۆتىڭ وسى زاۋىتتا جۇمىس ىستەگەنىنە 15 جىلعا جۋىقتاعان. جالاقىسى جوعارى. قاراپايىم جۇمىسشى جولداۋ جولىندا ەڭبەكاقىسىنىڭ تاعى دا جوعارىلايتىنىنا رازى.

ءابۋتالىپ مىرزاليەۆ – جۇمىسشى

مۇندا نەبىر قيىندىقتاردى كوردىك. نەگىزىنەن مىنا باسشتسىمىزبەن بىرلەسىپ، مىناۋ جالاقىنى كوتەرۋ جۇمىستارىن جاقسى اتقارىپ وتىرمىز. ەندى تاعى دا كوتەرمەكشى. ءبىر قاراپايىم جۇمىسشىنىڭ 1 جىلداعى ورتاشا جالاقىسى 440 مىڭ تەڭگەگە جەتكەن ەدى.

جولداۋدى ناقتى جۇزەگە اسىرۋ ماقساتىندا قالا بيلىگى جەرگىلىكتى 20 كاسىپورىنمەن مەموراندۋمعا قول قويعان. ولاردىڭ قاتارىندا ناۋبايحانا، قۇرىلىس ماتەريالدارىن شىعاراتىن زاۋىت پەن جيھاز تسەحى بار. بۇيىرسا، وسى كەلىسسوز نەگىزىندە 1-قاڭتاردان باستاپ 230 ازاماتتىڭ جالاقىسى ارتادى.

پ.بينازارقىزى

Abai.kz