ەلباسى ن.نازارباەۆتىڭ “قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ” اتتى قازاقستان حالقىنا ارناعان جولداۋىندا اۋىلشارۋشىلىعى ونىمدەرىن تسيفرلاندىرۋعا باسا نازار اۋدارۋ قاجەت دەگەن بولاتىن. وسىعان سايكەس، تۇركىستان وبلىسىندا تۇيە سۇتىنەن دايىن ۇنتاق شىعاراتىن زاۋىتتىڭ قۇرىلىسى اياقتالدى.

ءوندىرىس وشاعىنىڭ جوبالىق قۇنى – 7,5 ملرد. تەڭگە. كۇنىنە 100 توننا ءسۇت وندىرەتىن كاسىپورىندا قازىر ءجۇز ادام ەڭبەك ەتەدى. ونىڭ 10-ى قىتايلىق مامان بولسا، قالعانى – جەرگىلىكتى تۇرعىندار.

بۇل – ورتالىق ازيادا تەڭدەسى جوق، تۇيە سۇتىنەن قۇرعاق ۇنتاق شىعاراتىن جالعىز زاۋىت. تۇركىستان يندۋستريالىق ايماعىندا ورنالاسقان كاسىپورىننىڭ قۇرىلىسى وتكەن جىلدىڭ قاڭتار ايىندا باستالعان. بيىل ماۋسىم ايىندا سىرتقى قۇرىلىس جۇمىستارى مەن قۇرال-جابدىقتارىن مونتاجداۋ جۇمىستارى تولىق اياقتالدى. الىپ وڭدەۋ كەشەنى تولىقتاي سوڭعى ۇلگىدەگى زاماناۋي قۇرال-جابدىقتارمەن قامتىلعان. بارلىق جۇيە اۆتوماتتاندىرىلعان. تسيفرلى تەحنولوگيامەن باسقارىلادى. تۇيە شارۋاشىلىقتارىنان جينالعان ءسۇت الدىمەن الدىن الا وڭدەۋ تسەحىنا جەتكىزىلىپ، وسى جەردە تولىق وڭدەلەدى.

زاۋىت تاۋلىگىنە 100 توننا تۇيە جانە بيە ءسۇتىن وڭدەپ، ودان قۇرعاق ۇنتاق شىعارادى. مىسالى، 15 توننا تۇيە سۇتىنەن 1 توننا دايىن ۇنتاق الىنادى. ال قۇتىداعى قۇرعاق ۇنتاقتى سۋعا ەزىپ، شۇبات رەتىندە پايدالانا بەرۋگە بولادى. ءبىر قۇتىنىڭ ىشىندەگى ۇنتاقتىڭ سالماعى – 330 گرامم. ەگەر مۇنى تۇيە سۇتىنە اينالدىراتىن بولساق، 3,5 ليتر دايىن شۇباتقا اينالادى. زاۋىتتان شىققان دايىن ءونىم نەگىزىنەن قىتايعا ەكسپورتتالادى. «ودان كەيىن ەۋروپا ەلدەرى مەن اقش-قا ەكسپورتتاۋ جوسپاردا بار»، – دەيدى زاۋىت ماماندارى. ايتا كەتەيىك، كاسىپورىن – قازاقستان مەن قىتايدىڭ بىرلەسكەن جوباسى. قىتاي ينۆەستورلارىنىڭ قارجىسىنا سالىنعان زاۋىت قۇنى – 21 ملن. دوللار، ياعني 7,5 ملرد. تەڭگە. دايىن تاۋار تولىقتاي ەكسپورتقا شىعارىلاتىندىقتان، ءونىم ساپاسىنا قويىلار تالاپ تا جوعارى.

زاۋىت ديرەكتورىنىڭ ءبىرىنشى ورىنباسارى جازيرا وزاتقىزىنىڭ ايتۋىنشا، قازىر مۇندا 100 ادام ەڭبەك ەتەدى. ونىڭ 10-ى قىتايلىق مامان بولسا، قالعان 90-نى – جەرگىلىكتى تۇرعىندار. ال زاۋىتقا قاجەتتى شيكىزات تۇركىستان وبلىسىنداعى شۇيە شارۋاشىلىقتارىنان جەتكىزىلەدى. شۇباتتىڭ ءبىر ءليترىن شارۋالاردان 450 تەڭگەدەن ساتىپ الادى. بۇل، ءبىر جاعىنان، وڭىردەگى تۇيە شارۋاشىلىعىنىڭ دامۋىنا سەرپىن بەرسە، ەكىنشىدەن، ۇلتتىق سۋسىنىمىز الەمدىك نارىققا شىعادى. بۇكىل ورتا ازيا كوز تىككەن زاۋىت قازىر سىناق مەرزىمىندە جۇمىس ىستەپ جاتىر. بۇيىرسا، ۇستىمىزدەگى جىلدىڭ سوڭىندا تولىق ىسكە قوسىلماق.

Abai.kz