ۇكىمەتتەگى تاريفتەردى تومەندەتۋ ماسەلەسىنە ارنالعان جيىندا ەسەپ بەرگەن بوزىمباەۆ ەلەكتر ەنەرگياسىنىڭ باعاسىن ارزانداتۋ ءۇشىن ۇلتتىق ەكونوميكا مينيسترلىگىمەن بىرگە گازدىڭ شەكتىك كوتەرمە باعاسىن ارزانداتۋ تۋرالى بۇيرىق دايىندالعانىن ايتتى. مينيسترلىك ەسەبىنشە، 2019 جىلدىڭ 1 قاڭتارىنان باستاپ ەلەكتر قۋاتىن وندىرۋشىلەر ساتىپ الاتىن گازدىڭ شەكتىك كوتەرمە باعاسى 12-22 پايىز ارالىعىندا ارزاندايدى. مينيستر وندىرۋشىلەرگە ارنالعان گاز باعاسى ارزانداعان سوڭ ەلەكتر قۋاتى قانشالىقتى ارزانداۋى مۇمكىن ەكەنىن ايتپادى.
ينۆەستيتسيا جانە دامۋ ءمينيسترى جەڭىس قاسىمبەك كومىر وندىرۋشىلەر، تاسىمالداۋشىلار مەن ونى وتىن بازاسىنا قابىلداپ، ساتاتىندار جانە جەرگىلىكتى اتقارۋشى ورگاندار اراسىندا جاسالعان كەلىسىم بويىنشا اقمولا، الماتى جانە سولتۇستىك قازاقستان وبلىستارى مەن شىمكەنت جانە سەمەي قالالارىندا تۇرعىندارعا كومىر باعاسى 16-18 پايىزى ارالىعىندا ارزاندايدى دەپ جوسپارلانىپ وتىرعانىن ايتتى.
قازاقستان پرەزيدەنتى نۇرسۇلتان نازارباەۆ قاراشانىڭ 7-ءسى كۇنى قاۋىپسىزدىك كەڭەسىنىڭ جيىنىندا تابيعي مونوپوليانى رەتتەۋ، باسەكەلەستىك پەن تۇتىنۋشىلار قۇقىعىن قورعاۋ كوميتەتىنىڭ جۇمىسىن سىناپ، ۇكىمەتكە جىل سوڭىنا دەيىن تاريفتەردى تومەندەتۋدى تاپسىرعان.
Abai.kz
