بۇل تۋرالى بۇگىن پارتيا توراعاسىنىڭ ءبىرىنشى ورىنباسارى ماۋلەن اشىمباەۆ ورتالىق كوممۋنيكاتسيالار قىزمەتىندە وتكەن بريفينگتە مالىمدەدى.

الدىمەن «نۇر وتان» پارتياسى توراعاسىنىڭ ءبىرىنشى ورىنباسارى ەلباسىنىڭ «ۇلى دالانىڭ جەتى قىرى» اتتى ماقالاسىنىڭ ءمانى مەن ماڭىزىنا توقتالىپ ءوتتى. ول بۇل ماقالانىڭ ۇلت تاريحىن تانۋدىڭ جاڭا كەزەڭىن باستاپ بەرگەنىن جانە ءبىزدىڭ الەمدىك وركەنيەت پەن جاھاندىق دامۋعا قوسقان ۇلەسىمىزدى قايتادان زەردەلەپ، دۇنيەجۇزىنە جاڭاشا دارىپتەۋگە ۇندەيتىنىن ايتتى.

سونىمەن قاتار ماۋلەن اشىمباەۆ مەملەكەت باسشىسى ءوز ماقالاسىندا تاريحي سانانى جاڭعىرتۋدىڭ نەگىزگى باسىمدىقتارىن ايقىنداپ بەرگەنىن جانە ولاردى جۇزەگە اسىرۋعا «نۇر وتان» پارتياسىنىڭ دا بەلسەندى قاتىساتىنىنا نازار اۋدارىپ، «ۇلى دالا» شىعارماشىلىق بايقاۋىنىڭ باستالعانىن جاريالادى.

– ەلباسىنىڭ ماقالاسى تاريحي، ۇلتتىق سانامىزدى جاڭعىرتىپ، تاۋەلسىزدىگىمىز بەن مەملەكەتتىگىمىزدى ودان ءارى كۇشەيتۋگە باعىتتالعان ۇلكەن ەڭبەك. وسى باسىمدىقتاردى جۇزەگە اسىرۋعا ۇكىمەتتىك ەمەس ۇيىمدار جانە ساياسي پارتيالارمەن بىرگە زيالى قاۋىم وكىلدەرى دە بەلسەنە قاتىسقانى ابزال. سوندىقتان ارنايى بايقاۋ جاريالاپ، قوعامىمىزدىڭ رۋحاني جاڭعىرۋىنا اسەر ەتەتىن ەڭبەكتەردى جانە تاريحىمىزداعى ۇلى تۇلعالاردىڭ ونەگەلى ءومىرىن ناسيحاتتايتىن شىعارمالاردى قولداپ، جاڭا جۇمىستاردىڭ جازىلۋىنا ءوزىمىزدىڭ ۇلەسىمىزدى قوسۋدى كوزدەپ وتىرمىز. بۇل بايقاۋدىڭ فورماتى مەن ماڭىزىن جازۋشىلار وداعىمەن پىسىقتاپ، الدىن الا تالقىلادىق. الداعى ۋاقىتتا جاس قالامگەرلەرىمىز وسى بايقاۋ ارقىلى ەلباسىنىڭ ماقالاسىندا ايتىلعان قۇندىلىقتار مەن يدەيالاردى دارىپتەۋگە جانە ولاردى جۇزەگە اسىرۋعا ءوز ۇلەستەرىن قوسادى دەپ سەنەمىز، – دەدى ماۋلەن اشىمباەۆ.

بايقاۋعا 18 بەن 40 جاس ارالىعىنداعى قالامگەرلەر قاتىسا الادى. قاتىسۋشىلاردىڭ جۇمىستارى 2018 جىلدىڭ 28 قاراشاسى مەن 2019 جىلدىڭ 15 قاڭتارى ارالىعىندا قابىلدانادى. ناتيجەسىندە «پروزا»، «پوەزيا»، «دراماتۋرگيا، كوركەم فيلمدەر مەن تەلەسەريال ستسەناريى»، «پۋبليتسيستيكا» جانە «بالالارعا ارنالعان شىعارما» سياقتى بەس بىردەي اتالىم بويىنشا جەڭىمپازدار مەن جۇلدەگەرلەر انىقتالماق. ءار اتالىم بويىنشا جەڭىمپاز بەن ەكىنشى جانە ءۇشىنشى ورىن العان قاتىسۋشىعا قوماقتى قارجىلاي سىيلىق تاعايىندالعان. ناقتى ايتقاندا، ءار اتالىمنىڭ جەڭىمپازىنا – 1,5 ميلليون، 2-ورىن يەگەرلەرىنە – 750 مىڭ، ال 3-ورىن العان قاتىسۋشىلارعا 500 مىڭ تەڭگەدەن بەرىلەدى.

بايقاۋدىڭ باسقا دا شارتتارى تۋرالى پارتيانىڭ رەسمي سايتىندا جاريالانعان بايقاۋ ەرەجەسىندە تولىق باياندالعان.

Abai.kz