«ەير استانا» – ءبىزدىڭ نەگىزگى اۋە تاسىمالداۋشى كومپانيامىز. ءبىز ونى ريچارد ەۆانسپەن بىرلەسە قۇردىق. وسى جىلدار ىشىندە كوپ جۇمىس اتقارىلدى. بۇگىندە كومپانيا جاقسى قىرىنان تانىلىپ، وڭ يميدج قالىپتاستىردى، — دەدى نۇرسۇلتان نازارباەۆ.

كەزدەسۋگە قاتىسۋشىلار قازاقستان پرەزيدەنتىنە الەمدىك اۋە تاسىمالى نارىعىنداعى سوڭعى ۇردىستەر جونىندە ايتتى.

سونىمەن قاتار، نۇرسۇلتان نازارباەۆقا ۇشۋ قاۋىپسىزدىگىن قامتاماسىز ەتۋگە قاتىستى ازاماتتىق اۆياتسيانى باسقارۋدىڭ بريتاندىق مودەلىنىڭ ەلەمەنتتەرىن ەنگىزۋ ماقساتىمەن اتقارىلىپ جاتقان جۇمىستار جونىندە باياندالدى.

ينۆەستيتسيالار جانە دامۋ ءمينيسترىنىڭ مالىمەتىنە سايكەس، 2018 جىلى قازاقستاندا 13 باعىت بويىنشا اۋە رەيستەرى اشىلىپ، استانا قالاسىندا «اشىق اسپان» پيلوتتىق جوباسى ىسكە اسىرىلدى.

كەزدەسۋ سوڭىندا مەملەكەت باسشىسى اۋە تاسىمالى قىزمەتىنىڭ حالىققا قول جەتىمدىلىگىن ارتتىرۋدىڭ ماڭىزدىلىعىن اتاپ ءوتىپ، «ەير استانا» كومپانياسىنىڭ بازاسىندا تومەندەتىلگەن تاريف بويىنشا كولىك قىزمەتىن كورسەتەتىن بيۋدجەتتىك اۋە كومپانياسىن قۇرۋدى تاپسىردى.

Abai.kz