بۇگىن قازاقستان ۇلتتىق قۇراماسى UEFA ۇلتتار ليگاسى اياسىندا اندوررا فۋتبولشىلارىن قابىلدادى.

ەۋروپا فۋتبول قاۋىمداستىعىنىڭ جاڭا جوباسى «ۇلتتار ليگاسى» ءتۋرنيرى قازاقستان فۋتبولشىلارىن جاتىرقاي قابىلدادى. العاشقى ءۇش ماتچ بويى جەڭىسكە جەتە الماعان ءبىزدىڭ قۇراما بۇگىن بار اشۋىن الاقانداي اندوررادان الدى. وسىنىڭ الدىندا ءوز الاڭىندا گرۋزيادان 0:2 ەسەبىمەن جەڭىلىپ، قوناقتا اندوررا جانە لاتۆيامەن تەك تارقاسقان (1:1) قازاقستان قۇراماسى ءتورتىنشى ويىندا 4:0 ەسەبىمەن جەڭىسكە جەتتى.

وسىنىڭ الدىنداعى ويىنداردا ەلىمىزدەگى ەڭ ماقتاۋلى دەگەن فۋتبولشىلاردى الاڭعا شىعارسا دا ەش ناتيجە بولماعان سوڭ باس باپكەر بۇگىن بىرقانشا جاس قىراننىڭ توماعاسىن تارتتى. ستانيمير ستويلوۆ دۇرىس جولدى ەندى تاپقان ەكەن، اۋىر قيمىلدايتىن الەكسەي ششەتكيننەن قۇتىلعان قازاقستان قۇراماسىنىڭ شابۋىل شەبى تۇلەپ سالا بەردى. نەگىزگى قۇرامدا ءبىرىنشى رەت شىققان ەركەبۇلان سەيداحمەت پەن باۋىرجان تۇرىسبەك مەرگەندىگىمەن كوزگە ءتۇستى. بۇدان بولەك، كاپيتاندىق مىندەتىن قايتارىپ العان باۋىرجان يسلامحان دا باۋىرىن جازا شاپتى.

جەڭىسكە جەتكەن جاقسى ارينە. بىراق، 80 مىڭ عانا حالقى بار شاعىن ەلدىڭ قۇراماسىن جەڭگەنىمىز ءۇشىن بوركىمىزدى اسپانعا اتىپ قۋانۋدىڭ ءجونى كەلمەي تۇر. سەبەبى، بۇل تۋرنيردەن ءبىزدىڭ كۇتكەنىمىز باسقا بولاتىن. ءوز توبىمىزدا ءبىرىنشى ورىن الىپ، 2020 جىلعى ەۋروپا چەمپيوناتىنا بەرىلەر جولداماعا تالاسىپ كورۋ ەدى. الايدا، توپتاعى باستى قارسىلاسىمىز گرۋزيادان باقانداي جەتى ۇپاي قالىپ قويعان ءبىزدىڭ قۋانۋعا ەش مۇمكىندىگىمىز جوق

ەكىنشىدەن، بۇگىنگى قارسىلاسىمىز اندوررا قۇراماسىنىڭ فۋتبولشىلارى ءبىزدىڭ ەلدەگىدەي ميلليونداپ جالاقى المايدى.ءتىپتى اراسىندا جارتىلاي كاسىبي فۋتبولشىلار دا بار. ال ەلىمىز فۋتبولشىلارىنىڭ جاعدايى قانداي ەكەنى بارىمىزگە بەلگىلى. قاراپايىم حالقى قوڭىرقالتا كۇن كەشەتىن قازاقستاننىڭ فۋتبولشىلارى اقشانى كۇرەپ تابادى. ەلىمىزدە دوپ قۋالاعاندارعا تولەنەتىن جالاقى ءوزىمىز قاتارلى دامۋشى ەلدەردىڭ بارىنەن جوعارى. بەيرەسمي دەرەكتەرگە سۇيەنسەك، قۇرامانىڭ باس باپكەرى ستويلوۆ مىرزا قازاق فۋتبولشىلارىنا قالاي دوپ تەبۋدى ۇيرەتكەنى ءۇشىن جىلىنا 2 ملن ەۋرو جالاقى الاتىن كورىنەدى.

سونىمەن قازاقستان قۇراماسى ۇلتتار ليگاسىنداعى العاشقى جەڭىسىنە قول جەتكىزدى. بىراق، بولگاريالىق مامان باستاعان ءبىزدىڭ فۋتبولشىلار ءسال كەش قيمىلداعان سەكىلدى. ءبىز جىعىلىپ-ءسۇرىنىپ جۇرگەندە گرۋزيا قۇراماسى العاشقى ءۇش ويىندا دا جەڭىسكە جەتىپ، بىزدەن بۇرىن مارەگە جاقىنداپ قالدى. ەندى بىزگە ءوز توبىمىزدا كوش باستاۋ ءۇشىن قالعان ەكى ويىندا جەڭىسكە جەتۋ جەتكىلىكسىز. ول ءۇشىن وق بويى ۇزاپ كەتكەن گرۋزيندەردىڭ سوڭعى ءۇش ماتچتا دا ءسۇرىنۋىن تىلەپ، مىسىق تىلەۋ بولىپ وتىرامىز ء(بىر ويىن بىزگە قارسى).

ۇلتتار ليگاسى. D ديۆيزيونى. 1 توپ

قازاقستان - اندوررا 4:0 (2:0)

گولدار: سەيداحمەت 21, تۇرىسبەك 39, جوزەپ گومەس 61 (اگ), مۇرتازاەۆ 74

قازاقستان: نەناد ەريچ (ق) - عافۋرجان سۇيىمباەۆ، ەۆگەني پوستنيكوۆ، يۋري لوگۆينەنكو، ابزال بەيسەبەكوۆ، گەورگي جۋكوۆ، باۋىرجان يسلامحان (ك), سەرىكجان مۋجيكوۆ، باكتيەر زاينۋتدينوۆ، ەركەبۇلان سەيداحمەت، باۋىرجان تۇرىسبەك.

اندوررا: جوزەپ گومەس (ق) - چۋس رۋبيو، يلدەفونس ليما (ك), ماكس لوۆەرا، مويسەس سان-نيكولاس - مارك رەبەس، مارك ۆالەس، ۆيكتور رودريگەس، جوان تسەرۆوس - مارك پۋحول، جوردي الاەس.

قۋانىش قاپپاس

Abai.kz