سارسەنبى, 23 قىركۇيەك 2020
COVID-19 قازاقستاندا. جۇقتىرعاندار — 107450. جازىلعاندار — 102219. قايتىس بولعاندار — 1699
ايماق 5155 4 پىكىر 27 قىركۇيەك, 2018 ساعات 10:07

ءمىرزاشول مەن شاردارانى تۇكپىردە قالدىرما، ۇكىمەت!

تۇركىستان وبلىسىن ەكىگە ءبولىپ، ءمىرزاشول، شاردارا جانە سارىاعاش وڭىرلەرىندەگى قالا، اۋدانداردان ەلىمىزدىڭ 15-ءشى جاڭا وڭتۇستىك قازاقستان وبلىسىن قۇرۋ قاجەت.

توقسانىنشى جىلداردىڭ باس كەزى. تۇركىستان قالاسىندا ۋنيۆەرسيتەت اشىلىپ، ءبىر جىلدان كەيىن وعان حالىقارالىق جوعارى وقۋ ورنى دەگەن مارتەبە بەرىلىپ، تۇركيادان كەلگەن تۇرىك اعايىندارمەن ەندى-ەندى ارالاسىپ، تاۋەلسىزدىكتىڭ العاشقى ءدامىن تاتىپ، سەزىنىپ جاتقان كەزىمىز.

ول كەزدە تۇركىستاننىڭ قالا دەگەن اتى بولماسا، احۋالى كادىمگى الىستاعى اۋىلدارمەن بىردەي-اق، مادەنيەتى جاعىنان اسىپ-تاسىپ تۇرعانى شامالى ەدى.

باسقاسىن ايتپاي-اق قويايىن، جاتاقحانادا بىرگە تۇراتىن كورشى پروفەسسور اعامىز ەكەۋمىز مەرزىمدى باسىلىمداردى كەزەكتەسىپ ساتىپ الىپ وقيتىنبىز.

كەزەك ماعان كەلگەن كەزدە كيوسكىگە بارىپ، گازەت سۇراسام، ونداعىلار: «سوندا ءسىز گازەتتى وقۋ ءۇشىن ساتىپ الايىن دەپ تۇرسىز با؟» - دەپ سۇراپ، تاڭ-تاماشا بولاتىن.

ايالداماعا اۆتوبۋس كەلىپ توقتاعاندا، كوشەنىڭ توپىراعى بەتىڭە قاراي بۇرق ەتە قالاتىن.

ۇيدەن ۇتىكتەتىپ كيىپ شىققان اق كويلەك پەن كاستۇم-شالبارعا جابىسقان شاڭ-توپىراقتى قولىمىزبەن قاعىپ-قاعىپ جىبەرىپ، بۇعان دەيىن تەحنيكۋم، ۋچيليششە بولعان ورىنداردا ورنالاسقان اۋديتوريالاردا كۇتىپ وتىرعان ستۋدەنتتەرىمىزگە قاراي اسىعاتىنبىز.

بارلىق جەردى داعدارىس دەرتى دەندەپ العان كەز. تۇنگە قاراي تۇركىستان قالاسى بويىنشا تەك قانا ۋنيۆەرسيتەتكە تيەسىلى عيماراتتاردا، وقىتۋشىلار مەن ستۋدەنتتەر تۇرىپ جاتقان جاتاقحانالاردا عانا جارىق جانىپ تۇراتىن. باسقا جەرلەر تاس قاراڭعى، تەرەزەلەردەن جىلتىراعان شىراق قانا بايقالاتىن.

كۇندەردىڭ كۇنىندە اۋديتوريادا ستۋدەنتتەرىمە كەزەكتى ءدارىسىمدى وقىپ تۇرعانمىن.

ءبىر كەزدە شاكىرتتەرىمنىڭ ءبىرى: «اعاي، ءسىزدى ءبىر كىسىلەر شاقىرىپ جاتىر»، - دەپ ەسىك جاقتى نۇسقادى.

دالىزگە شىعىپ قاراسام، ءوز كوزىمە ءوزىم سەنەر-سەنبەسىمدى بىلمەيمىن، تۋىپ-وسكەن اۋىلىمنان ۇزىن سانى وتىز شاقتى ءبىر توپ جەرلەستەرىم كەلىپ تۇر!

قۇشاقتاسىپ امانداسىپ، جاعداي سۇراسىپ جاتىرمىز.

سانامدا جالعىز سۇراق:

«سوناۋ ماقتاارالداعى «تەگىستىك» اۋىلىنىڭ تۇرعىندارى تۇركىستاندا، ەندى عانا شاڭىراق كوتەرىپ جاتقان ۋنيۆەرسيتەتتىڭ ىشىندە قايدان ءجۇر؟!»

سويتسەم، جەرلەستەرىم ارنايى ۇلكەن اۆتوبۋس جالداپ، قوجا احمەت ياسساۋي كەسەنەسىنە زيارات جاساۋعا كەلگەن ەكەن.

كەسەنەنى كورىپ، ارالاپ بولعان سوڭ، تۇستىك اس ىشەيىن دەسە، اسحانا تاپپاعان سوڭ: «وسىنداعى جاڭادان اشىلىپ جاتقان ۋنيۆەرسيتەتتە ءبىزدىڭ اۋىلدىڭ ءبىر جىگىتى قىزمەت ىستەيتىن ەدى عوي»، - دەپ مەنى سۇراستىرىپ، ىزدەپ كەلگەن بەتتەرى ەكەن.

ساباعىمدى اسىعىپ-ۇسىگىپ، تەز-تەز اياقتاپ، ستۋدەنتتەرىمە ءۇي تاپسىرماسىن بەرىپ، جەرلەستەرىمدى بالا-شاعاممەن بىرگە تۇرىپ جاتقان جاتاقحاناداعى ەكى بولمەلى «پاتەرىمە» الىپ كەلدىم.

اعايىندارىم اس-اۋقاتتارىن اۋىلدان وزدەرىمەن بىرگە الا شىققان ەكەن. «كەلىنشەگىڭ بىزگە ءشاي بەرسە، سول جەتەدى، جەيتىن تاماعىمىز بار»، - دەپ قويادى.

الىس جولدان ابدەن شارشاعان جەرلەس، اۋىلداستارىم ۇستەرىندەگى شاڭ-توزاڭدارىن قاعىپ، جۋىنىپ-شايىنىپ، ىستىق-ىستىق ءشاي ءىشىپ، ماڭدايلارى شىپ-شىپ تەرلەپ-تەپشىپ، تۇسكى استارىن ءىشىپ العان سوڭ، ءبىر ساعاتتاي كوز شىرىمدارىن الىپ العان سوڭ: «ءوزىڭ جاتاقحانانىڭ اياداي عانا بولمەسىنە تۇرىپ جاتىر ەكەنسىڭ. ساعان ارتىق سالماق سالماي-اق قويايىق»، - دەپ اڭگىمەنىڭ اشىعىن ايتىپ، «ماقتاارال، قايداسىڭ؟!» دەپ قايتادان جولعا شىعىپ كەتكەن ەدى سول كۇنى.

سودان بەرى دە 25 جىلعا جۋىق ۋاقىت ءوتىپتى. 25 جىل دەگەنىمىز – شيرەك عاسىر.

وسى شيرەك عاسىردا تۇركىستان قالاسى دا تۇلەپ، ەندى، مىنە، رەسمي تۇردە وبلىستىڭ اكىمشىلىك ورتالىعىنا اينالىپ وتىر.

بىراق سول ءبىر ءسات – اۋىلداس اعايىندارىمنىڭ تۇركىستانداعى قوجا احمەت ياسساۋي كەسەنەسىنە بارىپ، اس ىشەتىن، دەمالاتىن ورىن تاپپاي، ۋنيۆەرسيتەتتە ستۋدەنتتەرگە ساباق بەرىپ جۇرگەن مەنى ىزدەپ، اۋديتورياداعى ۇل-قىزداردان سۇراپ كەلگەندەرى ءالى كۇنگە دەيىن ەسىمنەن كەتپەيدى!

2018 جىلعى 1 قىركۇيەك كۇنى قازاقستان رەسپۋبليكاسىنىڭ پرەزيدەنتى نۇرسۇلتان ءابىشۇلى نازارباەۆ پارلامەنت پالاتالارىنىڭ بىرلەسكەن وتىرىسىنا قاتىسىپ، شىمكەنتكە رەسپۋبليكالىق ماڭىزى بار قالا مارتەبەسى بەرىلۋىنە جانە تۇركىستان وبلىسىنىڭ قۇرىلۋىنا بايلانىستى پارلامەنتتىڭ قاراۋىنا قايتا قۇرىلعان اكىمشىلىك-اۋماقتىق بىرلىكتەردىڭ تولىققاندى جۇمىسىن قامتاماسىز ەتۋگە باعىتتالعان زاڭ جوبالارى ەنگىزىلەتىنىن جانە ولاردىڭ شۇعىل قارالىپ، قابىلدانۋى كەرەكتىگىن ايتتى.

وسىعان وراي، ەلباسىمىزدىڭ اتىنا جازىلعان تۇركىستان وبلىسىن ەكىگە ءبولىپ، ءمىرزاشول، شاردارا جانە سارىاعاش وڭىرلەرىندەگى اۋدانداردان ەلىمىزدىڭ 15-ءشى جاڭا وڭتۇستىك قازاقستان وبلىسىن قۇرۋ تۋرالى ۇسىنىسىمدى جاريالاۋدى ءجون وتىرمىن.

قازاقستان رەسپۋبليكاسى پرەزيدەنتىنىڭ 2018 جىلعى 5 ماۋسىمداعى № 698 «وڭتۇستىك قازاقستان وبلىسىنىڭ اكىمشىلىك-اۋماقتىق قۇرىلىسىنداعى وزگەرىستەر تۋرالى» جارلىعىمەن وڭتۇستىك قازاقستان وبلىسىنىڭ قۇرامىندا مىناداي:

1) وڭتۇستىك قازاقستان وبلىسىنىڭ ماقتاارال اۋدانىن ءبولۋ جولىمەن əكىمشىلىك ورتالىعى جەتىساي قالاسىندا بولاتىن جەتىساي اۋدانى، əكىمشىلىك ورتالىعى مىرزاكەنت كەنتىندە بولاتىن ماقتاارال اۋدانى;

2) وڭتۇستىك قازاقستان وبلىسىنىڭ سارىاعاش اۋدانىن ءبولۋ جولىمەن əكىمشىلىك ورتالىعى سارىاعاش قالاسىندا بولاتىن سارىاعاش اۋدانى، əكىمشىلىك ورتالىعى اباي اۋىلىندا بولاتىن كەلەس اۋدانى əكىمشىلىك-اۋماقتىق بىرلىكتەرى قۇرىلعانى بەلگىلى.

سونىمەن بىرگە قازاقستان رەسپۋبليكاسى پرەزيدەنتىنىڭ 2018 جىلعى 19 ماۋسىمداعى № 702 «قازاقستان رەسپۋبليكاسىنىڭ اكىمشىلىك-اۋماقتىق قۇرىلىسىنىڭ كەيبىر ماسەلەلەرى تۋرالى» جارلىعىمەن وڭتۇستىك قازاقستان وبلىسىنىڭ اكىمشىلىك ورتالىعى شىمكەنت قالاسىنان تۇركىستان قالاسىنا كوشىرىلىپ، وڭتۇستىك قازاقستان وبلىسى تۇركىستان وبلىسى دەپ قايتا اتالدى.

قازاقستان رەسپۋبليكاسى ۇكىمەتىنىڭ 2018 جىلعى 22 اقپانداعى № 74 قاۋلىسىمەن شىمكەنت اگلومەراتسياسىن اۋماقتىق دامىتۋدىڭ وڭىرارالىق سحەماسى بەكىتىلگەن.

ۇكىمەتىمىز بەكىتكەن شىمكەنت اگلومەراتسياسىنىڭ پەرسپەكتيۆالىق ەكونوميكالىق اسەر ەتۋ جانە الەۋەتتىك دامۋ ايماعىنداعى ەلدى مەكەندەرىنىڭ اۋدانى:

1) شىمكەنت قالاسى – 38244 گا;

2) سارىاعاش قالاسى – 2904 گا;

3) لەڭگىر قالاسى – 2047 گا;

4) ارىس قالاسى – 3327 گا;

5) ارىس قالاسىنىڭ قالالىق اكىمشىلىگى – 8507 گا;

6) بايدىبەك اۋدانى – 30853,3 گا;

7) قازىعۇرت اۋدانى – 39701 گا;

8) ورداباسى اۋدانى – 19854 گا;

9) سايرام اۋدانى – 59067 گا;

10) سارىاعاش اۋدانى – 15192 گا;

11) تولەبي اۋدانى – 45912 گا;

12) تۇلكىباس اۋدانى – 20550 گا قۇرادى.

شىمكەنت اگلومەراتسياسى ەلدى مەكەندەرىندەگى جەردىڭ جالپى الاڭى 286158,3 گا قۇرايدى. جوبالاۋدىڭ ەسەپتىك مەرزىمىنە قاراي شىمكەنت قالاسىن ەسەپكە العاندا قالالىق جانە اۋىلدىق ەلدى مەكەندەردىڭ جالپى اۋدانى 291080,15 گا قۇرايدى.

سونىمەن بىرگە ۇكىمەتىمىز حالىقتىڭ كوشى-قون اعىنىن ۇستاپ قالۋ جانە اگلومەراتسيا وزەگىن «جەڭىلدەتۋ» ءۇشىن وندا وڭدەۋ ءوندىرىسى، قىزمەت كورسەتۋ سالاسى، تۋريستىك-رەكرەاتسيالىق كەشەن وبەكتىلەرىن دامىتا وتىرىپ، نەگىزگى جوسپارلى وستەر بويىنشا تارتىلىس ورتالىقتارى جانە كونترماگنيتتەر سياقتى اگلومەراتسيانىڭ ءىرى ەلدى مەكەندەرىن دامىتۋ ۇسىنىلىپ وتىر.

كونترماگنيتتەر رولىندە اۋدانداردىڭ مىناداي اكىمشىلىك ورتالىقتارى انىقتالدى:

1) وڭتۇستىك باعىتىندا – سارىاعاش قالاسى (رەكرەاتسيا، تۋريزم، مينەرالدى سۋ ءوندىرىسى، اۋىل شارۋاشىلىعى ونىمدەرىن وڭدەۋ، قۇرىلىس ماتەريالدارىن ءوندىرۋ);

2) باتىس باعىتىندا – ارىس قالاسى – قازاقستاننىڭ ءىرى تەمىرجول تورابى;

3) شىعىس باعىتىندا – ت. رىسقۇلوۆ اۋىلى (قۇرىلىس ماتەريالدارىن، اۋىل شارۋاشىلىعى ونىمدەرىن ءوندىرۋ);

4) ەلدى مەكەندەردى – سەرىكتەستەردى / حالىقتىڭ ىشكى كوشى-قونىنىڭ ورتالىقتارىن دامىتۋ: لەڭگىر قالاسى، اقسۋ، قازىعۇرت، بادام، تەمىرلان، تورتكول، شايان اۋىلدارى.

جوعارىدا اتاپ كورسەتىلگەن رەسمي قۇجاتتان كورىپ وتىرعانىمىزداي، ۇكىمەتىمىز بەكىتكەن شىمكەنت اگلومەراتسياسىنىڭ پەرسپەكتيۆالىق ەكونوميكالىق اسەر ەتۋ جانە الەۋەتتىك دامۋ ايماعىنداعى ەلدى مەكەندەرىنىڭ اۋماقتارىنا قازىرگى ماقتاارال، جەتىساي جانە شاردارا اۋداندارى ەنگىزىلمەگەن.

ءبىز ەلباسىمىزدىڭ بۇرىنعى وڭتۇستىك قازاقستان، قازىرگى تۇركىستان وبلىسىنىڭ ورتالىعىن شىمكەنت قالاسىنان تۇركىستان قالاسىنا كوشىرۋ تۋرالى تاريحي شەشىمىن جان-تانىمىزبەن قولدايمىز.

الايدا ماقتاارال جانە جەتىساي جاقتاعى جەرگىلىكتى تۇرعىنداردىڭ اراسىندا «ەلىمىزدىڭ ەڭ قيىر كۇنگەي تۇكپىرىندەگى ءمىرزاشول ءوڭىرى مەن شاردارا اۋدانىنىڭ حالقى ءۇشىن وبلىس ورتالىعىنىڭ تۇركىستان قالاسىنا كوشىرىلۋى قانشالىقتى ءتيىمدى؟» دەگەن ساۋالدىڭ تۋىنداپ وتىرعانى دا وتە ورىندى دەپ ەسەپتەيمىز.

كەيبىر دەرەكتەر بويىنشا حالقىنىڭ سانى 500 مىڭ ادامنان اسىپ جىعىلاتىن ءمىرزاشول وڭىرىندەگى قازىرگى ماقتاارال اۋدانىنىڭ ورتالىعى مىرزاكەنت كەنتىنەن شىمكەنتكە دەيىنگى قاشىقتىق – 250 شاقىرىم. ال تۇركىستان قالاسى شىمكەنتتەن 170 شاقىرىم قاشىقتىقتا ورنالاسقان.

وبلىس ورتالىعى شىمكەنتتەن تۇركىستانعا كوشىرىلگەن سوڭ قازاقتىڭ ءمىرزاشول وڭىرىندەگى اعايىندارىمىز تۇركىستان وبلىسىنىڭ جاڭا اكىمشىلىك ورتالىعىنا جەتۋ ءۇشىن 420 شاقىرىمنان استام جول جۇرۋىنە تۋرا كەلىپ وتىر.

ال جەرگىلىكتى حالىقتىڭ ماقتاارال جانە جەتىساي اۋداندارىنان تۇركىستان قالاسىنا شاردارا جانە وتىرار اۋداندارى مەن ارىس قالاسىنىڭ اۋماقتارى ارقىلى بارىپ-كەلۋىنە مۇنداعى جەرگىلىكتى ماڭىزى بار جولدارىمىز دايىن با؟

ءمىرزاشول وڭىرىندە تۇرىپ جاتقان جەرگىلىكتى تۇرعىنداردى سارىاعاشتان تۇركىستانعا اپاراتىن تەمىر جول قاتىناسى، جولاۋشىلاردى تاسىمالدايتىن پويىزداردىڭ ءجۇرۋ جاعدايى قانداي؟

جوعارىدا اتالعان ماقتاارال، جەتىساي جانە شاردارا اۋداندارىنىڭ حالقى تۇركىستان وبلىسىنىڭ جاڭادان بەكىتىلگەن رەسمي اكىمشىلىك ورتالىعىنان تىم قاشىقتا، وتە الىس تۇكپىردە قالىپ قويىپ وتىر.

قازىرگى تاڭدا ءمىرزاشول ءوڭىرى حالقىنىڭ تۇركىستان وبلىسىنىڭ جاڭا اكىمشىلىك ورتالىعىنا بارىپ-كەلۋى بارىنشا قيىنداپ كەتتى.

بىزدىڭشە، ۇكىمەتىمىز بەن تۇركىستان وبلىسىنىڭ اكىمدىگى ماسەلەنىڭ وسى جاعىن ويلاستىرىپ، ماقتاارال، جەتىساي جانە شاردارا اۋداندارى حالقىنىڭ الەۋمەتتىك-ەكونوميكالىق تۇرعىدان دامۋىن جاقسارتۋ جونىندە ارنايى مەملەكەتتىك باعدارلاما قابىلداعانى دۇرىس.

اتاپ ايتقاندا، ۇكىمەتىمىز:

- تۇركىستان قالاسى مەن مىرزاكەنت كەنتى ارالىعىنداعى اۆتوجولدى جەدەل تۇردە جوندەپ، شاردارا ارقىلى تەمىرجول قۇرىلىسىن قولعا العانى ءجون;

- شاردارا جانە جەتىساي قالالارى، اسىقاتا جانە اتاكەنت كەنتتەرى ارقىلى وتەتىن تۇركىستان قالاسى مەن مىرزاكەنت كەنتى ارالىعىنداعى ينفراقۇرىلىمدى جاقسارتۋى ءتيىس.

ۇكىمەتتە وڭتۇستىك وڭىرىندەگى مىرزاكەنت، اتاكەنت، اسىقاتا كەنتتەرى مەن شاردارا قالاسىن دامىتۋ جونىندە ارنايى كەڭەس وتكىزگەنى دۇرىس بولار ەدى.

رەسمي مالىمەتتەر بويىنشا بۇگىندە ءمىرزاشول وڭىرىندەگى اتاكەنت كەنتىندە – 18 مىڭنان استام، مىرزاكەنت كەنتىندە – 15 مىڭعا جۋىق، اسىقاتا كەنتىندە – 12 مىڭنان استام حالىق تۇرادى.

وسىعان وراي، «قازاقستان رەسپۋبليكاسىنىڭ اكiمشiلiك-اۋماقتىق قۇرىلىسى تۋرالى» قازاقستان رەسپۋبليكاسىنىڭ 1993 جىلعى 8 جەلتوقسانداعى № 2572-XII زاڭىنىڭ 3-ءشى بابىنا سايكەس اۋداندىق ماڭىزى بار قالالارعا اۋماعىندا ونەركاسiپ ورىندارى، كوممۋنالدىق شارۋاشىلىق، مەملەكەتتiك تۇرعىن ءۇي قورى، وقۋ جانە مادەني-اعارتۋ، ەمدەۋ مەن ساۋدا وبەكتiلەرiنiڭ دامىعان جەلىسi بار، حالقىنىڭ سانى كەمiندە 10 مىڭ ادام بولاتىن، حالقىنىڭ جالپى سانىنىڭ ۇشتەن ەكiسiنەن استامىن جۇمىسشىلار، قىزمەتشiلەر جانە ولاردىڭ وتباسى مۇشەلەرi قۇرايتىن ەلدi مەكەندەر جاتاتىنىن ەسكەرە كەلىپ، مىرزاكەنت، اتاكەنت جانە اسىقاتا كەنتتەرىنە قالا مارتەبەسى بەرىلگەنى ءجون.

بۇگىندە قايتا قالپىنا كەلتىرىلگەن ماقتاارال جانە جەتىساي اۋداندارىنىڭ اكىمدەرىنە ەڭبەك كۇشى مول ءمىرزاشول وڭىرىنەن ەڭبەك كۇشى جەتىسپەيتىن رەسپۋبليكامىزدىڭ سولتۇستىك وڭىرلەرىنە قونىستانۋ بويىنشا جەرگىلىكتى جۇرتشىلىق اراسىندا ءتۇسىندىرۋ جۇمىستارىن كۇشەيتۋ; ءوڭىردىڭ حالقىن ەلىمىزدىڭ سولتۇستىك وڭىرلەرىندە شارۋاشىلىقپەن اينالىسۋعا شاقىرۋ; وسى اتالعان جۇمىستاردى جەرگىلىكتى ءماسليحاتتاردىڭ دەپۋتاتتارىمەن بىرلەسە وتىرىپ جۇزەگە اسىرۋ تۋرالى تاپسىرما بەرىلگەن.

بىراق قاراپايىم حالىقتى وزدەرى ءومىر بويى تۇرىپ كەلە جاتقان جايما-شۋاقتى ءمىرزاشول وڭىرىنەن سارشۇناق ايازدى كۇندەرى كوپ سارىارقا دالاسىنا كوشىرە سالۋ وڭاي شارۋا ەمەس!

ونىڭ ۇستىنە قازاقستان رەسپۋبليكاسى ۇكىمەتىنىڭ 2018 جىلعى 11 تامىزداعى № 501 قاۋلىسىمەن 7 119 ادامنان تۇراتىن قونىس اۋدارۋشىلاردى قابىلداۋدىڭ 2018 جىلعا ارنالعان وڭىرلىك كۆوتاسى بەلگىلەنگەن.

ال ءمىرزاشول وڭىرىندە تۇراقتى تۇرىپ جاتقان جەرگىلىكتى حالىقتىڭ سانى بەيرەسمي دەرەكتەر بويىنشا 500 مىڭنان اسىپ جىعىلادى.

ارينە، مۇمكىندىك بولىپ، ۇكىمەت تاراپىنان قاجەتتى جاعداي جاسالىپ جاتسا، مىرزاشولدەگى قالىڭ قازاقتى ارقاعا كوشىرگەن دۇرىس!

الايدا مىرزاشولدەگى 500 مىڭ تۇرعىننىڭ بارلىعىن بىردەي ەلىمىزدىڭ سولتۇستىگىنە كوشىرۋ مۇمكىن بە؟!

ءيا، ءبىزدىڭ: «ءمىرزاشول مەن شاردارا ءبىر تۇكپىردە قالىپ قويدى، بۇل وڭىردە جاڭادان وبلىس اشۋ كەرەك»، - دەپ ەلباسىمىز بەن ۇكىمەتكە، بارلىق مينيسترلەرگە جازىپ جاتقان ۇسىنىس حاتتارىمىزعا تاباندى تۇردە قاساقانا قارسىلىق ءبىلدىرىپ جاتقاندار دا جەتكىلىكتى.

ولاردىڭ ايتاتىندارى: «جەرگىلىكتى تۇرعىنداردىڭ تۇركىستانعا كەلۋى مىندەتتى ەمەس. قۇجاتتاردى اۆتوماتتاندىرىلعان تۇردە ينتەرنەتتەگى «ەلەكتروندىق ۇكىمەت» ۆەب-پورتالى ارقىلى دا الۋعا بولادى».

اينالايىندار-اۋ، جاڭا وبلىس جانە جاڭا وبلىس ورتالىعى تەك ءبىر جاپىراق قاعاز الۋ ءۇشىن عانا كەرەك دەپ كىم ايتتى سىزدەرگە؟!

جاڭا وبلىستى قۇرۋ ءمىرزاشول جانە شاردارا وڭىرىندە تۇرىپ جاتقان 500 مىڭ قاراپايىم قارا حالىق قازىرگى زامانعى وركەنيەتتىڭ دامۋ ۇردىسىنەن قالىپ قويماۋى ءۇشىن كەرەك!!!

ءمىرزاشول جانە شاردارا وڭىرىندە تۇرىپ جاتقان 500 مىڭ قاراپايىم قارا حالىقتىڭ بولاشاق ۇرپاقتارى – ۇل-قىزدارى مەن نەمەرە-شوبەرەلەرى دە باسقالار سەكىلدى ساپالى ءبىلىم الۋى، مادەنيەت پەن وركەنيەتتىڭ وسى زامانعى وزىق تۇرلەرىن يگەرۋى كەرەك!!!

ءمىرزاشول جانە شاردارا وڭىرىندە تۇرىپ جاتقان 500 مىڭ قاراپايىم قارا حالىق تا الەۋمەتتىك-ەكونوميكالىق دامۋدىڭ جەتىستىكتەرىن، دەنساۋلىق ساقتاۋ، ءبىلىم، مادەنيەت، جالپى وركەنيەتكە جەتكىزەتىن باسقا دا مەكەمەلەردىڭ قىزمەتتەرىن سوناااۋ تۇكپىردەگى الىس ورتالىققا بارىپ، ۇزاق جول ءجۇرىپ، اۋرە-سارساڭعا تۇسپەي، ءدال قاسىندا، جاقىن جەردە ءجۇرىپ پايدالانۋعا قۇقىلى!!!

اقىر اياعىندا، ءمىرزاشول جانە شاردارا وڭىرىندە تۇرىپ جاتقان 500 مىڭ قاراپايىم قارا حالىقتىڭ بولاشاق ۇرپاعى ءوزىنىڭ انا ءتىلى – قازاق ءتىلىن ساقتاپ قالۋى ءۇشىن، كەلەشەكتە ءوز جەرىندە، ءوز ەلىندە، ءوزىنىڭ اتاقونىس – اتامەكەنىندە ۇلتتىق سانى جاعىنان ۇلەس سالماعى تومەندەپ، ازشىلىق بولىپ قالماۋى ءۇشىن كەرەك جاڭا وبلىس!!!

ەگەر ءمىرزاشول مەن شاردارانىڭ حالقى 500 مىڭ ەمەس، 50 مىڭ بولسا، ۇندەمەي-اق قويا سالۋعا بولار ەدى.

الايدا، وبلىس ورتالىعى تۇركىستان قالاسىنا كوشىرىلۋىنىڭ سالدارىنان 5 مىڭ ەمەس، 50 مىڭ ەمەس، 500 مىڭ قاراپايىم قارا حالىق قازىرگى زامانعى وركەنيەتتىڭ، ءبىلىم مەن عىلىمنىڭ، مادەنيەت پەن ادەبيەتتىڭ، زاماناۋي جاڭا تەحنولوگيانىڭ، جەدەل اقپارات پەن اقپاراتتاندىرۋدىڭ، ت.ب. دامۋ ۇردىسىنەن الىس تۇكپىردە قالىپ قويىپ وتىرعان سوڭ، امالسىز قايتا-قايتا دابىل قاعۋعا تۋرا كەلىپ تۇر!

بىزدىڭشە، قازىرگى تۇركىستان وبلىسىن ەكىگە ءبولىپ، ەلىمىزدىڭ ەڭ قيىر كۇنگەي تۇسىنداعى جانە سىرداريا وزەنىنىڭ ورتا تۇسىنداعى اۋداندار مەن قالالاردى بىرىكتىرىپ، قازاقستاننىڭ 15-ءشى – وڭتۇستىك قازاقستان وبلىسىن اشقان وتە ورىندى دەپ ويلايمىز.

تۇركىستان وبلىسىنىڭ اكىمشىلىك ورتالىعى تۇركىستان قالاسىنا كوشىرىلۋىنە جانە شىمكەنت قالاسى رەسپۋبليكالىق ماڭىزى بار قالالاردىڭ ساناتىنا جاتقىزىلۋىنا بايلانىستى قازاقتىڭ ءمىرزاشول ءوڭىرىنىڭ ەلىمىز ءۇشىن ساياسي-ەكونوميكالىق جانە ستراتەگيالىق تۇرعىدان ەرەكشە ماڭىزى بار ەكەنىن ەسكەرە وتىرىپ، شەكارا ماڭىنداعى ەلدى مەكەندەردى جالپى الەۋمەتتىك-ەكونوميكالىق تۇرعىدان دامىتۋ جانە جەرگىلىكتى تۇرعىنداردىڭ ءومىر ءسۇرۋ جاعدايىن جاقسارتۋ ماقساتىندا «قازاقستان رەسپۋبليكاسىنىڭ اكiمشiلiك-اۋماقتىق قۇرىلىسى تۋرالى» قازاقستان رەسپۋبليكاسىنىڭ 1993 جىلعى 8 جەلتوقسانداعى № 2572-XII زاڭىنىڭ نەگىزىندە قازىرگى ماقتاارال، جەتىساي، شاردارا جانە وعان ىرگەلەس جاتقان باسقا دا قالا، اۋداندارىنىڭ نەگىزىندە ءوز الدىنا دەربەس وڭتۇستىك قازاقستان وبلىسىن قۇرۋ قاجەت.

بۇگىنگى تۇركىستان وبلىسىنان ەنشى الىپ ءوز الدىنا بولەك شىعاتىن وسى جاڭا وڭتۇستىك قازاقستان وبلىسىنىڭ قۇرامىنا مىنا اۋداندار مەن قالالاردى ەنگىزۋگە بولار ەدى:

- قازىعۇرت اۋدانى (حالقى 107 496 ادام);

- سارىاعاش اۋدانى (قايتا قالپىنا كەلتىرىلگەن كەلەس اۋدانىمەن بىرگە – حالقى 326 426 ادام);

- ماقتاارال اۋدانى (قايتا قالپىنا كەلتىرىلگەن جەتىساي اۋدانىمەن بىرگە – حالقى 304 442 ادام);

- شاردارا اۋدانى (حالقى 78 614 ادام);

- ارىس قالاسى (حالقى 74 064 ادام);

بارلىعى – 891 042 ادام.

جاڭادان قۇرىلاتىن 15-ءشى وبلىستىڭ اكىمشىلىك ورتالىعى رەتىندە جەتىساي (حالقى – 48750 ادام) نەمەسە شاردارا (حالقى – 30 500 ادام) قالالارىنىڭ ءبىرىن بەلگىلەۋ ءجون دەپ ويلايمىز.

سوندا ەلىمىز ءۇشىن ەرەكشە ستراتەگيالىق ساياسي-الەۋمەتتىك جانە ەكونوميكالىق ماڭىزى بار قيىرداعى كۇنگەي وڭىرىمىزدەگى جالپى تۇرعىندارىنىڭ سانى 891 042 ادام بولاتىن جاڭا 15-ءشى وڭتۇستىك قازاقستان وبلىسى قازاق ەلىنىڭ وزبەكستانمەن شەكتەسەتىن، ارى قاراي تاجىكستان جانە اۋعانستان مەملەكەتتەرىنە ۇلاساتىن شەكارالىق بولىگىن مىقتى قورعانىس رەتىندە نىقتاپ، بەكەمدەپ تۇراتىن ەدى.

سوندا قازاقتىڭ ءمىرزاشول وڭىرىندەگى اعايىندارىمىز تۇركىستان وبلىسىنىڭ جاڭا اكىمشىلىك ورتالىعى تۇركىستان قالاسىنا جەتۋ ءۇشىن 400 شاقىرىمنان استام جول ءجۇرىپ، قينالماس ەدى.

ءيا، قازاقستاننىڭ مەملەكەتتىك شەكارا سىزىعىن انىقتاۋ جانە بەلگىلەۋ جۇمىستارى جۇرگىزىلگەن كەزدە ماقتاارال جانە جەتىساي اۋداندارى ءۇش جاعىنان وزبەكستان اۋماعىنىڭ قورشاۋىندا، ال ءتورتىنشى تۇسى شاردارا سۋ قويماسىمەن تۇيىسەتىن تۇيىق جاعدايدا قالىپ قويعانى بەلگىلى.

وسىلايشا، بۇگىندە ماقتاارال جانە جەتىساي اۋداندارى قازاقستاننىڭ نەگىزگى اۋماقتىق جەرىنەن تۇكپىردە، باسقا مەملەكەتتەردىڭ قورشاۋىندا، تاجىكستان مەن اۋعانستاننىڭ شەكارالارىنا وتە تاياۋ جاتقان جارتىلاي انكلاۆ (جارتىلاي ەكسكلاۆ) احۋالىندا جاتقانى جەرگىلىكتى حالىقتى ەرەكشە الاڭداتىپ وتىر.

ەلباسىمىز نۇرسۇلتان نازارباەۆتىڭ 2018 جىلدىڭ 16-18 قاڭتارىندا امەريكا قۇراما شتاتتارىندا رەسمي ساپارى كەزىندە قازاقستان مەن اقش «C5+1» ديالوگى سياقتى وڭىرلىك ىنتىماقتاستىق فورماتتارىن پايدالانۋ ارقىلى ورتالىق ازياداعى ورتاق سىن-قاتەرلەرگە توتەپ بەرۋگە دايىن ەكەنى، بۇل رەتتە بولاشاقتا اۋعانستاننىڭ «C5+1» جوبالارىنا قاتىسۋى دا قۇپتالعانى بەلگىلى.

وسى كەزدەسۋدە اقش پرەزيدەنتى دونالد ترامپ قازاقستانمەن ستراتەگيالىق ارىپتەستىكتە اقش پەن ورتالىق ازيا اراسىنداعى قارىم-قاتىناسقا، اۋعانستانداعى اقش اسكەرىنە كورسەتىلەتىن كومەككە ەرەكشە نازار اۋدارعان ەدى.

مىنە، اقش سەكىلدى الەمدى بيلەگەن الپاۋىت مەملەكەت ورتالىق ازياعا كوزىن تىگىپ وتىرعان قازىرگى كۇردەلى حالىقارالىق جاعدايدا، وزبەكستان مەن تاجىكستاننىڭ، ارى قاراي اۋعانستاننىڭ ءيىن تىرەسكەن تۇسىندا، اۋماعى جاعىنان بار بولعانى 176 مىڭ گەكتار عانا بولاتىن كىپ-كىشكەنتاي جەردە 500 مىڭعا جۋىق حالىق تۇرىپ جاتقان، تۇرعىندارىنىڭ سانى جاعىنان تۇتاس ءبىر وبلىسقا ساي كەلەتىن ءمىرزاشول ءوڭىرى حالقىنىڭ ەلىمىز بويىنشا ەرەكشە مەملەكەتتىك ماڭىزى بار ءىرى ەكونوميكالىق جانە مادەني ورتالىقتارىنان وتە الىس تۇكپىردە قالىپ قويۋىنا جول بەرۋگە بولمايدى!

قازاقستان رەسپۋبليكاسىنىڭ ينۆەستيتسيالار جانە دامۋ مينيسترلىگى دە وبلىس ورتالىعىنىڭ تۇركىستان قالاسىنا كوشىرىلۋى ءمىرزاشول، شاردارا جانە سارىاعاش وڭىرلەرى ءۇشىن قولايسىزدىقتار تۋعىزعانىن ءتۇسىنىپ وتىر ەكەن!

تۇركىستان وبلىسىن ەكىگە ءبولىپ، ءمىرزاشول، شاردارا جانە سارىاعاش وڭىرلەرىندەگى اۋدانداردان ەلىمىزدىڭ 15-ءشى جاڭا وڭتۇستىك قازاقستان وبلىسىن قۇرۋ تۋرالى ۇسىنىسىمىزعا قازاقستان رەسپۋبليكاسىنىڭ ينۆەستيتسيالار جانە دامۋ ءمينيسترى جەڭىس ماحمۇدۇلى قاسىمبەك مىرزادان دا رەسمي جاۋاپ كەلدى:

«قۇرمەتتى مىرزانتاي قوجابايۇلى!

حاتىڭىزدا كوتەرىلگەن ءمىرزاشول، شاردارا جانە سارىاعاش اۋداندارى بويىنشا ماسەلە بەلگىلى قولايسىزدىقتار تۋعىزعانىن تۇسىنە وتىرىپ، جاڭادان 15-ءشى وبلىس قۇرۋ بويىنشا ۇسىنىسىڭىز ينۆەستيتسيالار جانە دامۋ مينيسترلىگىنىڭ قۇزىرەتىنە كىرمەيتىنىن حابارلايمىز.

تۇركىستان وبلىسى اكىمدىگى ءوز تاراپىنان وبلىستاعى اۆتوجول جاعدايىن جاقسارتۋ بويىنشا ۇلكەن جۇمىستار اتقارۋدا، جانە وبلىس ورتالىعى تۇركىستان قالاسىنا اۋىسقاننان كەيىن دە جۇمىستار جالعاسىن تاباتىنىن ايتامىز.

سونىمەن قاتار، مينيسترلىك پەن تۇركىستان وبلىسى اكىمدىگىمەن بىرلەسىپ وبلىستاعى اۆتوجول جەلىسىن دامىتۋداعى جاسالعان جۇمىستاردى ەسكەرگەن ءجون.

وبلىس بويىنشا اۆتوموبيل جولداردىڭ جالپى ۇزىندىعى 6 769 كم، سونىڭ ىشىندە رەسپۋبليكالىق ماڭىزى بار 866 كم اۆتوجول جانە جەرگىلىكتى جەلى 5 903 كم قۇراپ، جاقسى جانە قاناعات جاي-كۇيى – 64,4% قۇرايتىنىن حابارلايمىز.

اعىمداعى جىلى مينيسترلىكتەن وبلىسقا بولىنگەن نىسانالى ترانسفەرتتەر مەن وبلىستىڭ بيۋدجەتىنەن بولىنگەن قاراجاتقا جەرگىلىكتى 600 كم اۆتوموبيل جولدارى جوندەلۋ كوزدەلگەن.

2019 جىلعى بيۋدجەت جوباسىندا دا وبلىستاعى جەرگىلىكتى اۆتوموبيل جولداردى رەكونسترۋكتسيالاۋ، كۇردەلى جانە ورتاشا جوندەۋ جوسپارلانعانىن دا ايتىپ كەتكەن ءجون.

سونداي اق، «اۆتوموبيل جولدارى تۋرالى» قازاقستان رەسپۋبليكاسىنىڭ زاڭىنا سايكەس، وبلىستىق جانە اۋداندىق ماڭىزى بار اۆتوموبيل جولدار جەرگىلىكتى اتقارۋشى ورگانداردىڭ قاراماعىندا بولعاندىقتان سول ءوڭىردىڭ جەرگىلىكتى اۆتوموبيل جولدارى بويىنشا تولىق اقپارات الۋ ءۇشىن تۇركىستان وبلىسىنىڭ جولاۋشىلار كولىگى جانە اۆتوموبيل جولدارى باسقارماسىنا ءوتىنىش جولداۋعا بولاتىنىن حابارلايمىز».

https://dialog.egov.kz/questioncontroller/view?id=513661

ال 2018 جىلعى 11 قىركۇيەكتە قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى ءمادينا ەراسىلقىزى ابىلقاسىموۆادان مىناداي رەسمي جاۋاپ الدىق:

«سالاماتسىز با، قۇرمەتتى مىرزانتاي قوجابايۇلى!

الەۋمەتتىك سالاداعى كۇش-جىگەردى ۇيلەستىرۋ جانە حالىقتى قولداۋ، مەملەكەت باسشىسىنىڭ تاپسىرمالارىن ورىنداۋداعى ماڭىزدى باعىتتارىنىڭ ءبىرى بولىپ تابىلادى.

وسىعان بايلانىستى، سىزگە ازاماتتىق كوزقاراس ءۇشىن العىسىمىزدى بىلدىرەمىز جانە ءسىز كوتەرگەن ماسەلەلەر ەسكەرىلگەنىن حابارلايمىز».

قاراپ وتىرساق، بار بولعانى 185 398 گەكتار نەمەسە 1,8 مىڭ شارشى شاقىرىم اۋماق.

ونىڭ ىشىندە:

ماقتاارال اۋدانىنىڭ اۋماعى – 80 763,81 گەكتار;

جەتىساي اۋدانىنىڭ اۋماعى – 104 634,19 گەكتار.

مىنە، وسى الاقانداي جەردى قونىس ەتكەن حالىقتىڭ سانى – رەسمي تۇردە 307 مىڭ.

ال بەيرەسمي مالىمەتتەرگە سۇيەنسەك، ماقتاارال جانە جەتىساي اۋداندارىندا تۇراقتى تۇرىپ جاتقان حالىق 500 مىڭنان اسىپ جىعىلادى.

ءيا، بار بولعانى 185 398 گەكتار نەمەسە 1,8 مىڭ شارشى شاقىرىم بولاتىن كىپ-كىشكەنتاي اۋماقتا تۇتاس سولتۇستىك قازاقستان، اتىراۋ، ماڭعىستاۋ، باتىس قازاقستان سەكىلدى وبلىستاردىڭ تۇرعىندارىمەن تەپە-تەڭ كەلەتىن حالىق تۇرىپ جاتىر.

ال كورشى شاردارا اۋدانىنىڭ اۋماعى – 13 مىڭ شارشى شاقىرىم، جالپى حالىق سانى 79,3 مىڭ ادام.

قازىرگى ماقتاارال اۋدانىنىڭ ورتالىعى مىرزاكەنت كەنتىنەن شىمكەنتكە دەيىنگى قاشىقتىق – 250 شاقىرىم.

ال تۇركىستان قالاسى شىمكەنتتەن 170 شاقىرىم قاشىقتىقتا ورنالاسقان.

ءمىرزاشول حالقى تۇركىستان وبلىسىنىڭ جاڭا اكىمشىلىك ورتالىعىنا جەتۋ ءۇشىن 420 شاقىرىمنان استام جول جۇرۋىنە تۋرا كەلىپ وتىر.

مىنە، وسى ءمىرزاشول مەن شاردارانىڭ حالقى بۇعان دەيىن دە وڭتۇستىكتەگى بۇرىنعى وبلىس ورتالىعى – شىمكەنت شاھارىنان قاشىقتا جاتقان ەدى.

بۇعان دەيىن دە ماقتاارال مەن جەتىساي ءوڭىرىنىڭ ساناۋلى بايشىكەشتەرى تويحانا تۇرعىزۋ مەن توي وتكىزۋدەن الدىنا جان سالماي كەلگەنىمەن، ءمىرزاشولدىڭ قاراپايىم قارا حالقى ءبىلىم مەن عىلىم سەكىلدى وركەنيەتتى دامۋ جولىنان الىستا قالىپ كەلە جاتقانىن كىمنەن جاسىرامىز؟!

ءيا، ماقتاارال مەن جەتىسايدا ساۋساقپەن سانارلىقتاي عانا شىرىگەن بايلار مەن ولاردىڭ حان سارايىنداي ءزاۋلىم-ءزاۋلىم تويحانالارى دا بارشىلىق.

الايدا تويحانا – كىتاپحانا، مەكتەپ، كوللەدج، ۋنيۆەرسيتەت، عىلىمي-زەرتتەۋ ينستيتۋتى ەمەس قوي!

ەندى وبلىس ورتالىعى شىمكەنتتەن تۇركىستانعا كوشىرىلگەن سوڭ مىرزاشولدىكتەر مەن شاردارالىقتار وركەنيەتتەن ءتىپتى الىستايتىن بولدى!

نەسىن جاسىرامىز، وبلىس ورتالىعىنان الىستاپ كەتۋ دەگەن ءسوز – وركەنيەتتى دامىپ-وسۋدەن الىستاپ كەتۋ دەگەن ءسوز!

قازاقتىڭ ءمىرزاشول ءوڭىرىن وڭتۇستىك، شىعىس جانە باتىس جاعىنان وزبەكستان قورشاپ تۇر.

ارمەن قاراي تاجىكستان، ودان ارى كۇن سايىن، ساعات سايىن اتىس-شابىس، جارىلىس پەن سوعىستان كوز اشپاي وتىرعان اۋعانستان جەرى ءتيىپ تۇر.

رەسمي مالىمەتتەر بويىنشا ماقتاارال جانە جەتىساي اۋداندارى وبلىستاعى حالقى تىعىز شوعىرلانعان جانە دەموگرافيالىق ءوسىمى جاعىنان جوعارى اۋدان سانالادى. مۇنداعى جالپى حالىق سانى 304 684 ادامدى قۇراپ وتىر. اۋدان 182 ەلدى مەكەننەن، 1 قالا، 3 كەنت جانە 20 اۋىلدىق وكرۋگىنەن قۇرالعان.

ماقتاارال جانە جەتىساي اۋداندارى حالقىنىڭ ۇلت بويىنشا سانى – قازاقتار: 253 444 ادام – 83,2%; ورىستار: 4 418 ادام – 1,5%; وزبەكتەر: 11 850 ادام – 3,9%; تاجىكتەر: 25 883 ادام – 8,5%; باسقا دا ۇلتتار: 8 847 ادام – 2,9%.

ال سارىاعاش جانە كەلەس اۋداندارىندا بۇگىندە 326 915 حالىق تۇرادى. اۋدان اۋماعى 762203 گەكتار، 154 ەلدى مەكەنى، 1 قالا، 1 كەنت جانە 23 اۋىلدىق وكرۋگىنەن قۇرالعان.

سارىاعاش جانە كەلەس اۋداندارىنىڭ حالقى دا كوپ ۇلتتى، باسىم كوپشىلىگى قازاقتار (86,9%), ودان باسقا وزبەكتەر (4,1%), تاجىكتەر (2,7%), ازەربايجاندار (1,2%), ورىستار (1,1%), تاتارلار (0,9%), ت.ب. ۇلت وكىلدەرى تۇرادى.

2015 جىلدىڭ اقپان ايىندا سارىاعاش اۋدانىندا، 2016 جىلدىڭ تامىز ايىندا ماقتاارال اۋدانىندا جەرگىلىكتى قازاقتار مەن تاجىكتەر اراسىنداعى ۇلتارالىق قاقتىعىستار نەگىزىندە تارتىپسىزدىكتەر ورىن العانى بەلگىلى.

كەيبىرەۋلەرگە ۇناماسا دا، اششى بولسا دا، اشىق ايتۋعا تۋرا كەلىپ وتىر – كەيىنگى كەزدە ءمىرزاشول وڭىرىندەگى جەرگىلىكتى قازاق ۇلتىنىڭ ۇلەس سالماعى بارىنشا كۇرت ازايىپ بارا جاتقانى بايقالادى!

بىزدىڭشە، بۇل ماسەلەنى شەشۋدىڭ جالعىز عانا جولى بار.

مىرزاشولدەگى 500 مىڭ حالىقتى الەۋمەتتىك-ەكونوميكالىق جاعىنان دامىتۋ ءۇشىن ماقتاارال، جەتىساي، شاردارا جانە وعان ىرگەلەس جاتقان باسقا دا قالا، اۋدانداردىڭ نەگىزىندە ەلىمىزدىڭ 15-ءشى وبلىسىن – وڭتۇستىك قازاقستان وبلىسىن قۇرۋ كەرەك!

الداعى اپتادا ەلباسىمىز نۇرسۇلتان نازارباەۆ جۇمىس ساپارىمەن تۇركىستان وبلىسىنا جانە شىمكەنت قالاسىنا بارادى.

جوعارى لاۋازىمدى قىزمەتتە جۇرگەن ازاماتتار ءمىرزاشول وڭىرىندەگى 500 مىڭ حالىقتىڭ جانايقايىن مەملەكەتىمىزدىڭ باسشىسىنا بۇرمالاماي، اينا قاتەسىز، ءدال جەتكىزۋى ءتيىس!

قىسقاسى، تۇركىستاندى قازاقتاندىرامىز دەپ ءجۇرىپ، ماقتاارال مەن جەتىسايدىڭ قاراپايىم قارا حالقىن «شالاقازاقتاندىرىپ»، ءمىرزاشولىمىزدى ەكىنشى تاۋلى قاراباققا اينالدىرىپ الىپ جۇرمەيىك!

قورىتا ايتقاندا، قازىرگى كۇردەلى حالىقارالىق جاعدايدا، وزبەكستان مەن تاجىكستاننىڭ، ارى قاراي اۋعانستاننىڭ ءيىن تىرەسكەن تۇسىندا، اۋماعى جاعىنان بار بولعانى 176 مىڭ گەكتار عانا بولاتىن كىپ-كىشكەنتاي جەردە 500 مىڭنان استام حالىق تۇرىپ جاتقان، تۇرعىندارىنىڭ سانى جاعىنان تۇتاس ءبىر وبلىسقا ساي كەلەتىن ءمىرزاشول ءوڭىرى حالقىنىڭ ەلىمىز بويىنشا ەرەكشە مەملەكەتتىك ماڭىزى بار ءىرى ەكونوميكالىق جانە مادەني ورتالىقتارىنان وتە الىس تۇكپىردە قالىپ قويۋى ايرىقشا الاڭداتىپ وتىر!

ارينە، ءدال بۇگىن-ەرتەڭ جاڭا وبلىستىڭ اشىلا قويۋى وتە قيىن ەكەنىن جاقسى تۇسىنەمىز.

بىراق الداعى بەس-ون جىلدا ءمىرزاشول مەن شاردارا وڭىرىندە قازاقستاننىڭ جاڭا وبلىسى ءبارىبىر قۇرىلۋى ءتيىس!

ءمىرزاشول مەن شاردارانى تۇكپىردە قالدىرما، ۇكىمەت!

 

مىرزانتاي قوجابايۇلى جاقىپ،

ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى تەلەراديو جانە قوعاممەن بايلانىس كافەدراسىنىڭ دوتسەنتى (of Associate Professor), فيلولوگيا عىلىمدارىنىڭ كانديداتى (PhD), «زەرتتەۋشى» رەسپۋبليكالىق عىلىمي-ءبىلىم بەرۋ ورتالىعى» مەكەمەسىنىڭ ديرەكتورى.

استانا قالاسى.

2018 جىلعى 26 قىركۇيەك.

 

4 پىكىر