ەلوردالىق «استانا» فۋتبول كلۋبى بيىل ءتورتىنشى جىل قاتارىنان ەۋروكۋبوكتىق تۋرنيرلەردىڭ توپتىق كەزەڭىندە ونەر كورسەتكەلى وتىر.

2015/16 جىلعى ماۋسىمدا قارت قۇرلىقتىڭ ءباسى ەڭ بيىك باسەكەسى - چەمپيوندار ليگاسىندا باق سىناعان ەلوردالىقتار، ودان كەيىنگى ەكى جىلدا ەۋروپا ليگاسىنىڭ توپتىق كەزەڭىندە دوپ تەپتى. وتكەن ماۋسىمدا ەۋروپا ليگاسىنىڭ پلەي-وفف كەزەڭىنە جولداما الىپ، قازاق فۋتبولىنا اتاسىندا كورمەگەندى بوتاسىندا كورسەتكەنى بار.

ال بيىل ءۇشىنشى جىل قاتارىنان ەۋروپا ليگاسىنا جورىق جاساپ كورمەك. ىرىكتەۋدى چەمپيوندار ليگاسىنان باستاعان ەل چەمپيوندارى ىرىكتەۋ كەزەڭىنىڭ ءۇشىنشى اينالىمىندا حورۆاتيانىڭ «ديناموسىنا» ەسە جىبەردى. ال ەۋروپا ليگاسى ىتىكتەۋ كەزەڭىنىڭ پلەي-وفف ساتىسىندا كيپرلىك اپوەل كومانداسىن جارىس جولىنان شىعاردى.

ەۋروپادا ءتورت جىل بويى جيعان ۇپايلارىنىڭ ارقاسىندا «استانا» جەرەبە تارتۋ بارىسىندا ەكىنشى سەبەتكە ورنالاستى. ەكىنشى سەبەتتە بولعانى ءۇشىن توپتاعى ءتورت كوماندانىڭ بىرەۋى عانا وزىنەن مىقتى بولۋى مۇمكىن ەدى . الايدا، جەرەبە بويىنشا ك توبىنا تۇسكەن ەلوردالىقتارعا ءبىر ەمەس ەكى ازۋلى قارسىلاس تاپ بولدى. ولار - كيەۆتىك «دينامو» مەن فرانتسيالىق «رەنن». ال بۇل ەكەۋىنىڭ قاسىندا چەحيالىق «يابلونەتس» دەڭگەيى ءسال تومەن كوماندا سانالادى.

ەندى وسى اپتا ءبىز ءسوز ەتىپ وتىرعان ءتۋرنيردىڭ تۇساۋى كەسىلەدى. «استانا» جاڭا ماۋسىمداعى العاشقى ويىنىن ۋكراينا استاناسىندا وتكىزەدى. 20 قىركۇيەك كۇنى كيەۆ قالاسىندا جەرگىلىكتى «دينامومەن» كۇش سىناسادى. كەزىندە كەڭەس فۋتبولىنىڭ ۇزدىگى بولعان داڭىقتى «ديناموعا» قارسى ماتچ تارتىسقا تولى بولادى دەپ ويلايمىز. گريگوري بابايان باستاعان ءبىزدىڭ جىگىتتەر جەڭىسكە جەتپەسە دە، جاقسى ونەر كورسەتىپ قايتار دەگەن ءۇمىت بار.

Abai.kz