الماتىعا جاقىندا قوسىلعان ناۋرىزباي اۋدانىندا 1200 ورىندى جاڭا مەملەكەتتىك مەكتەپ اشىلدى، - دەپ حابارلايدى اباي-اقپارات الماتى اكىمىنىڭ سايتىنا سىلتەمە جاساپ.

مۇندا ەرەكشە ءبىلىمدى قاجەت ەتەتىن بالالاردىڭ تەرەڭ ءارى ساپالى ءدارىس الۋلارى ءۇشىن بارلىق جاعدايلار جاسالعان. قالا اكىمى باۋىرجان بايبەك تاياۋدا عانا پايدالانۋعا بەرىلگەن 1200 ورىندى مەكتەپتىڭ وقۋشىلارىمەن جانە ولاردىڭ اتا- انالارىمەن كەزدەستى.

جاڭا وقۋ ورنىندا روبوت تەحنيكالارى كابينەتتەرى، فيزيكا مەن حيميانىڭ ارنايى سىنىپتارى، اتا – انالاردىڭ قوناق بولمەلەرى، ويىن الاڭدارى جانە باسقالارى بار. مۇندا سەيسميكالىق قاۋىپسىزدىككە ەرەكشە ءمان بەرىلگەن، سوندىقتان بارلىق جابدىقتار مەن مەكتەپ جيھازدارى قابىرعالارعا مىقتاپ بەكىتىلگەن.

مەكتەپ عيماراتى تاكتيلدى جولمەن، سوقىر جانە ارنايى شىراقتاردىڭ وزىمەن ارەڭ كورەتىن بالالار ءۇشىن ءبرايلدىڭ رەلەفتى- نۇكتەلى شريفتەرى ارقىلى ءدارىس بەرەتىن سىنىپتارمەن، ارنايى سانيتارلىق بولمەلەرمەن جانە شاقىرۋ نۇكتەلەرىمەن تولىق قامتاماسىز ەتىلگەن.

«بارىنشا قولايلى جانە جاقسى مەكتەپ. اربامەن جۇرۋدە ەش كەدەرگى بولماۋ ءۇشىن ليفت جۇمىس ىستەيدى. ءبىز وسىدان ءتورت جىل بۇرىن قىتايدان تۋعان وتانىمىزعا ورالعان بولاتىنبىز. وكىنىشكە وراي، مەنىڭ ءزارۋىم سىندى بالالاردىڭ وندا ءبىلىم الۋلارىنا ەش مۇمكىندىك جاسالماعان. مەن تۋعان ەلىمە ورالۋدى، قىزىمنىڭ قازاقستاندا ءبىلىم الۋىن ارماندادىم. مەملەكەت باسشىسىنا راحمەت، ەلىمىزدە بالالاردىڭ ءبىلىم الۋى ءۇشىن بارلىق جاعدايلار قاراستىرىلعان، جات جۇرتتان كەلسەك تە ءبىزدى ەشكىم وزگەلەردەن بولگەن جوق، قايتا قۇشاقتارىن اشتى. ارمانىم، قىزىمنىڭ ءوز اياعىمەن تىك تۇرۋى»، - دەدى ءبىرىنشى سىنىپ وقۋشىسى مولداسان گۇلبىبىنىڭ اناسى.

ءبىرىنشى سىنىپ وقۋشىسىنىڭ ءوزى جاڭا مەكتەپتىڭ ۇنايتىنىن جانە سىنىپتاستارىمەن تانىسقانىن ايتتى.

بۇگىن 240 مىڭنان استام الماتىلىق وقۋشىلار ءۇشىن العاشقى قوڭىراۋ سوعىلدى، ولاردىڭ 25 مىڭى - ءبىرىنشى سىنىپتىقتار. ءدال وسى كۇنى الماتىدا 2300 ورىندى تاعى جاڭا ءتورت مەكتەپ ەسىكتەرىن ايقارا اشتى.

ەسكە سالساق، الماتىدا بيىلعى جىلى ءبىلىم وشاقتارىن سالۋ مەن كۇردەلى جوندەۋدەن وتكىزۋگە 17 ملرد. تەڭگەدەن استام قارجى ءبولىندى.

1840 ورىندى 9 مەملەكەتتىك بالا باقشا قۇرىلىسى جۇرۋدە.جاڭا وقۋ جىلىندا 840 ورىندى تاعى 4 مەملەكەتتىك بالا باقشانىڭ قۇرىلىسى باستالادى.

№26 مەكتەپتىڭ ەسكى عيماراتى جاڭاردى. 90 ورىندى كوررەكتسيالىق بالا باقشا اشىلدى. الاتاۋ اۋدانىنداعى №151 مەكتەپ جانىنان سالىنعان 600 ورىندى قوسالقى نىسان پايدالانۋعا بەرىلدى.وقۋ جىلىنىڭ ەكىنشى توقسانىنىڭ باسىندا مۇندا 600 ورىندى مەكتەپ پەن №184, 185 مەكتەپتەر جانىنان ارقايسىسى 400 ورىندى قوسالقى نىساندار اشىلاتىن بولادى.

ەلباسىنىڭ «بەس الەۋمەتتىك باستاماسى» اياسىندا الماتىدا تاياۋداعى ءۇش جىل ىشىندە 37 جاتاقحانا سالىنادى.قازىردىڭ وزىندە 4 مىڭ ورىندى 7 جاتاقحانا قۇرىلىستارى باستالدى. ولاردىڭ تورتەۋى بيىلعى جىلى پايدالانۋعا بەرىلەدى.

Abai.kz