2019 جىلدان باستاپ سىرتتاي وقۋ فورماسى توقتاتىلادى. بۇل تۋرالى ءبىلىم جانە عىلىم ءمينيسترى  ەرلان ساعاديەۆ dialog.egov.kz پلاتفورماسىندا مالىمدەدى، دەپ حابارلايدى  ازاتتىق راديوسى

"4 شىلدەدە ۋنيۆەرسيتەتتەردىڭ دەربەستىگىن ارتتىراتىن زاڭ قابىلدانعان. وسى زاڭعا ساي، 2019 جىلدىڭ 1 قاڭتارىنان باستاپ سىرتتاي وقۋعا قۇجات قابىلدانبايدى. ال قازىر سىرتتاي وقىپ جاتقان ستۋدەنتتەر وقۋىن اياقتايدى" دەپ جازىلعان.
"بۇل زاڭعا ساي ءبىلىم باعدارلاماسىن يگەرۋ ءۇشىن ستۋدەنتتەرگە ناقتى ءبىر ۋاقىت بەرىلمەيدى. جوعارى وقۋ ورىندارى ءبىلىم ۇلگەرىمىنىڭ ناتيجەسىنە قاراي ستۋدەنتتەردىڭ باكالاۆردى ۋاقىتىنان بۇرىن بىتىرۋگە مۇمكىندىك بەرەتىن ىڭعايلى باعدارلاما جاسايدى. زاڭدا ۋنيۆەرسيتەتتەردەگى وقۋ اقىسىن رەتتەيتىن نورمانى الىپ تاستاۋ قاراستىرىلعان" دەيدى ساعاديەۆ.

1 تامىزدا قازاقستاندا ءبىلىم گرانتتارىن تاعايىنداۋ كوميسسياسى جۇمىسىن باستاعان. مينيسترلىكتىڭ دەرەگىنشە، بيىل قازاقستان ءبىرىنشى كۋرس ستۋدەنتتەرىن قابىلداۋ ءۇشىن 51 مىڭعا جۋىق گرانت بولگەن.

Abai.kz