بالتابەك بايسۇلتانۇلىنىڭ زيراتى اياگوز بەن ءۇرجار اۋداندارىنىڭ شەكاراسىندا ورنالاسقان. 100 جىلعا جۋىق كۇننىڭ كوزى مەن جەلدىڭ وتىنە توتەپ بەرىپ كەلە جاتقان شيكى كىرپىشتەن قالانعان كۇمبەزدى زيراتتىڭ قابىرعاسى قازىر جارىلىپ، كەتەۋى كەتىپ بارادى، دەپ حابارلايدى Baq.kz اقپارات اگەنتتىگى altaynews.kz سايتىنا سىلتەمە جاساپ.

سەمىز نايماننىڭ قوجان رۋىنان شىققان ايگىلى بالتابەك باتىر، قاجى، ەتنوگراف، شەجىرەشى ەدى. جاديتشە دە، قادىمشا دا وقىعان ول ءبىلىم ىزدەپ، ەكى-ءۇش جىل شىعىستا دا بولادى. 1910-13 جىلدار ارالىعىندا مەككە، مادينە،ستامبۋل، كاير، باعدات ساپارلارىنان قولجازبا جازعان. ونىڭ ەڭبەكتەرىنە مۇحتار اۋەزوۆ، ءسابيت مۇقانوۆ، الكەي مارعۇلاندار ەرەكشە نازار اۋدارىپ،1950 جىلدارى ەل ادامدارىنا حات جازعان. 1921 جىلى جازدا يۆانوۆ، سادوۆسكي، گرابوۆسكي، بريۋحانوۆ، قاناي بورامباەۆ دەگەندەردىڭ «سوۆەت وكىمەتىنىڭ جاۋى، ۇلتشىل»، – دەگەن ۇيعارىمىمەن سوتسىز، تەرگەۋسىز اتىلعان. سۇيەگىن ەل جىگىتتەرى ءتۇن ىشىندە ۇرلاپ الىپ شىعارىپ، اي وزەنى بويىنا جەرلەگەن كورىنەدى.

ءبىر تاڭقالارلىعى، زيرات-كەسەنە قازاقستانداعى شيكى كىرپىشتەن قالانعان ەڭ بيىك مەموريالدىق قۇرىلىس. كەسەنەنىڭ بيىكتىگى 16,1, ديامەترى 9,30 مەتر. قۇرىلىس تاس تۇعىردىڭ ۇستىنە سالىنعان. ءدال توبەسىندە ۇلكەن شىنى تاباقتىڭ ورنى ۇڭىرەيىپ تۇر. جەرگىلىكتى جۇرتتىڭ ايتۋى بويىنشا، 70-ءشى جىلدارى ونى الدەكىمدەر كۇمىس تاباق دەگەن دامەمەن اتىپ ءتۇسىرىپتى…

بالتابەك بايسۇلتانۇلى 1860 جىلى دۇنيەگە كەلگەن، 1916 جىلعى ۇلت-ازاتتىق كوتەرىلىستىڭ وسى وڭىردەگى باسشىسى. ابدىعاپار حان مەن كەيكى باتىردىڭ تورعايدان جەتىسۋعا كەلگەن ەلشىلەرىن بالقاش كولىنىڭ جاعاسىندا قابىلداعان ادام. بالتابەك پاتشا تۇرمەسىنەن 1917 جىلى ناۋرىز ايىندا بوساپ، ارادا ءتورت جىل وتكەننەن كەيىن 1921 جىلى قىزىلداردىڭ قولىنان قازا تابادى.