الماتىدا دەنيس تەندى ءولتىردى دەگەن كۇدىكتىنىڭ ەسىمى بەلگىلى بولدى، - دەپ حابارلايدى اباي-اقپارات.

الماتى قالالىق پروكۋراتۋراسىنىڭ مالىمەتىنشە، ول قىلمىسىن تولىق مويىنداعان. ۇستالعان كۇدىكتىنىڭ اتى-ءجونى - قياسوۆ نۇرالى داۋلەتبەكۇلى. كۇدىكتى 1994 جىلى جامبىل وبلىسىندا دۇنيەگە كەلگەن. قازىرگى ۋاقىتتا ول ۋاقىتشا ۇستاۋ يزولياتورىنا قامالدى.

ۇستالعان كۇدىكتىگە قاتىستى سوتقا دەيىنگى تەرگەۋ قر قك 99 بابى 2 بولىگى بويىنشا ءجۇرىپ جاتىر.

قازىر دەنيس تەننىڭ ولىمىنە قاتىسى بار دەگەن كۇدىكپەن قىزىلوردا وبلىسىنىڭ تۋماسى، 1994 جىلى دۇنيەگە كەلگەن قۇدايبەرگەنوۆ ارمان بۋريباەۆيچ (قۇجاتىندا وسىلاي كورسەتىلگەن) ىزدەستىرىلىپ جاتىر.

بەلگىلەرى: بويى 165-170 سانتيمەتر، ارىقتاۋ كەلگەن. ۇستىندە قارا جەيدە، سۇر ءتۇستى دجينس، قارا ءتۇستى اياقكيىم بولعان. كۇننەن قورعايتىن كوزىلدىرىك كيىپ العان.

ىشكى ىستەر مينيسترىلىگىنىڭ وكىلدەرى قانداي دا ءبىر مالىمەت بىلەتىندەردەن الماتى قالالىق ءىىد-نە حابارلاسۋدى سۇرايدى: 8 (7272) 54-40-42, 54-40-18, 54-41-00, 54-43-66 نەمەسە 102.

Abai.kz