«نۇر وتان» پارتياسى مۇمكىندىگى شەكتەۋلى جانداردىڭ ءومىر ءسۇرۋ ساپاسىن جاقسارتۋعا باعىتتالعان «كەدەرگىسىز كەلەشەك» پارتيالىق جوباسىن ودان ءارى جانداندىرىپ، تيىمدىلىگىن ارتتىرا تۇسۋدە. جوبانى جۇزەگە اسىرۋ بارىسىندا پارتيا ناقتى ءتورت باسىمدىققا ەرەكشە نازار اۋداراتىن بولادى.

بۇل تۋرالى استانا قالاسىنىڭ اكىمدىگىندە شاھارداعى مۇمكىندىگى شەكتەۋلى جاندارعا ارنالعان الەۋمەتتىك ينفراقۇرىلىم نىساندارىنىڭ قولجەتىمدىلىگىن تالقىلاعان ارنايى جيىندا پارتيا توراعاسىنىڭ ءبىرىنشى ورىنباسارى ماۋلەن اشىمباەۆ مالىمدەدى.

اتاپ ايتساق، پارتيا بىرىنشىدەن، مۇمكىندىگى شەكتەۋلى جاندارعا ارنالعان كەدەرگىسىز ورتا قالىپتاستىرۋعا، ەكىنشىدەن، ولاردىڭ ينكليۋزيۆتى ءبىلىم الۋلارىنا ىقپال ەتۋگە، ۇشىنشىدەن، جۇمىسقا ورنالاسۋلارىنا قولداۋ كورسەتۋگە جانە تورتىنشىدەن، وسى سالاعا قاتىستى زاڭنامالاردى ودان ءارى جەتىلدىرۋگە ەرەكشە ءمان بەرمەكشى. وسىلايشا پارتيا قۇر ستاتيستيكا ءۇشىن ەمەس، مۇمكىندىگى شەكتەۋلى جاندارعا ناقتى كومەك كورسەتۋدى كوزدەپ وتىر.

ءوز سوزىندە پارتيا توراعاسىنىڭ ءبىرىنشى ورىنباسارى ەلباسىنىڭ الدىمىزعا ەڭ دامىعان 30 ەلدىڭ قاتارىنا قوسىلۋدى باستى مىندەت ەتىپ قويعانىنا نازار اۋدارىپ، مۇنداي ماقساتقا قول جەتكىزۋ تەك ەكونوميكامەن عانا ولشەنبەيتىنىن ايتتى. سونىمەن بىرگە ءتيىمدى الەۋمەتتىك ماسەلەلەردىڭ وڭتايلى شەشىلۋى دە بۇل ماسەلەدە باستى تالاپتاردىڭ ءبىرى بولىپ سانالادى.

– الەمنىڭ ەڭ دامىعان ەلدەرىنىڭ قاتارىنا قوسىلۋ مەملەكەتتىڭ مۇمكىندىگى شەكتەۋلى جاندارعا جاساپ وتىرعان جاعدايىن، ياعني ءتيىستى جوعارى ستاندارتتار مەن ينفراقۇرىلىمداردى دا قاراستىرادى. ەگەر ونداي ازاماتتاردىڭ قوعامعا بەيىمدەلۋىنە، ساپالى ءبىلىم الۋىنا، جۇمىسپەن قامتىلۋىنا ءتيىستى جاعداي جاسالماعان بولسا، ول ەلدى دامىعان دەپ ايتۋ قيىن. سەبەبى، ءدال وسىنداي كورسەتكىشتەر ەلدىڭ دامۋ دەڭگەيىن انىقتاۋدا ماڭىزدى ءرول اتقارادى، – دەپ اتاپ ءوتتى ماۋلەن اشىمباەۆ.

ءوز كەزەگىندە استانا قالاسىنىڭ اكىمى اسەت يسەكەشەۆ وسى باعىتتا ەلوردادا اتقارىلىپ جاتقان جۇمىستار جايىن بايانداپ بەردى. سونداي-اق ەڭبەك جانە حالىقتى الەۋمەتتىك قورعاۋ مينيسترلىگى ەڭبەك كوميتەتى، الەۋمەتتىك قورعاۋ جانە كوشى-قون دەپارتامەنتى باسشىسىنىڭ ورىنباسارى ساۋلە ەگەمباەۆا مەن استانا قالاسىنىڭ ساۋلەت، قالا قۇرىلىسى جانە جەر قاتىناستارى باسقارماسىنىڭ باسشىسى باقتىباي تايتاليەۆ تە كوتەرىلگەن ماسەلە بويىنشا ىستەلگەن جۇمىستارعا توقتالىپ ءوتتى.

بۇدان باسقا، جيىن بارىسىندا «قازاقستان مۇگەدەكتەر كونفەدەراتسياسىنىڭ» اتقارۋشى ديرەكتورى ءمادينا يبراگيموۆا، «دوس» تاۋەلسىز ءومىر» مۇگەدەكتەر ورتالىعى قوعامدىق بىرلەستىگىنىڭ اتقارۋشى ديرەكتورى قارلىعاش تانابەكوۆا، «ELAMAN» الەۋمەتتىك يننوۆاتسيالىق جوبالار قورىنىڭ توراعاسى الماز ەرجان جانە تاعى باسقا بەلسەندى ازاماتتار ءسوز الىپ، ءوز ويلارىمەن ءبولىستى.

Abai.kz