ۇلتتىق تەستىلەۋ ورتالىعىنىڭ باسشىسى رامازان الىمقۇلوۆ ۇبت-داعى قىزىقتى وقيعالار تۋرالى باياندادى، - دەپ حابارلايدى قازاقپارات ءتىلشىسى.

ونىڭ ايتۋىنشا، ۇبت ءبىلىمدى عانا تەكسەرمەيدى، عاشىقتاردى دا تابىستىرادى.

«بىزگە جاقىندا مەرەي ەسىمدى استانالىق تۇلەك حابارلاستى. ول قاڭتار ايىندا «مەگا» ساۋدا ورتالىعىندا استاناعا قوناققا كەلگەن اراي ەسىمدى شىمكەنتتىك ارۋمەن تانىسقان. بىراق، ونىڭ بايلانىس ءنومىرىن الىپ ۇلگەرمەگەن جانە ارايدىڭ بيىل ۇبت تاپسىراتىنىن ءبىلىپ، ۇبت-نىڭ ونلاين ترانسلياتسياسى ارقىلى ونى تاپتى. سۇيىكتىسى سىناق تاپسىرعان ءپۋنتتى انىقتاعان بويدا، مەرەي بىزگە حابارلاسىپ، ونىڭ بايلانىس ءنومىرىن تابۋدا كومەك سۇرادى. كوردىڭىزدەر مە، ۇبت ءبىلىمدى عانا تەكسەرمەيدى، عاشىقتاردى دا قوسادى»، - دەدى رامازان الىمقۇلوۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.

ورتالىق باسشىسى استانالىق بوزبالانىڭ تىلەگىن جەرگە قالدىرماي، ارايدى ىزدەپ جاتقاندارىن حابارلادى.

«بىزدە قاي اۋديتوريادا كىمدەردىڭ تەست تاپسىرعانى تۋرالى اقپارات بار. تجك، جسن نومىرلەرى قولىمىزدا. اتالعان بولىمشەدە اراي ەسىمدى قانشا قىزدىڭ بولعانىن انىقتايمىز جانە اتى-ءجونى مەن بايلانىس ءنومىرىن كەلىسىم بويىنشا استانالىق جىگىتكە بەرە الامىز. بۇل بويىنشا جۇمىس ىستەپ جاتىرمىز. جاستارعا ساتتىلىك تىلەيمىز»، - دەدى ول.

Abai.kz