پروكۋراتۋرا اقپاراتىندا ماۋسىمنىڭ 17-ءى كۇنى جامبىل وبلىسىندا شۋ قالاسىنان 50 شاقىرىم قاشىقتىقتا 20 ۆاگون تىركەگەن "استانا-الماتى" باعىتىنداعى جولاۋشى پويىزىنىڭ سەگىز ۆاگونى تەمىرجولدان شىعىپ كەتىپ، ونىڭ ەكەۋى اۋناپ قالعانى ايتىلعان.
"الدىن الا مالىمەتتەر بويىنشا، 2006 جىلى تۋعان كامەلەتكە تولماعان بالا قازا بولعان. زارداپ شەككەن 11 ادامعا مەديتسينالىق كومەك كورسەتىلگەن. اپات سەبەپتەرى انىقتالىپ جاتىر", - دەلىنگەن رەسمي اقپاراتتا.
بۇعان دەيىن قازاقستان ىشكى ىستەر مينيسترلىگىنىڭ توتەنشە جاعدايلار جونىندەگى كوميتەتى جەكسەنبى كۇنى استانا-الماتى باعىتىنداعى №9 "بايتەرەك" جولاۋشىلار پويىزىنىڭ سەگىز ۆاگونى جامبىل وبلىسىندا تەمىرجولدان شىعىپ كەتكەنى تۋرالى حابارلاعان.
ء"بىر جەتكىنشەك وپات بولىپ، ءۇش ادامنىڭ زارداپ شەككەنى انىقتالدى", - دەگەن توتەنشە جاعدايلار جونىندەگى كوميتەتتىڭ رەسمي وكىلى رۋسلان يمانقۇلوۆ.
"قازاقستان تەمىرجولى" ۇلتتىق تەمىرجول كومپانياسى توتەنشە وقيعانىڭ سەبەبىن انىقتاۋ ءۇشىن ارنايى كوميسسيا قۇرىلىپ، تەكسەرۋ باستالعانى تۋرالى حابارلاعان.
Abai.kz
