كەشە استاناداعى ءنومىرى 77 مەكتەپتىڭ اتا-انالارى قازاق مەكتەبىندە ورىس سىنىپتارىن اشۋعا نارازىلىقتارىن ءبىلدىردى، - دەپ حابارلايدى اباي-اقپارات 31 ارناعا سىلتەمە جاساپ. نارازى توپ ەلورداداعى قازاق ءتىلى مەن ادەبيەتىن تەرەڭدەتىپ وقىتاتىن جالعىز ءبىلىم ورداسىنا ورىس ءتىلىنىڭ ارالاسۋىن قالامايمىز دەپ وتىر. 

وقۋ جىلى اياقتالىپ، وزگە اتا-انالار بالالارىمەن بىرگە دەمالىپ جۇرسە، ءبىر اپتادان بەرى استاناداعى ءنومىرى 77-ءشى مەكتەپتەن مازا قاشقان. گيمنازيادا ورىس ءتىلى سىنىپتارى اشىلادى دەگەندى ەستىگەندەر كۇندە جينالىس وتكىزىپ، قالا اكىمدىگىنىڭ تابالدىرىعىن توزدىرۋىمەن ءجۇر. قازاق ءتىلى مەن ادەبيەتىن تەرەڭدەتىپ وقىتاتىن مەكتەپكە ورىسشا وقيتىنداردى ارالاستىرۋ ۇرپاعىمىزدىڭ بولاشاعىنا قاۋىپ توندىرەدى دەيدى نارازى توپ. ويتكەنى، ونسىز دا انا تىلىنە شورقاق قالانىڭ بالالارى، ۇزىلىستە ورىسشا شۇلدىرلەپ كەتەدى دەپ قاۋىپتەنەدى.

ءتىلىمىز تەرەڭدەتىلىپ وقىتىلاتىن مەكتەپكە ورىس سىنىپتارىن كىرگىزۋگە باسشىلىق تا قارسى. الايدا، ءبىلىم باسقارماسىنان اۋىزشا بۇيرىق بەرىلىپ، ەلەكتروندى پوشتاعا حابارلاما كەلگەننەن كەيىن، باستاۋىشقا ورىسشا وقيتىنداردى قابىلداۋعا ءماجبۇر بولىپتى. قازىر ورىس سىنىبىنا وقۋعا 14 بالا وتىنىشتەرىن بەرىپ تە قويعان. ءبىلىم باسقارماسىنىڭ بۇل باستاماسىن مەكتەپ ۇجىمى دا تۇسىنبەي وتىر.

اتا-انالاردىڭ قارسىلىعىنان كەيىن ەلورداداعى 77-مەكتەپتە ورىس سىنىپتارىنا وقۋشى قابىلداۋ جۇمىسى توقتاتىلدى. ءبىلىم باسقارماسى بۇل داۋ قابىلداۋ كوميسسياسى مەن گيمنازيا باسشىلىعى اراسىنداعى تۇسىنبەۋشىلىكتەن تۋىنداعان دەپ وزدەرىن اقتاپ وتىر. تاعى ءبىر ايتا كەتەرلىگى، سوڭعى جىلدارى رەسمي ستاتيستيكا بويىنشا سۇرانىس ورىس ەمەس قازاق سىنىپتارىنا ارتىپتى.

گۇلبانۋ انياتقىزى، نۇركەن توقمۋرزين

Abai.kz