5-14 ماۋسىم، 2018 ج. گوري (گرۋزيا). قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن جاستار تەاترى 5 -14 ماۋسىمى ارالىعىندا گرۋزيا مەملەكەتىنىڭ گوري قالاسىندا وتەتىن حالىقارالىق كومەديا فەستيۆالىنە ۋ.شەكسپيردىڭ «اساۋعا تۇساۋ» قويىلىمىمەن قاتىسادى. سپەكتاكلدىڭ قويۋشى رەجيسسەرى – قازاقستاننىڭ ەڭبەك سىڭىرگەن قايراتكەرى نۇرقانات جاقىپباي. 

سپەكتاكل گرۋزيا مەملەكەتىنىڭ گوري قالاسىندا 2018 جىلدىڭ 6 ماۋسىمى كۇنى ساعات: 20.00 (گرۋزيا ۋاقىتى بويىنشا) جەرگىلىكتى حالىق پەن فەستيۆال قاتىسۋشىلارى نازارىنا ۇسىنىلادى.

ايتا كەتەيىك، گوري قالاسىندا بەسىنشى رەت وتكەلى تۇرعان حالىقارالىق كومەديالىق تەاتر فەستيۆالىنە قازاقستاندىق تەاتر ءبىرىنشى رەت قاتىسقالى تۇر.

حالىقارالىق، رەسپۋبليكالىق دەڭگەيدەگى فەستيۆالدەردىڭ بىرنەشە مارتە گران پري جۇلدەگەرى اتانىپ ۇلگەرگەن «اساۋعا تۇساۋ» قويىلىمى قازاق تەاتر ونەرىنىڭ كوركەمدىك كەڭىستىگىنەن الار ورنى ايرىقشا.

«اساۋعا تۇساۋ» - اساۋ قىزدى اۋىزدىقتاۋ ەمەس، كىرشىكسىز ماحابباتتى شىنايى تۇسىنۋدەن تۇراتىن ەرلى-زايىپتىلار اراسىنداعى ادال دوستىقتى جىر ەتەدى. ءسوزى وتكىر، ورمىنەزدى پەترۋچچيو مەن تاپقىر ءارى اقىلدى تەنتەك كاتارينا ەكەۋىنىڭ ءازىلدى قاقتىعىستارى قىز بەن جىگىتتىڭ ايتىسىنداي وتە تارتىمدى. ازىلقوي گرۋميو، جىلپوس ترانيو، جۇمساق مىنەزدى باپتيستا تاعى باسقا كەيىپكەرلەردىڭ مىنەز-قۇلقى جالىندى جاستاردىڭ اكتەرلىك شەبەرلىگىنە ۇلاسقاندا، ساحنا كوڭىلدى كورىنىستەرگە تولا تۇسەدى. جاراسىمدى قالجىڭىمەن باۋراپ، كوركەمدىك قۇدىرەتىمەن ەلىكتىرە تۇسەر شىعارما رەجيسسەردىڭ ۇتىمدى شەشىمىمەن ساحناعا شىقتى.

Abai.kz