دۇيسەنبى, 29 قاراشا 2021
2506 1 پىكىر 27 ءساۋىر, 2018 ساعات 08:53

بيلىك بەرەزوۆكا بالالارىنىڭ "توكسيننەن ۋلانعانىن" تەرىستەدى

باتىس قازاقستان وبلىسىنىڭ بەرەزوۆكا اۋىلىندا 2014 جىلدان بەرى بەلگىسىز جاعدايدا ەسىنەن تانىپ قۇلاپ قالاتىن اۋرۋعا تاپ بولعان بالالار تەكسەرىلدى، دارىگەرلەردىڭ باقىلاۋىندا جانە اۋرۋحاناعا جاتقىزۋ كەرەك ەمەس دەپ مالىمدەدى 26 ءساۋىر كۇنى باتىس قازاقستان وبلىستىق دەنساۋلىق ساقتاۋ باسقارماسى باستىعىنىڭ ورىنباسارى گۇلنار ءابدىراحمانوۆا.

ونىڭ سوزىنشە، 2017 جىلى ساۋىردە بەرەزوۆكالىق بالالاردى رەسپۋبليكالىق مەديتسينالىق ورتالىقتىڭ دارىگەرلەرى مەن پروفەسسورلارى تەكسەرىپ، ۋلانۋعا قاتىسى جوق دياگنوز قويعان.

- بارلىق بالا تەكسەرۋدەن ءوتتى، ولارعا ءتۇرلى دياگنوز قويىلدى. باقىلاۋدا بولسىن دەگەن ۇسىنىس جاسالدى. وسى ۋاقىت ىشىندە جەدەل تۇردە اۋرۋحاناعا جاتقىزىلعان جوق، - دەگەن ءابدىراحمانوۆا بالالارعا قويىلعان دياگنوزداردىڭ ءبىرى "ۆەگەتاتيۆتىك قان تامىرى ديستونياسى" ەكەنىن ايتتى.

24 ساۋىردە الماتىدا وتكەن ءباسپاسوز ءماسليحاتىندا Crude Accountability حالىقارالىق ەكولوگيالىق قۇقىق قورعاۋ ۇيىمىنىڭ وكىلى ءارى "بالالار، الدە مۇناي؟" كواليتسياسىنىڭ ۇيلەستىرۋشىسى سەرگەي سوليانيك بەرەزوۆكالىق ەكى بالاعا رەسەيلىك دارىگەرلەر "ميدىڭ توكسيننەن ۋلانۋى" دەگەن دياگنوز قويىلعانىن حابارلاعان.

2014 جىلعى قاراشادا بەرەزوۆكا كەنتىندە 26 وقۋشى ۋلانىپ، بالالار ءجيى تالىپ قالاتىن بولعان. رەسمي دەرەككە سايكەس، بالالاردىڭ جاپپاي تالۋىنا مەكتەپتىڭ جىلۋ قازاندىعىنان بولىنگەن گاز سەبەپ بولعان. زارداپ شەككەن بالالاردىڭ اتا-انالارى جاپپاي ۋلانۋ سەبەبىن اۋىل ىرگەسىندەگى تابيعي گاز وندىرەتىن قاراشىعاناق كەنىشىنەن تاراعان ۋلى گازبەن بايلانىستىرادى.

Abai.kz

1 پىكىر