سارسەنبى, 18 مامىر 2022
ادەبيەت 3741 1 پىكىر 25 ءساۋىر, 2018 ساعات 15:24

«جەتىسۋدىڭ كوكتەمى» كەلدى

 

تالدىقورعان قالاسىندا جاس ادەبيەتشىلەردىڭ «جەتىسۋ كوكتەمى» فورۋمى وبلىستىق تىلدەردى دامىتۋ باسقارماسىنىڭ ۇيىمداستىرۋىمەن، قازاقستان جازۋشىلار وداعىمەن بىرلەسە وتىرىپ وتكىزىلدى، دەپ حابارلايدى الماتى وبلىسى اكىمىنىڭ ءباسپاسوز قىزمەتى.

فورۋم بارىسىندا «رۋحاني جاڭعىرۋ» باعدارلاماسىنىڭ شەڭبەرىندە وتكىزىلگەن «ماڭگىلىك ەلدىڭ مۇراتى» اتتى وبلىستىق بايقاۋدىڭ جەڭىمپازدارى ماراپاتتالىپ، جەڭىمپازدارعا «اق قاۋىرسىن» ادەبي جۇلدەسى تاپسىرىلدى. «رۋح» بايقاۋىنىڭ قورىتىندىسى بويىنشا جارىققا شىققان كىتاپتاردىڭ تۇساۋى كەسىلدى. وسى باسقوسۋدا جازۋشىلار وداعىنا مۇشەلىككە ءبىر توپ قالامگەر سالتاناتتى جاعدايدا قابىلداندى.

رەسپۋبليكامىزدىڭ ءار وڭىرىنەن كەلگەن قالامگەرلەرگە قۇتتىقتاۋ تىلەگىن جەتكىزگەن وبلىس اكىمىنىڭ ورىنباسارى جاقسىلىق ومار:

- ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا ايتىلعان ۇلتتىق سانانى جاڭعىرتۋ يدەياسىنىڭ ءتۇپ تامىرى – تىلدە، ادەبيەتتە، مادەنيەتتە جاتىر. سوندىقتان باعدارلاما اياسىندا الماتى وبلىسىندا ءبىر جىلدان بەرى 8 مىڭنان استام شارا وتكىزىلىپ، 200 جوبا جۇزەگە اسىرىلۋدا. وبلىس اكىمى اماندىق باتالوۆتىڭ قولداۋىمەن بىلتىر ءبىر مەزەتتە 39 كىتاپ جارىققا شىعىپ، وقىرمانعا جول تارتتى. الداعى ۋاقىتتا وبلىستاعى بارلىق اۋىلدىق مادەنيەت ۇيلەرىن جاڭعىرتىپ، جاڭارتاتىن بولامىز. سونىمەن قاتار ادەبي بايقاۋلاردىڭ، شىعارماشىلىق شارالاردىڭ دا ماڭىزى زور. بۇگىنگى فورۋمعا وبلىستىڭ، رەسپۋبليكانىڭ ءار وڭىرىنەن تالانتتى جاستار جينالىپ وتىر. فورۋمعا قاتىسۋشىلاردى وسىناۋ ايتۋلى شارامەن شىن جۇرەكتەن قۇتتىقتاپ، بارشاڭىزعا شىعارماشىلىق شابىت تىلەيمىن! – دەدى.

مۇنان سوڭ قازاقستان جازۋشىلار وداعىنىڭ توراعاسى ۇلىقبەك ەسداۋلەت ءسوز الىپ، وبلىستىڭ ادەبيەتتى قولداۋداعى يگى باستاماسىنا ريزاشىلىعىن ءبىلدىردى. سونداي-اق اقىندار - جازۋشىلار وداعىنىڭ وبلىستىق فيليالىنىڭ ديرەكتورى ەرلان ءجۇنىس، وبلىستىق «جەتىسۋ» گازەتىنىڭ باس رەداكتورى امىرە ءارىن، بەلگىلى اقىندار قالقامان سارين، باقىتگۇل باباش، جاس دارىن مۇحتار كۇمىسبەك ىزگى تىلەكتەرىن جەتكىزدى.

فورۋم جۇمىسى مۇنان ءارى «رۋح» بايگەسىنىڭ قورىتىندىسى بويىنشا جارىق كورگەن كىتاپتاردىڭ تۇساۋكەسەرىمەن جالعاستى.

شارادا «رۋحاني جاڭعىرۋ» باعدارلاماسى اياسىندا وتكەن «ماڭگىلىك ەلدىڭ مۇراتى» اتتى وبلىستىق بايقاۋدىڭ قورىتىندىسى جاريا ەتىلدى. ماراپاتتاۋ ءراسىمىن وبلىس اكىمىنىڭ ورىنباسارى جاقسىلىق ومار اتقاردى.

پوەزيا جانرى بويىنشا ءى ورىندى «شابىت» حالىقارالىق شىعارماشىل جاستار فەستيۆالىنىڭ جۇلدەگەرى، مەملەكەتتىك گرانت يەگەرى ساعىنىش نامازشاموۆا يەلەنسە، پروزادا ءى ورىن جاس جازۋشى، «دارابوز» بايگەسىنىڭ جۇلدەگەرى قانات ابىلقايىرعا بەرىلدى. قوس جەڭىمپازعا وبلىس اكىمىنىڭ «اق قاۋىرسىن» ادەبي جۇلدەسى، اقشالاي سىيلىقتار مەن ديپلومدار تابىستالدى.

پوەزيا بويىنشا ءىى ورىندى ەرلان ءجۇنىس پەن ارشىن نۇرباقىت، ءىىى ورىندى قوزىباي قۇرمان مەن مۇحتار كۇمىسبەك يەلەندى.

پروزا جانرىندا ءىى ورىندى ەسبولات ايدابوسىن جانە گۇلجان امانگەلدىقىزى، ءىىى ورىندى اسحات ءومىرباي مەن داناگۇل بەرەكەت الدى. جۇلدەگەرلەردىڭ بارلىعىنا اقشالاي سىيلىقتار مەن ديپلومدار بەرىلدى.

وسى جيىن بارىسىندا قازاقستان جازۋشىلار وداعىنىڭ توراعاسى ۇلىقبەك ەسداۋلەت وداق مۇشەلىگىنىڭ قاتارىنا قابىلدانعان جاستارعا سالتاناتتى جاعدايدا كۋالىك تاپسىردى. مۇشەلىككە قابىلدانعانداردىڭ اراسىندا الماتى، اتىراۋ وبلىستارىنىڭ، استانا جانە الماتى قالالارىنىڭ جاستارى بار.

اتاپ وتسەك، ەكى كۇنگە سوزىلعان «جەتىسۋ كوكتەمى» وبلىستىق فورۋمى اياسىندا جاس قالامگەرلەر قاراساي اۋدانىنداعى پرەزيدەنتتىڭ «اتامەكەن» تاريحي-مادەني ورتالىعىن، «باتىر بابالار» مەموريالى مەن «اناعا قۇرمەت» مۋزەيىن، كەربۇلاق اۋدانىندا شوقان ءۋاليحانوۆتىڭ مەموريالدىق مۋزەيىن ارالادى. سول سياقتى تالدىقورعان قالاسىنداعى قاراتال وزەنىنىڭ جاعالاۋىندا پوەزيا كەشىن وتكىزىپ، ءسۇيىنباي، مۇقاعالي ەسكەرتكىشتەرىنە گۇل شوقتارىن قويدى. سونداي-اق ءتىل سارايىندا ادەبيەتتىڭ سان سالالى تاقىرىپتارىن تالقىلاعان سەكتسيالىق جۇمىستار ۇيىمداستىرىلعانىن ايتا كەتۋ كەرەك.

«ماڭگىلىك ەلدىڭ مۇراتى» وبلىستىق بايقاۋىنا قىسقاشا توقتالساق، بايقاۋعا جاس قالامگەرلەر بۇركەنشىك اتپەن قاتىستى. پوەزيادا «رۋحاني جاڭعىرۋ» تاقىرىبى، جەتىسۋ ولكەسىنىڭ تاماشا تابيعاتى جانە ەركىن تاقىرىپ ۇسىنىلسا، پروزادا تۋعان ولكەگە ارنالعان تۋىندىلار قابىلدانعان.

Abai.kz

1 پىكىر