جۇما, 4 جەلتوقسان 2020
COVID-19 قازاقستاندا. جۇقتىرعاندار — 133887. جازىلعاندار — 118004. قايتىس بولعاندار — 1990
2856 78 پىكىر 29 ناۋرىز, 2018 ساعات 09:36

ۇكىمەتباسى باقىتجان ساعىنتاەۆ وڭتۇستىكتە نە ءۇشىن ءجۇر؟

قر پرەمەر-ءمينيسترى باقىتجان ساعىنتاەۆ جۇمىس ساپارى بارىسىندا وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتىنىڭ 500 ورىندىق «ستۋدەنتتەر ءۇيىنىڭ» جۇمىسىمەن تانىستى. ۇكىمەت باسشىسى جاتاقحاناداعى جاتىن بولمەلەرى مەن كىتاپحانانى ارالاپ كوردى.

عيماراتتا عالامتورعا قوسىلعان وقۋ جانە كومپيۋتەر زالى، اسحانا، مەديتسينالىق كابينەت جانە جاتىن ورىندارىنىڭ ءبارى دەرلىك جۋىناتىن بولمەمەن قامتىلعان. 2015 جىلى پايدالانۋعا بەرىلگەن نىسىننىڭ قۇرىلىسىنا 1 158 017 تىس. تەنگە جۇمسالعان. جاتاقحانانىڭ جالپى كولەمى 9124 شارشى مەتردى قۇرايدى.

مۇنان سوڭ پرەمەر-مينيستر ەلباسىنىڭ بەس الەۋمەتتىك باستاماسىن تالقالاۋ ماقساتىندا ستۋدەنت جاستارمەن كەزدەسۋ وتكىزدى.

كەزدەسۋ بارىسىندا جاستار مەن الەۋمەتتىك ساياساتتىڭ وزەكتى ماسەلەلەرى تالقىلاندى. اتاپ ايتقاندا، بولاشاق ماماندىقتارى بويىنشا مامانداردى دايارلاۋ جانە قايتا دايارلاۋ، تەحنيكالىق ماماندىقتارعا ارنالعان گرانتتاردى كوبەيتۋ، ەڭبەك نارىعىنداعى وزگەرىستەردى جانە تسيفرلاندىرۋ مەن اۆتوماتتاندىرۋدى ەسكەرە وتىرىپ، قاجەتتى داعدىلاردى ۇيرەتۋ، كاسىپكەرلىك قىزمەتكە شاعىن نەسيە بەرۋ تەتىكتەرى، ءۇشتىلدى ءبىلىم بەرۋ مەن قوسارلى وقىتۋ جۇيەسىن ەنگىزۋ، سونداي-اق جاتاقحانامەن قامتاماسىز ەتۋ ماسەلەلەرى قارالدى.

پرەمەر-مينيستر باقىتجان ساعىنتاەۆ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋى اياسىندا قابىلدانىپ جاتقان شارالار ينجەنەرلىك-تەحنيكالىق قىزمەتكەرلەردىڭ جاڭا بۋىنىن قالىپتاستىرۋعا مۇمكىندىك بەرەتىنىن اتاپ ءوتتى. بۇل، ءوز كەزەگىندە، جاستار اراسىنداعى جۇمىسسىزدىقتى ازايتۋعا جانە «بىلىمدىلەردىڭ جىلىستاۋىنا» قاتىستى ماسەلەلەردى شەشۋگە جول اشادى.

جاستار ءۇشىن ءبىلىم الۋدىڭ قولجەتىمدى بولۋى ايرىقشا ماڭىزعا يە. پرەزيدەنت «جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ، ستۋدەنت جاستاردىڭ جاتاقحاناداعى جاعدايىن جاقسارتۋ» اتتى ءۇشىنشى الەۋمەتتىك باستاماسى اياسىندا جىل سايىن بولىنەتىن 54 مىڭعا قوسىمشا 20 مىڭ گرانت ءبولۋ تۋرالى شەشىم قابىلدادى. ولاردىڭ 11 مىڭى — ءتورتىنشى ونەركاسىپتىك رەۆوليۋتسيا جاعدايىندا جوعارى سۇرانىسقا يە بولاتىن تەحنيكالىق ماماندىقتارعا بولىنگەن.

ستۋدەنتتىك ينفراقۇرىلىمدى جەتىلدىرۋ باعىتىندا ۇكىمەت جاتاقحانالاردا 75 مىڭ ورىن دايىنداۋ بويىنشا جۇمىستار اتقارۋدا. بۇگىنگى تاڭدا 205 مىڭعا جۋىق ستۋدەنت باسقا قالالاردان كەلىپ وقيدى، ولاردىڭ تەك 67 مىڭى جاتاقحانالارعا ورنالاستىرىلعان.

جيىن بارىسىندا 2018 جىلى ەڭبەك نارىعىن دامىتۋدىڭ نەگىزگى باستامالارى تۋرالى ەڭبەك جانە حالىقتى الەۋمەتتىك قورعاۋ ءمينيسترى م. ابىلقاسىموۆا بايانداما جاسادى.  سونداي-اق، ءبىلىم جانە عىلىم ۆيتسە-ءمينيسترى ت. ەشەنقۇلوۆ پرەزيدەنتتىڭ «جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ، ستۋدەنت جاستاردىڭ جاتاقحاناداعى جاعدايىن جاقسارتۋ» اتتى ءۇشىنشى باستاماسىن ىسكە اسىرۋ تۋرالى باياندادى.

ماسەلەنى تالقىلاۋ بارىسىندا قر «اتامەكەن» ۇلتتىق كاسىپكەرلەر پالاتاسى باسقارماسىنىڭ توراعاسى ا.مىرزاحمەتوۆ، وڭتۇستىك قازاقستان پەداگوگيكالىق ۋنيۆەرسيتەتىنىڭ رەكتورى و.اياشەۆ، سونداي-اق م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ ستۋدەنتى گ.دارىباەۆا، وڭتۇستىك قازاقستان پەداگوگيكالىق ۋنيۆەرسيتەتىنىڭ ستۋدەنتى و.ابدىحالىق، وڭتۇستىك قازاقستان فارماتسەۆتيكا اكادەمياسىنىڭ ستۋدەنتى ب.توقتاروۆ، وقمۋ اگروونەركاسىپ فاكۋلتەتىنىڭ ستۋدەنتى ە.سەيد سويلەدى.

ايتا كەتەيىك، بۇگىنگى تاڭدا وڭىرىمىزدەگى 12 جوعارى وقۋ ورىندارىنداعى 78 مىڭنان استام ستۋدەنتتەردىڭ 13 پايىزى نەمەسە 10 مىڭنان استامى مەملەكەتتىك گرانت نەگىزىندە ءبىلىم الۋدا. ءبىزدىڭ وبلىستاعى جوعارعى وقۋ ورىندارىنداعى كۇندىزگى بولىمدە ءبىلىم الاتىن 45 مىڭنان استام ستۋدەنتتەردىڭ 17 پايىزى نەمەسە 7 200 ستۋدەنت جاتاحانامەن قامتىلعان.  2018 جىلدىڭ ەكىنشى جارتىسىندا وڭىرىمىزدە 754 ورىندىق 2 جاتاقحانا پايدالانۋعا بەرىلەتىن بولادى.

مۇرات راقىمجان

Abai.kz

78 پىكىر