تۇركىمەنستان بيلىگى شەتەلدە جۇمىس ىستەيتىن قىزداردى ەلگە قايتارۋعا تالپىنىپ جاتىر
تۇركىمەنستاننىڭ لەباپ وبلىسىنداعى بىرقاتار اۋدانداردا 6 ناۋرىزدا جەرگىلىكتى بيلىك ارنايى جينالىس ۇيىمداستىرىپ، تۇركىمەن ميگرانت قىزدارىن ەلگە قايتارۋ ماسەلەسىن كوتەرگەن.
حابارلارعا قاراعاندا، تۇركياعا كەتىپ، ءۇش جىلدان استام ۋاقىت ەلگە ورالماعان قىزداردىڭ تۋىسقاندارىنا قاۋىپسىزدىك ورگاندارى ارقىلى قىسىم كورسەتىلۋى مۇمكىن.
لەباپ ءۋالاياتىنا قاراستى چاردجوۋ ەتراپىنىڭ تۇرعىنى ازاتلىك راديوسىنا بولعان جايدى بايانداپ بەردى.
"جەرگىلىكتى بيلىك تۇركيادا جۇمىس ىستەيتىن قىزدارىمىزدىڭ ەلگە قايتقانىن تالاپ ەتتى. ولار ەلگە ورالماسا، اكىمشىلىك جاۋاپقا تارتىلادى دەپ قورقىتتى. ءبىز عانا ەمەس، تانىستارىمىزعا دا وسىلاي دەگەن", - دەدى جەرگىلىكتى تۇرعىن.
ونىڭ ايتۋىنشا، تۇرعىندار مۇنداي تالاپتىڭ سەبەبىن سۇراعانىمەن، بيلىك ەشقانداي تۇسىنىكتەمە بەرمەگەن.
Abai.kz
