ەلباسى نۇرسۇلتان نازارباەۆ حالىققا جاريالاعان «پرەزيدەنتتىڭ بەس الەۋمەتتىك باستاماسى» اتتى ۇندەۋىنىڭ ءۇشىنشى باستاماسى قازاقستاننىڭ ءبىلىم بەرۋ جۇيەسىندەگى وڭ وزگەرىستەرگە ارنالعان. اتاپ ايتقاندا، بيىلعى وقۋ جىلىندا تالاپكەرلەر ءۇشىن قوسىمشا 20 مىڭ گرانت بولىنبەك. ال بۇعان دەيىن مەملەكەتتىك گرانتتار سانى 54 مىڭنان اسپايتىن ەدى.

ءبىلىم سالاسىنداعى ەلباسى باستاماسى بۇكىل جاستاردى قۋانتتى. اسىرەسە، 2022 جىلعا دەيىن ستۋدەنتتەرگە ارنالىپ كەمىندە 75 مىڭ ورىندى جاتاقحانا تۇرعىزىلاتىنى ەڭ ەلەۋلى ءىستىڭ ءبىرى بولعالى تۇر. قازىرگى تاڭدا ستۋدەنتتەر اراسىندا جاتاقحانا ماسەلەسى وتە وزەكتى. شالعاي اۋىلدان ءبىلىم قۋىپ كەلگەن جاستار قالادا پاتەر جالداپ تۇرۋعا ءماجبۇر. ەلباسى وسى جولى جاستاردىڭ الاڭسىز ءبىلىم الۋىنا باسا نازار اۋدارىپ وتىر.

ەلباسى اتاپ كورسەتكەندەي، بۇگىندە 530 مىڭنان استام ستۋدەنت جوعارى وقۋ ورنىندا ءبىلىم الۋدا. الايدا ولاردىڭ 30 پايىزى عانا مەملەكەتتىك گرانت ەسەبىنەن وقيدى. پرەزيدەنتتىڭ گرانت سانىن كوبەيتۋ جايلى باستاماسى قۇپتارلىق ءىس. ناتيجەسىندە، وتاندىق عىلىم دامىپ، ءوندىرىس وركەندەيدى ءارى قازاقستاننىڭ الەمگە جاڭا برەندپەن تانىلۋىنا مۇمكىندىك تۋادى.

تالدىقورعانداعى قانابەك بايسەيىتوۆ اتىنداعى ساز كوللەدجىندە بۇگىندە 179 بالا وقيدى، ولاردىڭ بارلىعى دا مەملەكەتتىك گرانت يەلەرى. مەملەكەت تاراپىنان جاسالىپ وتىرعان قامقورلىقتىڭ ارقاسىندا ءداستۇرلى ونەرىمىزبەن الىس-جاقىن شەتەلدەردى ءتانتى ەتىپ، 15 وقۋشىمىز حالىقارالىق دەڭگەيدە جۇلدەگەر اتاندى.

بۇگىنگى كۇنگە دەيىن كوللەدجدە جاتاقحانا جوق بولاتىن. دەگەنمەن وبلىس باسشىلىعىنىڭ قولداۋىمەن بيىلعى جىلدان جاتاقحانا عيماراتىنىڭ جوبالىق-سمەتالىق قۇجاتتارى دايىندالۋ ۇستىندە. وسى باستالعان يگى ىسكە ەلباسىنىڭ بۇل باستاماسى سەرپىن قوسادى دەپ ويلايمىن.

ءادىلحان ادىرباەۆ، ق. بايسەيىتوۆ اتىنداعى ساز كوللەدجىنىڭ ديرەكتورى

Abai.kz