وبلىستاعى شاعىن جانە ورتا بيزنەستە 110 مىڭ سۋبەكتى، ولاردا جۇمىس ىستەيتىندەردىڭ سانى 11% ءوسىپ، 248 مىڭ ادامعا جەتتى. وسى سالادا وندىرىلگەن ءونىم مەن كورسەتىلگەن قىزمەت كولەمى 1 ترلن. تەڭگەنىڭ اينالاسىندا، ولاردان 75 ملرد. تەڭگە سالىق ءتۇسىپ، ونىڭ جەرگىلىكتى بيۋدجەتتەگى ۇلەسى 37-دەن 43%-كە ءوستى. وعان قوسا شوب-نىڭ بيىلعى جىلى 12 مىڭ جۇمىس ورنىمەن 100 جاڭا نىسانى اشىلاتىن بولادى. بۇل تسيفرلىق كورسەتكىشتەر وبلىس اكىمى ا. باتالوۆتىڭ ەسەپ بەرۋ جيىنىندا ايتىلدى، - دەپ حابارلايدى الماتى وبلىسى اكىمىنىڭ ءباسپاسوز قىزمەتى.

- ەلباسىنىڭ جولداۋىن جۇزەگە اسىرا وتىرىپ، ءبىز بيىلعى جىلى كاسىپكەرلىك سالاسىندا قۋاتى ءارتۇرلى 100 نىسان اشۋدى كوزدەپ وتىرمىز. ءسويتىپ شوب-دان تۇسەتىن سالىق كولەمىن 45%-كە دەيىن جەتكىزبەكپىز. سونىڭ ناتيجەسىندە شاعىن جانە ورتا بيزنەستە 12 مىڭ ازامات جۇمىسپەن قامتىلاتىن بولادى. بۇل ءوز كەزەگىندە ءوزىن ءوزى جۇمىسپەن قامتىعان ازاماتتاردىڭ ەداۋىر بولىگىن جۇمىسقا ورنالاستىرۋعا جانە ولاردىڭ جۇمىسپەن قامتىلعاندار اراسىنداعى ۇلەسىن 30-دان 25%-كە تومەندەتۋگە جاعداي جاسايدى، - دەدى ا. باتالوۆ.

الماتى وبلىسىندا كاسىپكەرلىكتى دامىتۋدىڭ مۇمكىندىكتەرى مول. 2017 جىلى مەملەكەتتىك قولداۋ كولەمى 9,3 ملرد. تەڭگەنى قۇرادى. بيىلعى جىلى «بيزنەستىڭ جول كارتاسى – 2020»، «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلامالارى اياسىندا جانە «دامۋ» قورى ارقىلى 7,9 ملرد. تەڭگە قاراستىرىلدى. وبلىستىڭ بارلىق اۋدان ورتالىقتارىندا «ءبىر تەرەزە» قاعيداتىمەن جۇمىس ىستەيتىن كاسىپكەرلەرگە قىزمەت كورسەتۋ ورتالىعى اشىلاتىن بولادى. قازىر مۇنداي ورتالىقتار تالدىقورعان، تەكەلى قالالارىندا جانە ەسكەلدى اۋدانىندا بار.

Abai.kz