جۇما, 27 قاراشا 2020
COVID-19 قازاقستاندا. جۇقتىرعاندار — 128400. جازىلعاندار — 114821. قايتىس بولعاندار — 1990
2607 2 پىكىر 31 قاڭتار, 2018 ساعات 10:21

يران تورەلىك سوتقا تۇركىمەنستانعا قارسى تاعى ءبىر شاعىم تۇسىرەدى

يران حالىقارادىق تورەلىك سوتقا تۇركىمەنستانعا قارسى تاعى ءبىر شاعىم تۇسىرەدى. بۇل تۋرالى 29 قاڭتاردا يراننىڭ مۇناي ونەركاسىبى ءمينيسترى بيجان زانگانە (Bijan Zangeneh) مالىمدەدى، دەپ حابارلادى يراننىڭ مەملەكەتتىك IRNA اگەنتتىگى.

"تۇركىمەنستان ءۋاجى بويىنشا، يران وعان 1,5 ملرد دوللار قارىز ەكەن، بىراق ءبىز بەرەشەك ودان از دەپ ەسەپتەيمىز. ءبىزدىڭ ەكىنشى ءبىر شاعىمىمىز تۇركىمەنستاننىڭ يمپورتتالاتىن گازىنىڭ ساپاسىنا قاتىستى", — دەدى مينيستر.

باسىلىم مالىمەتىنە قاراعاندا، ەندى يراننىڭ شاعىمى ءۇش بولىكتەن تۇرادى: ەسكەرتۋسىز گاز بەرۋدى دوعارۋى، ونىڭ ساپاسىنىڭ تومەندىگى جانە باعاسىنىڭ قىمباتتىعى.

ەسكە سالايىق، ءىستىڭ سوتقا جەتكەنى تۋرالى العاش رەت يران 2017 جىلى ناۋرىزدا حابارلاعان.

"حرونيكا تۋركمەنيستانا" باسىلىمىنىڭ حابارلاۋىنشا، 2016 جىلدىڭ اياعىندا يران مەن تۇركىمەنستان جانجالداسىپ قالعان. وعان "تۇركىمەنگازدىڭ" يراننان 1,8 ملرد دوللار قارىزىن تالاپ ەتۋى تۇرتكى بولعان. يران اقپارات قۇرالدارىنىڭ حابارلاۋىنشا، ۇزاققا سوزىلعان كەلىسسوزدەردەن سوڭ تاراپتار ىمىرالاسقان. سوعان قاراماستان، 2017 جىلى 1 قاڭتاردا تۇركىمەنستان يرانعا گاز بەرۋىن توقتاتقان.

Abai.kz

2 پىكىر