استانادا «ءسوز قازىناسى» انيماتسيالىق ءفيلمىنىڭ بالالارعا ارنالعان الدىن الا كورسەتىلىمى ءوتتى.

قازاقستان رەسپۋبليكاسىندا تىلدەردى دامىتۋ مەن قولدانۋدىڭ
2011-2020 جىلدارعا ارنالعان مەملەكەتتىك باعدارلاماسى اياسىندا قر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ تاپسىرىسىمەن كوپتەگەن جوبالار ىسكە اسۋدا. ونىڭ ىشىندە ەلىمىزدىڭ رۋحاني قۇندىلىقتارىن جاڭعىرتىپ، باي قازىنامىزدى تولىقتىرا تۇسەتىن كىتاپتار، قازاق ءتىلىن قولدانۋ اياسىن كەڭەيتۋگە سەپتىگىن تيگىزەتىن وقۋ-ادىستەمەلىك قۇرالدار، جاستاردى ءتىلدى مەڭگەرۋگە جەتەلەيتىن تەلەۆيزيالىق جوبالار، ت.ب. بار. ىلكىمدى ىستەردىڭ قاتارى جۋىردا تاعى ءبىر تىڭ جوبا، «ءسوز قازىناسى» اتتى انيماتسيالىق فيلممەن تولىقتى.

جوبانىڭ باستى ماقساتى – قازاقتىڭ باي ءتىل مۇراسى مەن سالت-داستۇرلەرىن بالالارعا ناسيحاتتاۋ. ادەتتە ەرەسەكتەر جاۋابىن تابا الماي جاتاتىن ىرىم-تىيىمداردىڭ ءمان-ماڭىزىن اشىپ كورسەتۋ.

اتالعان انيماتسيالىق فيلمدە قازاقى داستۇرلەر مەن ءجون-جورالعى، ىرىم-تىيىمدار ويىن ەلەمەنتتەرى ارقىلى جانە قازاقتىڭ كلاسسيكالىق ەرتەگىلەرىنەن تانىس كەيىپكەرلەردىڭ قاتىسۋىمەن، شىتىرمان وقيعالار ارقىلى تۇسىندىرىلەدى.

فيلم پەرسوناجدارىن دايىنداۋ كەزىندە جاڭا تۇجىرىمداما جاسالىپ، كەيىپكەرلەردىڭ بارىنشا تارتىمدى بولۋى ويلاستىرىلدى. بۇل انيماتسيالىق ءفيلمنىڭ ادەتتەگى ونىمدەردەن ايىرماشىلىعى – ستسەناريى قۇرىلىمى ۇلتتىق فولكلور ەرەكشەلىكتەرىن بالالارعا وڭاي ءتۇسىندىرۋ ءۇشىن وقيعالار قيال-ەرتەگى ەلەمەنتتەرىنە سۇيەنگەن. سايكەسىنشە، انيماتسيالىق فيلمدە نەگىزگى 13 كەيىپكەر بار. قوسالقى كەيىپكەرلەر سانى 30-عا جۋىق. ءفيلمدى دىبىستاۋعا ەلىمىزگە تانىمال اكتەرلار تارتىلدى. ءونىم 2D, 3D فورماتتا دايىندالدى. بارلىعى 15 سەريادان تۇرادى.

قر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ باس مامانى، جوبا جەتەكشىسى ولجاس شىنجىگىتوۆ:

-بالالاردىڭ ءتىلىن، وي-ءورىسىن دامىتۋعا باعىتتالعان كونتەنتتى كوبەيتۋ ماقساتىندا 2013 جىلدان باستاپ انيماتسيالىق فيلمدەر شىعارىپ كەلە جاتىرمىز. مىسالى، 2013 جىلى 50 سەريالى انيماتسيالىق فيلم شىققان بولسا، 2014-2016 جىلدارى دا تۋرا سولاي. «دينا مەن دانيك»، «كۇنىكەي جانە ونىڭ دوستارى»، «جاندوس جانە ونىڭ دوستارى» كوپ سەريالى انيماتسيالىق فيلمدەر شىعارىلدى. ولاردىڭ بارلىعى دا بالالاردىڭ وي-ءورىسىن، سويلەۋ قابىلەتىن، ءتىلىن دامىتۋ ماقساتىندا شىعارىلىپ وتىرعان انيماتسيالىق فيلمدەر. قازاق ءتىلىن ۇيرەتۋگە باعىتتالعان كۋرستىق انيماتسيالىق فيلمدەر دەپ ايتۋعا دا بولادى. بيىلعى جوبامىز «ءسوز قازىناسى» دەپ اتالاتىن مۋلتفيلم. بۇل دا قازاقتىڭ كوپتەن كونەرگەن سالت-داستۇرلەرىن جاڭعىرتۋ، بالالارعا ناسيحاتتاۋ، ءتۇسىندىرۋدى كوزدەيتىن جوبا. كونەرگەن سوزدەردىڭ ءمان-ماعىناسىن اشىپ جەڭىل، بالالارعا ۇعىنىقتى تۇردە ءتۇسىندىرۋ ماقساتىندا شىعارىلىپ جاتىر.

ايتا كەتەيىك،  «ءسوز قازىناسى» انيماتسيالىق ءفيلمى 2018 جىلى وتاندىق تەلەارنالار ەفيرىنەن كورسەتىلەتىن بولادى.

اباي-اقپارات