استانا پوليتسياسى قوعامنىڭ ءتارتىپ بۇزۋشىلىققا «نولدىك توزىمدىلىگىن» قالىپتاستىرۋدى جالعاستىرۋدا، دەپ حابارلايدى اباي اقپارات اگەنتتىگى.

جىل باسىنان بەرى شامامەن 93 مىڭ اكىمشىلىك قۇقىق بۇزۋشىلىق تىركەلگەن، ونىڭ ىشىندە ۇساق بۇزاقىلىق 4 مىڭنان اسا، تىنىشتىقتى بۇزۋ بويىنشا 6 مىڭنان اسا، قوعامدىق ورىنداردا الكوگولدىك ىشىمدىك ءىشۋ 18 مىڭنان اسا، قوعامدىق ورىنداردا تەمەكى شەگۋ 15 مىڭنان اسا، اباتتاندىرۋ ەرەجەسى بويىنشا 21 مىڭنان اسا، قوعامدىق ورىنداردا باسقا ادامداردىڭ مازاسىن العان 2171 فاكتى تىركەلگەن. 236 قۇقىق بۇزۋشى اكىمشىلىك جاۋاپكەرشىلىككە تارتىلعان.

«ءىىب-نىڭ باسىمدىققا يە باعىتى قوعامدىق ءتارتىپتى ساقتاۋ مەن قۇقىق بۇزۋشىلىقتىن الدىن الۋ. جىل باسىنان بەرى استانا كوشەلەرىندە، قوعامدىق ورىنداردا جانە دە ادام كوپ جينالاتىن ورىنداردا قىلمىستىڭ الدىن الۋعا جانە جولىن كەسۋگە بايلانىستى 217 جۇيەلى رەيد جۇرگىزىلگەن»، دەيدى ۆەدومستۆو حابارلاماسىندا.

رەيد بارىسىندا 10 659 اكىمشىلىك قۇقىق بۇزۋشىلىق انىقتالعان. پوليتسيانىڭ اقپاراتىنا سايكەس، قالامىزدا قوعامدىق ءتارتىپتى ساقتاۋعا كۇن سايىن 1,4 مىڭنان استام پوليتسيا جانە ۇلتتىق ۇلاننىڭ اسكەري قىزمەتكەرلەرى شىعادى.

وتكەن اپتادا استانادا 750 قىلمىس تىركەلدى. بۇل وتكەن جىلعى كەزەڭمەن سالىستىرعان كەزدە 22 پايىزعا ازايعانى بايقالادى. استانا قالالىق ءىىد-ءنىڭ باستىعى امانتاي اۋباكىروۆتىڭ ايتۋىنشا، قالادا تىركەلگەن قىلمىستىڭ باسىم بولىگىن سىرتتان كەلگەن ازاماتتار جاسايدى.

«سەرگەك» بەينەباقىلاۋ كامەرالارىنىڭ كومەگىمەن19 قىلمىستىڭ بەتى اشىلدى. 1,9 مىڭنان استام (1949) اكىمشىلىك قۇقىق بۇزۋشىلىق پەن 608 جقە بۇزۋ فاكتىسى انىقتالدى. تاجىريبە كورسەتىپ وتىرعانداي، قالادا تىركەلگەن قىلمىستاردىڭ باسىم بولىگىن وزگە وڭىرلەردىڭ ازاماتتارى جاساعان»، - دەدى استانا اكىمدىگىندە وتكەن اپپارات جينالىسىندا ءىىد-ءنىڭ باستىعى امانتاي اۋباكىروۆ.

دەپارتامەنت باستىعى 15 قاراشادا ەلوردادا 12 كەڭسەگە قاراقشىلىق شابۋىل جاساعان بقو، شقو جانە اقمولا وبلىستارىنىڭ تۇرعىندارى ۇستالعانىن ايتتى. بۇعان قوسا، ەليتالى كولىكتەردى ۇرلاۋمەن اينالىسقان ەكى قىلمىستىق توپ قولعا ءتۇستى.

ايتا كەتەيىك، بۇگىندە استانادا 983 شەتەلدىك ازامات پەن (ونىڭ 336 الىس شەت ەلدەردەن، 647 تمد ەلدەرىنەن) 1,3 مىڭنان استام (1359) قر ازاماتى ۋاقىتشا تىركەۋدە تۇر. تۇراقتى تىركەۋگە 2724 قر ازاماتى الىندى. 85 شەتەلدىك پەن 27 قازاقستان ازاماتى اكىمشىلىك جاۋاپكەرشىلىككە تارتىلدى.

جالپى اتالعان ارالىقتا ەلىمىزدىڭ وزگە ايماقتارىنان جانە باسقا ەلدەردەن كەلگەن 37 ادام جاساعان قىلمىسى ءۇشىن قاماۋعا الىندى.

Abai.kz