جىل باسىنان بەرى ون ايدىڭ ىشىندە استانا قالاسىندا 564 ءورت وقيعاسى تىركەلدى. بۇل وتكەن جىلمەن سايكەس كەزەڭىندەگى كورسەتكىشتەن 3,4%-عا كەم دەپ حابارلايدى، اباي اقپارات اگەنتتىگى.

بۇگىن «جىلىتۋ ماۋسىمىنىڭ ءورت قاۋىپسىزدىگى ەرەجەلەرىن ساقتاۋ» تاقىرىبىنا ارنالعان ءباسپاسوز ءماسليحاتى بارىسىندا  ءورت وقيعالارى نەگىزىنەن جەكە تۇرعىن ءۇي سەكتورلارىنان شىعاتىنىن ايتتى. مىسالى، وسى جىلدىڭ 10 ايىندا 307 ءورت وقيعاسى استاناداعى تۇرعىن ءۇي سەكتورىنان شىققان بولاتىن. ءورتتىڭ شىعۋىنا نەگىزىنەن ەلەكتر سىمدارىنىڭ تۇيىقتالىپ، قىزۋى، جىلىتۋ، ازاماتتاردىڭ پەشتى دۇرىس پايدالانباۋى، قولدانىستاعى نورماتيۆتىك-قۇقىقتىق اكتىلەرمەن بەكىتىلگەن ەرەجەلەرگە ساي ەمەس ەلەكتر قوندىرعىلاردىڭ شامادان تىس قىزۋى سەبەپ بولىپ وتىر.

«2016 جىلى ءورت سالدارىنان 2016 جىلى 16, بيىل 9 ادام (ۇشەۋى – بالالار) قازا تاپقان. ون ايدا 68 ادام زارداپ شەككەن.  ءورت وقيعالارى كوبىنە جەكە تۇرعىن ءۇي سەكتورىندا بولادى. تۇرعىن ۇيلەردەگى ءورتتىڭ نەگىزگى بولىگى جەر تۇرعىن ءۇي سەكتورىنا تيەسىلى. دالىرەك ايتقاندا، ءورت وقيعالارىنىڭ جالپى سانىنىڭ 54,4%-ىن قۇرايدى»، - دەدى ءورت قاۋىپسىزدىگى سالاسىنداعى باقىلاۋ جانە پروفيلاكتيكالىق قىزمەت باسقارماسىنىڭ باس مامانى مۇرات مادىبەكوۆ.

ونىڭ دەرەكتەرىنە قاراعاندا قازاقستاننىڭ باس قالاسىندا وتكەن جىلمەن سالىستىرعاندا گازدان ۋلانۋ وقيعالارىنىڭ دا سانى 27, 6% -عا ازايعان.

ءورت وقيعالارىنىڭ سانىن ازايتۋ، ولاردى بولدىرماۋ ماقساتىندا استانا قالاسى تج دەپارتامەنتىنىڭ قىزمەتكەرلەرى جەكە تۇرعىن ءۇي سەكتورىنداعى اۋلالاردى ارالاپ، رەيد، ۇگىت-ناسيحات جۇمىستارىن جۇرگىزىپ جاتىر.

توتەنشە جاعدايلاردىڭ الدىن الۋ ءبولىمىنىڭ باستىعى ەركىن وتارعالىمنىڭ ايتۋىنشا، توتەنشە جاعدايلار دەپارتامەنتى قىزمەتكەرلەرى جىل باسىنان جەكە تۇرعىن ءۇي سەكتورىنداعى 39 925 اۋلانى ارالاعان.

«تۇرعىندارمەن 290 كەزدەسۋ وتكىزدىك. اتالمىش جينالىستارعا بارلىعى 6204  ادام قاتىسقان بولاتىن. 3431 ادام قاتىسقان 327 نۇسقاۋلىق شاراسى، 9286 ادامنىڭ قاتىسقان 359 شارا ءوتتى. تۇرعىندارعا ءورت قاۋىپسىزدىگى ەرەجەلەرى جازىلعان جادىنامالار تاراتىلدى.

دەپارتامەنت جۇرگىزىپ جاتقان جۇمىستار ەسەپكە الىنا وتىرىپ، تابيعي جانە تەحنوگەندىك توتەنشە جاعدايلاردىڭ سانىن ازايتۋعا باعىتتالعان بارلىق قاجەتتى شارالار الداعى ۋاقىتتا دا قابىلداناتىن بولادى»، - دەپ تۇيىندەدى ءسوزىن ەركىن وتارعالىم.

Abai.kz