ۇلتتىق قاۋىپسىزدىك كوميتەتىنىڭ وكىلدەرى ەسىرتكىنىڭ ونلاين ساۋداسىن جۇزەگە اسىرىپ كەلگەن ۇيىمداسقان قىلمىستىق توپ وكىلدەرىن قۇرىقتادى. بۇل تۋرالى قر ۇلتتىق قاۋىپسىزدىك قىزمەتىنىڭ ءباسپاسوز قىزمەتى تاراتقان مالىمەتتەردەن بەلگىلى بولدى.

«2017 جىلعى 26-27 قىركۇيەكتە قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ كيبەرقاۋىپسىزدىك، ەسىرتكى قۇرالدارىنىڭ زاڭسىز اينالىمىمەن كۇرەس جانە ارنايى جاساق بولىمشەلەرىنىڭ بىرلەسكەن كۇشىمەن استانا جانە الماتى قالالارىندا ۇقك كيبەر بولىمشەلەرىنىڭ قاتىسۋىمەن «Dark net, Deep web» عالامتور-جەلىلەرىنىڭ كولەڭكەلى سەگمەنتىنىڭ مۇمكىندىكتەرىن قولدانا وتىرىپ، ەسىرتكى قۇرالدارى مەن پسيحوتروپتىق/سينتەتيكالىق زاتتاردى تاراتۋمەن اينالىسقان 2 ۇيىمداسقان قىلمىستىق توپتىڭ ءىس-ارەكەتىنىڭ جولىن كەسۋگە باعىتتالعان كەڭ اۋقىمدى ارنايى وپەراتسيا وتكىزىلدى»،-دەلىنگەن ۇقك-ءنىڭ ءباسپاسوز مالىمەتتەرىندە.

وندا سونداي-اق جابىق ۆەب-كەڭىستىكتى مونيتورينگىلەۋ بارىسىندا ساتىپ الۋشىلارمەن ونلاين-رەجيمدە ەسىرتكى قۇرالدارى جانە پسيحوتروپتىق زاتتار ساتىپ الىنىپ وتىرعان جەكەلەگەن عالامتور-دۇكەندەرى انىقتالعاندىعى ايتىلعان.

«QIWI-كوشەلەكتەرگە» اقشا قاراجاتتارىن اۋدارۋ جولىمەن ەسىرتكى زاتتارىنا تولەمدەر العاننان كەيىن، سايت اكىمشىلەرى ەسىرتكى ساتىپ الۋشىلارعا تىيىم سالىنعان زاتتاردىڭ جاسىرىن ورىندارىن حابارلاپ وتىرعان.

ودان ءارى جۇرگىزىلگەن جەدەل-ىزدەستىرۋ ءىس-شارالارى بارىسىندا الماتى جانە اقتوبە قالالارىندا وسىعان ۇقساس جولمەن ەسىرتكى قۇرالدارى مەن پسيحوتروپتىق زاتتاردى تاراتۋمەن اينالىسقان وڭتۇستىك استانانىڭ ەكى تۇرعىنى انىقتالعان.

«2017 جىلعى 3 قاراشادا ۇلتتىق قاۋىپسىزدىك كوميتەتى كورسەتىلگەن تۇلعالاردى الماتى قالاسىندا ۇستادى. وتكىزىلگەن ءىس-شارالار ناتيجەسىندە بارلىعى 12 ەسىرتكى ساتۋشىنىڭ قىلمىستىق ءىس-ارەكەتىنىڭ جولى كەسىلدى. سونىمەن بىرگە جوعارىدا اتالعان سايتتاردى ەسىرتكى زاتتارىن الۋ ءۇشىن پايدالانعان ادامداردى انىقتاۋ بويىنشا ءتيىستى جەدەل-تەرگەۋ ءىس-ارەكەتتەرى جالعاسۋدا»،-دەپ حابارلادى ءباسپاسوز قىزمەتى.

Abai.kz