17 قىركۇيەكتە تۇركىمەنستاننىڭ  استاناسى اشحاباد قالاسىندا جابىق كەشەندە وتەتىن   5-جازعى ازيا ويىندارى تۇڭلىگىن تۇرەدى. ون كۇنگە جۋىقتايىن ازيا ويىندارىنا  الەمنىڭ 62 مەملەكەتىنەن سپورتشىلار جينالادى. بۇل دوداعا  ازيا قۇرلىعىنىڭ عانا ەمەس، مۇحيت ايماعىنداعى ەلدەر دە سپورتشىلارىن قاتىستىرادى.  تۇركىمەن جەرىندەگى ايتۋلى دودا كەزىندە ۇلتتىق سپورتىمىز – قازاق كۇرەسى ناسيحاتتالماق. ياعني اشحابادتاعى الاماندا بىرنەشە ەلدىڭ بالۋاندارى قازاق كۇرەسىنەن دە سىنعا تۇسەدى.

بۇل ەلىمىز ءۇشىن ۇلكەن مارتەبە. اقجولتاي جاڭالىقتى جۋرناليستەرمەن بولىسكەن دۇنيەجۇزىلىك قازاق كۇرەسى قاۋىمداستىعىنىڭ ءبىرىنشى ۆيتسە-پرەزيدەنتى سەرىك تۇكەەۆ ازيا ويىندارى كەزىندە قازاق كۇرەسىنەن 3 سالماق دارەجەسىندە بەلدەسۋلەر وتەتىنىن جەتكىزدى. ء"بىز وسىدان ءبىر مۇشەل ۋاقىت بۇرىن ياعني 2004 جىلى گەرمانيانىڭ بەرلين قالاسىندا وتكەن دۇنيەجۇزى قازاقتارىنىڭ قۇرىلتايى كەزىندە دۇنيەجۇزىلىك قازاق كۇرەسى قاۋىمداستىعىن قۇرعانبىز. سونداعى باستى ماقساتىمىز – قازاق كۇرەسىن وليمپيادا ويىندارىنىڭ باعدارلاماسىنا ەنگىزۋ. وسى مەجەگە جەتۋ جولىندا قىرۋار جۇمىس اتقارىلدى. قازاق كۇرەسىنەن ازيا چەمپيوناتى 11 مارتە وتكىزىلدى، ەۋروپا بىرىنشىلىگىن دە بىرنەشە ەلدە وتكىزدىك. الەم چەمپيوناتى التى رەت ۇيىمداستىرىلدى. افريكا چەمپيوناتى دا جوعارى دەڭگەيدە ءوتتى. جاستار مەن جاسوسپىرىمدەر اراسىندا الەم بىرىنشىلىگى وتكىزىلدى.  قازاق كۇرەسىنىڭ، ۇلتتىق سپورتىمىزدىڭ جاناشىر ازاماتتارىنىڭ ارقاسىندا، سولاردىڭ يگى جوسپارىمىزدى قولداپ، دەمەۋىنىڭ ناتيجەسىندە وسىنداي جارىستاردى ۇيىمداستىردىق.

اشحابادتا وتەتىن جابىق كەشەندەگى ازيا ويىندارىنىڭ باعدارلامىسنا قازاق كۇرەسىنىڭ ەنگىزىلۋى ەلىمىز ءۇشىن دە  زور جەتىستىك" دەدى سەرىك ادامۇلى.

تۇركىمەن جەرىنە جۇرەر الدىندا جۋرناليستەرمەن جۇزدەسۋگە سەرىك تۇكەەۆتەن وزگە پروفەسسورلار جانپەيىس قوبىلانوۆ، قازاق كۇرەسىنىڭ جاناشىرى، ءازيز تاستانبەكوۆ تە قاتىسىپ، قازاق كۇرەسىن الەمگە دامىتۋ جولىندا نە ىستەۋ كەرەك، قانداي شارۋالاردى جۇزەگە اسىرۋ قاجەت، ناسيحاتتاۋدىڭ قانداي ءتاسىلى ءتيىمدى؟ دەگەن ساۋالدارعا جاۋاپ بەردى.

قازاق كۇرەسىن جاپوننىڭ دزيۋدوسى سەكىلدى وليمپيادا ويىندارىنىڭ باعدارلاماسىنا ەنگىزۋ ءۇشىن اتقارار شارۋا قىرۋار، ارقالار جۇك وتە اۋىر. دۇنيەجۇزىلىك قازاق كۇرەسى قاۋىمداستىعى 2004 جىلدان بەرى قاراي الەمنىڭ 50-قا جۋىق ەلىندە قازاق كۇرەسىنىڭ فەدەراتسيالارىن اشىپ، سول ەلدەردە ناسيحاتتالۋىنا كۇش سالىپ كەلەدى. جۇمىس ۇدەرىسى وسى قارقىنىنان تايماسا الداعى ۋاقىتتا قازاق كۇرەسى دە ويمپيادا ويىندارىنىڭ باعدارلاماسىنا ەنگىزىلۋى ابدەن مۇمكىن. لايىم سولاي بولعاي.

اشحابادتاعى 5-جازعى ازيا ويىندارىندا قازاق كۇرەسىنەن بالۋاندار ءۇش سالماقتا سىنعا تۇسەدى. ەلىمىزدىڭ نامىسىن 70 كەلىدە  قاسىمحان، 90 كەلىدە ءادىلجان ىستىباەۆ، 90 كەلىدەن اۋىر سالماق دارەجەسىندە ايبەك نۇعىماروۆ كۇرەسكە تۇسەدى.

قۋان ۇپان

Abai.kz