دۇيسەنبى, 21 قىركۇيەك 2020
COVID-19 قازاقستاندا. جۇقتىرعاندار — 107307. جازىلعاندار — 101941. قايتىس بولعاندار — 1671
«سوقىر» فەميدا 4081 1 پىكىر 4 قىركۇيەك, 2017 ساعات 10:01

مەرەكەدە تەگىن تاعام تاراتۋدى توقتاتۋ كەرەك

وزگە وڭىرلەردەگى سەكىلدى ءبىزدىڭ قوستانايدا دا قالا كۇنى اتالىپ ءوتتى. ءبارى دە    ويداعىداي. ءبارى دە ستسەناري بويىنشا. جىلداعى قايتالا بەرەتىن كورىنىس. ساحنادا اتوي سالىپ ويناقتاعان سول باياعى كورشىمىزدىڭ انشىسىماق «كەلىمسەكتەرى»...

الايدا ايتايىن دەگەنىمىز بۇل ەمەس. بۇل قالا كۇنى دەگەنىڭىز كەي-كەيدە بوس       داڭعازاعا اينالىپ، كوپشىلىكتىڭ كوڭىلىن قالدىراتىنى بار. ماسەلەن، جىلدا الگى مەرەكەدە ءارتۇرلى تاعامدى اسا مول ەتىپ دايىنداپ، مۇندا كەلگەندەرگە تەگىن تاراتىلىپ  ءجۇر. بارلىق كەلەڭسىز جاعداي وسىدان تۋىندايدى. بۇل جولى مەرەكەنى ۇيىمداستىرۋشىلار المادان جاسالعان كەرەمەت ۇلكەن پيروگ ازىرلەپتى. سودان كەيىنگى كورىنىستى كورسەڭىز جاعاڭىزدى ۇستايسىز. بۇكىل جۇرتتىڭ تايلى-تاياعى قالماي سول پيروگتى مولىنان قامتىپ قالۋعا تىرىسىپ ءبىر-بىرىمەن جۇلقىلاسىپ جاتىر. مادەنيەت، ەتيكا دەگەندەرگە ەشكىم دە پىسقىرىپ قارامادى. انە ءبىر جاس بالا جۇرتتىڭ اياعىنىڭ استىندا تاپتالىپ قالام عوي دەپ ويلاماستان تەگىن ءدۇنينى الۋ ءۇشىن ارىستانداي ارپالىسىپ جاتىر. ال مىنا ءبىر ءساندى كيىنگەن سىلقىم كەلىنشەك ۇيىنەن الا كەلگەن ۇلكەن پاكەتكە پيروگتى سىيعانىنشا تىقپالاپ جاتىر. سونىمەن تەگىننىڭ جىرى دا ءبىتتى.

سىزدەر مۇنى ءبىرىنشى رەت بولعان اتتەگەن-اي دەيتىن جاعداي دەسەڭىز، قاتتى قاتەلەسىز. نەگە ەكەنى بەلگىسىز، قوستانايلىقتار الگىندەي تەگىن دۇنيەنى تالاسا-تارماسا، ءتىپتى جاعا جىرتىسۋعا دەيىن باراتىن داستۇرگە اينادىرعالى قاشان.

وتكەن ءبىر قالا مەرەكەسىندە قالا تۇرعىندارى تەگىن بەرىلەتىن شوكولاد ءۇشىن توبەلەسۋگە دەيىن بارعان. ايتەۋىر ءبىر ابىروي بولعاندا باس جارىلىپ، قول سىنعان جوق. وعان دا شۇكىرشىلىك. ال ەندى كەلەسى ءبىر قالا تويىندا  «نان مەرەكەسى» دەپ اتالاتىن كورمەدەگى ناننان ىستەلىنگەن ءتۇرلى تاعامداردى تۋ-تالاپاي ەتىپ تالاپ الىپ كەتتى.

جالپى، ءبىز قالا بيلىگىنىڭ ەشنارسەدەن قورىتىندى شىعارمايتىنىنا تاڭ قالامىز. اۋ، تەگىن تاراتىلاتىن ءدامدى جۇرتقا ءبولىپ بەرۋدە نەگە ءتارتىپ ورناتىلمايدى؟ جالپى وسىنداي تويدا قانداي دا تاعامدى تەگىن تاراتۋ دەگەن ادەتكە تيىم سالعان ءجون بولار. تەگىن دۇنيە ءۇشىن جانتالاسا ۇمتىلىپ، جاسى كارىسىن تىڭداماي، كوكپارعا بەرگىسىز ارپالىستىڭ كىمگە كەرەگى بار. ءدال وسى كورىنىس مەرەكەنىڭ ءسانىن دە ءمانىن دە كەتىرمەي مە؟ الدە اشىققاندارعا ءبىر ءۇزىم نان بەرىپ، جومارتتىق تانىتتىق دەپ ويلاي ما؟ قالاي دەگەنمەن ءبىزدىڭ ويىمىزشا مۇنداي كۇماندى باستاما بۇكىل تويدىڭ بەرەكەسىن قاشىرىپ، بوس داڭعازاعا ۇلاسىپ كەتكەندەي پىكىر قالدىردى

جايبەرگەن بولاتوۆ

Abai.kz

     

 

 

1 پىكىر