«ءدىن ادامدارعا عالامنىڭ جاراتىلىس سىرلارىن ۇيرەتەدى. ءارى بۇل دۇنيەدە قالاي ءومىر ءسۇرىپ، قالاي ءجۇرىپ-تۇرۋ كەرەكتىگى جونىندە مالىمەتتەر بەرەدى. ادام اقىلى جەتە الماعان كەيبىر سۇراقتارعا دىننەن ناقتى جاۋاپ تابا الادى. ءدىني سەنىم ادامدارعا كوپتەگەن شەشىمى قيىن ساۋالدار بويىنشا جول سىلتەپ وتىرادى. بۇگىندە الەم بويىنشا بەلگىلى ءبىر شەكارالار بولعانىمەن، اقپارات كەڭىستىگىندە ەشبىر شەكارا جوق. كەز-كەلگەن ادام قالاعان ۋاقىتىندا قالاعان اقپاراتىن تابۋىنا جاعداي جاسالعان. قالىڭ جۇرتتىڭ كوپشىلىگى ونىڭ ىشىندە جاستار كوپ ۋاقىتىن عالامتوردا، الەۋمەتتىك جەلىلەردە وتكىزەدى. وسى ورايدا، ءاربىر اتا-انا ەسكەرۋى كەرەك مىنا جاعدايدى ايتا كەتكىم كەلەدى. جاستارىمىز كوپ قولداناتىن «فەيسبۋك»، «ۋاتساپ»، «ۆ كونتاكتە» جەلىلەرىندە جاريالاناتىن بارلىق اقپاراتتىڭ جاريالانۋ ماقساتىن ءتۇسىنىپ بولۋ مۇمكىن ەمەس. كوبىسى جاقسىلىققا شاقىرعانداي بولىپ وتىرىپ، قياناتقا قىلمىسقا نەمەس كۇناعا جەتەلەيتىن توپتار بار ەكەنى جاسىرىن ەمەس. اشىق اقپاراتتىق قوعامنىڭ وسىنداي زاڭىن اتا-انالار مەن ءتيىستى ورىندار قاتاڭ ەسكەرۋى قاجەت», – دەدى مەشىت ۇستازى دينارا قۇرتقوجاقىزى.

ساباق بارىسىندا شاكىرتتەر تاراپىنان تاقىرىپقا وراي قويىلعان بىرنەشە سۇراقتارعا ناقتى ءارى تۇششىمدى جاۋاپ بەرىلدى. ايتا كەتەيىك، الداعى ۋاقىتتا «لانكەستىك ارەكەتتەردەن ساقتانۋ جولدارى» ساباعى «نۇر استانا» ورتالىق مەشىتىندە ايەل جاماعاتى اراسىندا ءار اپتا سايىن وتەتىن بولادى.

Abai.kz