قوستاناي وبلىسىنداعى رۋدنىي يندۋستريالىق ينستيتۋتىنىڭ رەكتورى، پروفەسسور ءابدىراحمان نايزابەكوۆ وڭتۇستىك قازاقستان وبلىسىنا ارنايى بارىپ، ءوڭىر اكىمى جانسەيىت تۇيمەباەۆپەن كەزدەستى.  

كەزدەسۋدە تاراپتار ەلىمىزدەگى ءبىلىم بەرۋ جۇيەسى مەن وعان مەملەكەتتەن جاسالىپ جاتقان قامقورلىق جايىن ءسوز ەتىپ، وسى ماسەلەر اياسىندا جۇزەگە اسىرىلىپ جاتقان ءتۇرلى باعدارلامالار تۋرالى اڭگىمەلەستى.        

اسىرەسە، وبلىس باسشىسى وڭىردەگى جاستاردى «سەرپىن-2050» باعدارلاماسى اياسىندا سولتۇستىكتەگى ءوزى باسقاراتىن وقۋ ورنىنا شاقىرا كەلگەن قوناقتىڭ ۇسىنىسىن قۇپ كورىپ، ونى جۇزەگە اسىرۋدىڭ جاي-جاپسارىن تالقىلادى.

تاريحى حح عاسىردىڭ 50 جىلدارىنان باستاۋ الاتىن رۋدنىي يندۋستريالدىق ينستيتۋتى بۇگىندە تەحنيكالىق عىلىم سالاسىندا ينفراقۇرىلىمى دامىعان زاماناۋي عىلىمي-ءبىلىم كەشەنى بولىپ تابىلادى. ينستيتۋت قۇرامىندا – 3 فاكۋلتەت (تاۋ-مەتاللۋرگيالىق فاكۋلتەت، ەنەرگەتيكا جانە اقپاراتتىق جۇيەلەر فاكۋلتەتى، ەكونوميكا جانە قۇرىلىس فاكۋلتەتى) پەن 7 كافەدرا بار. ستۋدەنتتەردى وقىتۋ جالپى ورتا، تەحنيكالىق جانە كاسىبي، جوعارى ءبىلىم بازاسىندا كۇندىزگى، كەشكى جانە سىرتتاي وقۋ نىسانى بويىنشا مەملەكەتتىك جانە ورىس تىلدەرىندە 18 باكالاۆر ماماندىقتارى بويىنشا جۇرگىزىلەدى.

ينستيتۋت وقىتۋشىلارى «سەرپىن-2050» باعدارلاماسى بويىنشا سوڭعى 2 جىلدان بەرى شالعاي اۋىلداردان تالاپكەرلەردى قابىلداپ، بۇگىنگە دەيىن 250 ستۋدەنتتى (ونىڭ 200-گە جۋىعى وقو-دان) مامان اتاندىرىپ وتىر. جوعارى وقۋ ورنى رەكتورىنىڭ ايتۋىنشا، بيىل تاعى 130 ستۋدەنت ءبىزدىڭ وڭىردەن رۋدنىيعا اتتانىپ، ءبىلىمىن جالعاستىرادى دەپ كۇتىلۋدە. وقۋ ورنىن بىتىرگەن تۇلەكتەردىڭ 95-98 پايىزى ماماندىعى بويىنشا جۇمىسقا ورنالاساتىنىن جەتكىزگەن پروفەسسور وندا جاستار ءۇشىن بارلىق جاعدايدىڭ جاسالعانىن مالىمدەدى.

اكىممەن وتكەن باسقوسۋدان سوڭ ءا.نايزابەكوۆ شىمكەنتتەگى جاستار ورتالىعىندا بىرقاتار تالاپكەرلەرمەن كەزدەستى. رەكتور جاستاردى سولتۇستىكتە ءبىلىمىن جالعاستىرىپ، سوندا جۇمىسقا ورنالاسۋعا شاقىردى.

ايتا كەتەيىك، «سەرپىن-2050» باعدارلاماسى بويىنشا، 2014 جىلى 1000 گرانت ءبولىنىپ، كۇنگەيلىك 326 جاس وقۋعا تۇسسە، 2015 جىلى 34 كوللەدجگە 1200 گرانت ءبولىنىپ، 359 تالاپكەر ءبىلىمىن جالعاستىردى. بىلتىر 31 كوللەدجگە 1000 گرانت ءبولىنىپ، وڭىرىمىزدەن 244 جاس وقۋعا ءتۇستى. جالپى سوڭعى 3 جىلدا وڭتۇستىكتەن «سەرپىن-2050» باعدارلاماسى بويىنشا جوو-ندا 4698 ستۋدەنت، كوللەدجدەردە 929 جاس ءبىلىم الۋدا.

ال 2017 جىلى «سەرپىن-2050» باعدارلاماسى اياسىندا جوو-نا 3793 مەملەكەتتىك گرانت، ال كوللەدجدەرگە 720 گرانت ءبولىنىپ وتىر. 23-31 شىلدە ارالىعىندا مەملەكەتتىك گرانت يەگەرى اتانۋعا ءوڭىرىمىزدىڭ جاس تۇلەكتەرىنەن «سەرپىن» جوباسىنا 7849 قۇجات تاپسىرىلعان-دى.

Abai.kz