سەنبى, 4 شىلدە 2020
COVID-19 قازاقستاندا. جۇقتىرعاندار — 41065. جازىلعاندار — 13614. قايتىس بولعاندار — 188
«سوقىر» فەميدا 8477 2 پىكىر 10 مامىر, 2017 ساعات 09:18

ارداگەرگە كومەك دەپ مۇعالىمنەن اقشا جيناۋ زاڭدى ما؟

ارداگەر اتالارىمىز بولماسا، ءبىز وسىنداي بەيبىت كۇندە ءومىر سۇرەر مە ەدىك؟ بۇل ءسوزدى حالىقتىڭ كوبى ايتادى.  بۇعان داۋىم جوق.  دەگەنمەن سوعىستى جەڭگەن اتاۋلى كۇن مەن  ارداگەرلەردىڭ  اتىن ايتىپ اقشا جيناۋ نەگە، كىمگە  قاجەت بولدى؟

كوپ جىلداردان بەرى  الماتى وبلىسى ، قاراساي اۋدانىنىڭ بارلىق مەكتەپتەرىنىڭ مۇعالىمدەرىنىڭ  ءبىر كۇندىك جالاقىسىن  9-مامىرعا قارسى «ارداگەرلەرگە بەرەمىز» دەگەن جەلەۋمەن مەكتەپ ەسەپشىسى ارقىلى ۇستاپ وتىرادى. «ءوز ەركىمەن بەردى»  دەگىزىپ قول قويدىرىپ الاتىنى تاعى بار. قول قويماعان مۇعالىمنىڭ باسىنا قارا بۇلت ءۇيىرىلىپ، باعى تاياتىنى دا بارشاعا ءمالىم.

كەشە عانا ءساۋىر ايىنىڭ جالاقىسىنان 4000, 6000, 8000 تەڭگە كولەمىندە ءار مۇعالىمنىڭ جالاقىسىنان اقشا ۇستالدى. بۇل مالىمەتكە سەنبەيتىندەر بولسا، قاراساي اۋدانىنىڭ ءبىلىم بولىمىندە وتىرعان باس ەسەپشىنىڭ قۇجاتتارىن قاراپ شىعۋىنا بولادى.

ۇستازدار ءتورت مىڭ تەڭگە ءۇشىن قانشاما تەرىن توگەدى. قانشاما اتا-انانىڭ، وقۋشىنىڭ، شولاق بەلسەندىلەردىڭ ءسوزىن ەستىپ، ماڭداي تەرىمەن تاپقان اقشاسىن ءوز ەركىمەن قايىرىمدىلىققا جۇمساۋى مۇمكىن ەمەس.

وسى ورايدا قاراساي اۋدانىنىڭ اكىمى ماحاببات بەگەلديەۆكە بىرنەشە سۇراق قويعىم كەلەدى...

  1. قۇرمەتتى ماحاببات مىرزا! اۋدان بويىنشا ارداگەرلەرگە كومەك كورسەتۋ مۇعالىمدەردىڭ جالاقىسىنا قاراپ قالعانى ما؟
  2. قاراساي اۋدانى مۇعالىمدەردىڭ جالاقىسى بولماسا، ارداگەرلەرىن قۇرمەتتەي المايتىن بەيشارا اۋدان با ەدى؟
  3. ۇستازداردان ەرىكسىز قول قويدىرىپ اقشا جيناۋ قانشالىقتى زاڭدى؟
  4. مۇعالىمدەردەن جينالعان قارجىنىڭ ەسەبىن اۋداندىق ءبىلىم بولىمىنەن سۇراتىپ، اقشانىڭ قايدا كەتكەنىن انىقتاۋىڭىزدى سۇرايمىن.
  5. ەگەر قر زاڭدارىندا ارداگەرلەرگە مۇعالىمدەردىڭ قارجى جيناپ بەرۋى كەرەك دەگەن مىندەتتەمە (ارينە، جوق ەكەنى بەلگىلى) بار بولسا، ونى كورسەتىڭىز. ەگەر جوق بولسا، ۇستازداردىڭ جالاقىسىن تەز ارادا قايتارعىزۋىڭىزدى تالاپ ەتەمىن.

ايمان ساعيدوللا

Abai.kz

 

 

 

 

 

 

 

 

 

2 پىكىر