جەكسەنبى, 12 شىلدە 2020
COVID-19 قازاقستاندا. جۇقتىرعاندار — 58253. جازىلعاندار — 33814. قايتىس بولعاندار — 264
«سوقىر» فەميدا 5389 16 پىكىر 25 ءساۋىر, 2017 ساعات 11:19

ەلدە ادىلدىك ورناتۋدىڭ جالعىز جولى – جىرىندى توپ قۇرۋ

ءبىزدىڭ قوعامداعى ادىلەتتىڭ تارازىسى كەيدە كەم تارتادى، كەيدە ارتىق. شەكارادان وتكەن انانىڭ بار اقشاسىن تارتىپ الىپ، سوتقا سۇيرەگەندەردى جازالاۋ ءۇشىن نە ىستەمەك كەرەك؟.. ەشكىم جاۋاپ بەرە المايدى. بەسىكتەن بەلى شىقپاعان قىزدارىمىزدى زورلاپ كەتىپ جاتقانداردى شە؟ ولاردى 20 جىلعا سوتتاساڭ دا ازدىق ەتەدى. قاساقانا كىسى ءولتىرىپ، ەلباسىنىڭ راقىمشىلىعىنا ءىلىنىپ، تايراڭداپ جۇرگەندەر قانشاما؟ مۇندايلاردى ءبىر قۇداي جازالايدى دەپ قاشانعى كونە بەرمەك كەرەك؟

مەنىڭ ءبىر اقيقاتقا كوزىم جەتتى. قازاقتىڭ ەسەسىن قازىرگى زاڭىمىز قايتارىپ بەرە الماسىن كۇندە كورىپ ءجۇرمىز. و دۇنيەگە ءۇمىت ارتىپ، قانشاما تاعدىر ازاپ شەگىپ جاتىر. ءالسىزدى ءالدى بيلەپ-توستەگەن قوعامعا ءبىر وزگەرىس كەرەك.

وسىدان ءبىراز جىل بۇرىن قىتايعا بارعان كەزدە مىنا ءبىر وقيعانى ەستىپ تاڭ قالعانىم بار. حانزۋلار قازاق ەگىستىك ەگىپ وتىرعان ۇلتاراقتاي جەردى تارتىپ الا باستاعان ەكەن. سول جەردەگى قىرىققا جۋىق جىگىت اتقا قونىپ، بەتى-اۋزىن تۇمشالاپ الىپ، جەر ولشەۋگە كەلگەن حانزۋ ۇلىقتارىن قامشىنىڭ استىنا الىپتى. ارتىنشا، قىرىق جىگىت قىرىق باعىتقا قاشىپ، ۇستاتپاي كەتسە كەرەك. وسى ءبىر وقيعا حانزۋلاردىڭ زاڭسىز جەردى تارتىپ الۋىن ساپ تىيعان كورىنەدى. قازىردىڭ وزىندە ۇلىقتار قازاق اۋىلىنا بارۋعا جۇرەكسىنەتىن كورىنەدى.

مىنە، ءبىر وقيعانىڭ اسەرى.

تاعى ءبىر مىسال كەلتىرەيىن. بۇل جولعى وقيعا الماتى وبلىسى، رايىمبەك اۋدانىنىڭ نارىنقول اۋىلىندا بۇگىنگى كۇنى بولىپ جاتىر. ءبىر اۋمەسەر مەكتەپ جاسىنا بارماعان ءبۇلدىرشىندى زورلاماق بولىپ، قولعا تۇسەدى. مۇنى ەستىگەن نارىنقولدىقتار ۇدىرە تولقىپ، الگىنىڭ ءىسىن اۋداندىق پروكۋراتۋراعا تاپسىرادى. زاڭ ادامدارى «قىلمىسى دالەلدەنبەدى» دەگەن سىلتاۋمەن الگىنى بوساتىپ جىبەرگەن ەكەن. نارىنقول حالقى تولقىپ، جاۋىزدى ولتىرمەككە بەكىنەدى. قازىر ول سىرتقا شىعۋعا جۇرەكسىنىپ، اۋداندىق ىشكى ىستەر ءبولىمى عيماراتىندا تىعىلىپ جاتسا كەرەك.

مىنە، ەل ەكەنىمىزدى بىلدىرەتىن جاعداي.

سوڭعى كۇندەرى بولعان تاعى ءبىر وقيعانى باياندايىن. الماتىنىڭ ىرگەسىندەگى قوسوزەن اۋىلىندا دا ءبىر ەر جىگىت جاس ءبۇلدىرشىندى زورلاماق بولىپ، قولىن سىندىرعان. مۇنى الگى ءبۇلدىرشىننىڭ اۋرۋحانادا جاتقان اتاسى ەستىپ اشۋلانىپ، قىسىمى كوتەرىلىپ قايتىس بولىپ كەتتى.

قىزدىڭ تاعدىرىن ءبىر قۇرتىپ، شالدىڭ ولىمىنە سەبەپكەر بولعان ادامعا قانداي جازا لايىقتى؟ مۇنى ءبىزدىڭ زاڭىمىزعا سالساق، قىلمىسكەر ءبۇلدىرشىننىڭ قولىن سىندىرعانى ءۇشىن عانا جازا شەگەدى.

وسىنداي قىم-قۋىت، ءتۇرلى وقيعالار كوبەيگەن سايىن بىزگە ۇلتتىڭ نامىسىن جىرتاتىن جىرىندى توپ قۇرۋ كەرەكتىگى سەزىلەدى. ولار كۇندەلىكتى ەمەس، جىلىنا ءبىر رەت ۇلتتىڭ ەسەسى كەتەر جاعدايعا تويتارىس بەرسە، وزگەلەر اياعىن اڭداپ باسار ما ەدى.

ءسىز قالا ويلايسىز؟

ءشارىپحان قايسار

Abai.kz

16 پىكىر