«جازۋشىنىڭ ءبىر عانا ۇستازى بار، ول – وقىرمان»، - دەپتى گوگول. وسى وقىرمان مەن اۆتور اراسىنداعى بىردەن-ءبىر التىن كوپىر - كىتاپحانا مەن كىتاپحاناشى.

ءبىزدىڭ باستى ماقسات - كىتاپ وقىلۋىن ناسيحاتتاۋ. وقىرمان سان ءتۇرلى. ولاردىڭ تالعامىنان شىعۋ ءۇشىن ءبىر ءسات اڭگىمەلەسسەڭ بولدى. مەنىڭ ءبىر وقىرمانىم بار، شەكسپيردى تۇپنۇسقادان وقيدى، قاراپايىم جۇرگىزۋشى، بىراق اعىلشىن تىلىندە... دەپ باسىندا تاڭعالعانبىز. كىتاپتى تەك ادەبيەتشىلەر، بولماسا جۋرناليستەر، عالىمدار عانا ءتۇسىنىپ وقيدى، شىن باعاسىن سولار عانا بەرە الادى دەگەن ويدان وسىدان كەيىن اۋلاق بولاسىڭ.

ايتپاعىم بۇل ەمەس. ءبىر وقىرمان كەلدى، م.ماعاۋيننىڭ شىعارمالارىن سۇراپ. ءوزى تۋرالى مالىمەت تولتىردى. قاراپايىم تەمىرجولشى. ەڭ سۇيىكتى جازۋشىم دەيدى. «الاساپىراندى» قايتالاپ وقيدى ەكەن جىل سايىن.

«الاساپىران»، «اقشا قار»، ء«بىر اتانىڭ بالالارى»، «قيانداعى قىستاۋ»، «كوك كەپتەر»، «كوك مۇنار»، «شاقان شەرى»، «قىپشاق ارۋى»... جازۋشىنىڭ قاي شىعارماسىن الساڭ دا وقىرمان سۇرانىسىنا يە.

«جازۋشى دەگەن ءسوز قالاۋشىسى، ءسوز كەستەشىسى، ءسوز زەرگەرى، ءسوز زەرگەرى بولعاندا جاي عانا زەرگەر ەمەس، ءسوز ارقىلى ادامنىڭ جان دۇنيەسىن، سانا-سەزىمىن تاربيەلەيتىن زەرگەر. سوندىقتان دا ول «ادام جانىنىڭ ينجەنەرى» دەيدى ساكەن سەيفۋللين. «ادەبيەتتىڭ ارحەولوگى» دەگەن اتاققا يە بولعان م.ماعاۋين كەز كەلگەن قالامگەر بارا بەرمەيتىن تاريحتى تولعادى. اناۋ دەپ سىن ايتاتىن، شىعارماسىن سارالايتىن سىنشى ەمەسپىن. مەن تەك وقىرمانداردىڭ ىزدەپ وقيتىن، ءسۇيىپ وقيتىن جازۋشىسى، ءجاي عانا قاتارداعى جازۋشى ەمەس، ءوز شىققان بيىگى بار جازۋشى، وقىرماندارىنان جوعارى باعا العان، الا بەرەتىن قالامگەر دەگىم كەلەدى.

بۇكىلالەمدىك جاھاندانۋ كەلدى، كىتاپتى عالامتور ايىرباستادى، بارماعىنىڭ باسىنان ءبىلىم تامعان ۇرپاق ءوسىپ كەلەدى دەپ بايبالام سالىپ جاتىرمىز.

مۇنى جوققا شىعارا المايمىن. بىراق، كەشە عانا «الاساپىران» مەن «قىپشاق ارۋىن» الىپ كەتكەن ورىمدەي وقىرمانعا قاراپ تاۋبە دەدىم.

وتكەنسىز بۇگىن جوق، بۇگىنسىز بولاشاق جوق. م.ماعاۋين – وتكەندى سويلەتكەن، تىرىلتكەن، بۇگىنگە الىپ كەلگەن قارىمدى قالامگەر. ۇلتىم دەگەن ۇلكەن جۇرەگى مەن قارىمدى قالامى شىعارعان بيىگىندە تۇر. تالاي ۇرپاق سۋسىنداعان جازۋشىنىڭ جاقۇت شىعارمالارىنا ءالى تالاي ۇرپاق سۇيسىنە وتىرىپ سۋسىندايتىنىنا كامىل سەنەمىن.

تۇلعانىڭ تۋعان كۇنىندە وقىرماندارىنىڭ شىن جۇرەكتەرىنەن شىققان قۇتتىقتاۋلارىن جەتكىزۋ باقىتى ماعان بۇيىرعانىنا ريزامىن!

دەنساۋلىعىڭىز مىقتى بولسىن! اللانىڭ بەرگەن جاسىن جاساڭىز! سان مىڭداعان وقىرماندارىڭىزدىڭ جىلى لەبىزى وسى!

عازيزا قۇدايبەرگەن،

كىتاپحاناشى.

اباي.kz