وڭتۇستىك قازاقستان وبلىسىنىڭ سارىاعاش اۋدانىنا قاراستى اۋىلداردىڭ بىرىندە كىسى ءولتىرىلىپ، سونىڭ كەسىرىنەن جاپپاي تارتىپسىزدىك بولدى. بۇل تۋرالى وبلىستىق ىشكى ىستەر باسقارماسىنىڭ ءباسپاسوز قىزمەتى حابارلادى.
وقيعا 4 اقپان كۇنى تۇندە بولعان. سارىاعاش اۋدانىنا قاراستى بوستاندىق اۋىلىنا جاقىن جەردە كورشى ىنتىماق اۋلىنىڭ تۇرعىنى، 1985 جىلى تۋعان ب.د.ارتىقوۆتىڭ ءمايىتى تابىلعان. ءمايىتتىڭ دەنەسىندە پىشاقتاۋدان قالعان اۋىر جاراقات ىزدەرى بار.
كىسى ءولىمى بويىنشا قىلمىستىق ءىس قوزعالىپ، كۇدىكتى رەتىندە سارىاعاش اۋدانىنا قاراستى بوستاندىق اۋىلىنىڭ تۇرعىنى 1976 جىلى تۋعان نارمەتوۆ ىزدەستىرىلىپ جاتىر.
قىلمىستىق وقيعاعا نارمەتوۆ جالعا الىپ وتىرعان ارتىقوۆتىڭ جىلىجايىنا بايلانىستى جاعداي سەبەپ بولعان كورىنەدى.
وسى وقيعادان كەيىن، 5 اقپان كۇنى ارتىقوۆتىڭ اۋىلداستارى، ءبىر توپ جاس كورشىلەس اۋىلعا كەلىپ، بىرنەشە ماشينانى ورتەپ، ءبىردى-ەكىلى ۇيگە شىعىن كەلتىرگەن.
بۇل تارتىپسىزدىكتەردى دەر ۋاقىتىندا پوليتسيا توقتاتقان. قازىر وقيعا بولعان اۋىلدا تىنىشتىق ورناپ، قۇزىرلى ورىندار جۇمىس ىستەپ جاتىر.

Abai.kz