م.و.اۋەزوۆ اتىنداعى قازاق مەملەكەتتىك اكادەميالىق دراما تەاترى ۇيىمداستىرعان بايقاۋ جەڭىمپازدارى انىقتالدى. بايقاۋ ناتيجەسى بويىنشا بىرقاتار باق وكىلدەرى بىرنەشە نوميناتسيا بويىنشا ماراپاتتالدى. بۇل تۋرالى تەاتردىڭ ءباسپاسوز قىزمەتى حابارلاپ وتىر.

«ۇزدىك ماقالا»: بەكتاسوۆا گۇلزينا تۇرعانبايقىزى – «ايقىن» رەسپۋبليكالىق قوعامدىق ساياسي گازەتىنىڭ «مادەنيەت جانە الەۋمەت» ءبولىمىنىڭ رەداكتورى. تەاتر ءومىرى مەن ارتيستەردىڭ شىعارماشىلىعىن ءجىتى قاداعالاپ، تۇراقتى تۇردە جازىپ كەلەدى. تەاترمەن تىعىز بايلانىستىلىعى ءار جازعان ماقالاسىنان ايقىن اڭعارىلادى. تولەۋبەك ارالباي، شىنار جانىسبەكوۆا، بەكجان تۇرىس، ەسمۇحان وباەۆپەن سۇحباتتارى، جاڭا پرەمەرالارعا جازعان تالداۋى جىلى قابىلداندى.

«ۇزدىك تەلەحابار»: قوجابەك ريشات اسقاربەكۇلى – «استانا» تەلەارناسىنىڭ ءجۋرناليسى. قاراشاڭىراقتا بولعان جاڭالىقتاردىڭ ەفير ارقىلى جىلدام تارالىپ، كورەرمەندەرگە كەڭ كولەمدى اقپارات بەرۋدە ايانباي كەلەدى. تەاتردا وتكەن ءار پرەمەرا – ريشاتتىڭ نازارىندا. مۇقاعالي ماقاتەۆقا ارنالعان پوەزيا كەشىن، «سىرلاسۋ» كلۋبىندا وتكەن اكتەرلەر عانيكامال بايقوشقاروۆا، جالعاس تولعانباي، اسىلبەك بورانباي مەن شىنار جانىسبەكوۆانىڭ كورەرمەنمەن وتكەن كەزدەسۋىن، تەاتر پرەمەرالارىن «استانا» ارناسىنىڭ «جاڭالىقتارىنان» جان جاقتى كورسەتتى.

«ۇزدىك سۇحبات»: الىشەۆا نۇرجامال جۇماعاليقىزى – الماتى وبلىستىك كوعامدىق-ساياسي «جەتىسۋ» گازەتىنىڭ مادەنيەت ءبولىمىنىڭ رەداكتورى. جەتىسۋلىق تالانتتاردى عانا ەمەس، ونەرىمەن كورەرمەن نازارىن اۋدارعان وزگە دە قارىمدى اكتەرلەردىڭ ويىنىن تالداپ كورسەتۋدەن تالماي كەلەدى. شامشاگۇل مەڭدياروۆا، جولامان ءامىروۆ، الماس شاياحمەتوۆ، ناز جەكەنوۆا، نۇرلان ءابىلوۆ، سۋرەتشى-ستسەنوگراف ەرىك ادىسبەك شىعارماشىلىعى تۋرالى «سەنبىلىك كەزدەسۋ» ايدارىمەن كولەمدى سۇحباتتار سەرياسىن ازىرلەدى.

«ۇزدىك تەاتر جارناماسى»: سۇلتانعازيەۆ نۇربولات ابايۇلى – ء«بىلىم جانە مادەنيەت» تەلارناسىنىڭ «قايىرلى تاڭ» تاڭعى اقپاراتتىق-تانىمدىق باعدارلاماسىنىڭ رەداكتورى. تەاتر ديرەكتورى ەركىن جۋاسبەك، زاۋرە كوپجاساروۆا، تۇڭعىشباي جامانقۇلوۆ، ءساليحا قوجاقوۆا، جولامان ءامىروۆ، شىنار اسقاروۆا تۋرالى تسيكلدى حابارلار دايىندادى.

«ۇزدىك ماقالا»: مۋستافينا ميرا تولەۋحانقىزى – «ليتەر» رەسپۋبليكالىق قوعامدىق-ساياسي گازەتىنىڭ ءتىلشىسى. سپەكتاكلدەردى ءجيى قاداعالايتىن جۋرناليستەردىڭ قاتارىنان. تەاتر ءومىرىن سىرتتان ەمەس، ىشتەن بىلەدى. اكتەرلەردىڭ ىلگەرىدەگى، كەيىنگى ويىندارىن ءبىر-بىرىمەن سالىستىرىپ جازۋدىڭ شەبەرى. «شىنى حايۋانات»، ء«جۇز جىلدىق ماحاببات»، «وتتەلو» ، «دون سەزار دە بازان» پرەمەرالارى تۋرالى جان-جاقتى جازىلعان ساراپتامالىق ماقالالارىن جاريالادى.

اباي-اقپارات.