«قازاتومونەركاسىپ» ۇلتتىق اتوم كومپانياسى اق باسقارما باسشىسى نۇرلان قاپپاروۆتىڭ كەنەتتەن كەلگەن قازاسىنىڭ جاي-جاپسارى تۋرالى ءوز دەرەككوزدەرىنە سىلتەمە جاساپ zakon.kz سايتى  جازدى.

قاپپاروۆ دۋبايدان سا942 رەيسىمەن 26 ناۋرىز كۇنى 13.40-تا بەيجىڭگە كەلگەن. ونى اتالعان كاسىپورىننىڭ بەيجىڭدەگى فيليالىنىڭ ديرەكتورى اشىقباەۆ پەن بەيسەنوۆ ەسىمدى ازامات قارسى العان. قوناقۇيگە بارار جولدا تۇسكى اس ءۇشىن ولار تسزينباو رەستورانىنا توقتاعان. داستارحانعا وتىرار الدىندا «قازاتومونەركاسىپ» باسشىسى اجەتحاناعا شىققان. ونى تەحنيكالىق قىزمەتكەرلەر 14.20 ۋاقىتىندا  بايقاپ مەديتسينالىق قىزمەتتى شاقىرتادى. 14.27 مينۋتتا مەديتسينالىق قىزمەتكەرلەر وعان  جۇرەك كارديوگرامماسىن جاساپ، جۇرەگىنىڭ توقتاپ قالعانى تۋرالى حابارلاعان. جۇرەككە ماسساج جاساپ، ءتۇرلى شارالار قابىلداعانمەن ناتيجە بەرمەگەن. 14.33 ۋاقىتىندا ايماقتىق چاويانگ ەمحاناسىنا جەتكىزىلگەن قاپپاروۆتىڭ 14.50 مينۋتتا قايتىس بولعانى تۋرالى حابارلانعان.

قاپپاروۆ مىرزا شەتەلگە ساپارلارىندا جەكە كۇزەتسىز جۇرە بەرگەن ەكەن. بۇل ساپارىندا ول بەيجىڭگە قازاقستاننىڭ رەسمي دەلەگاتسياسى قاتارىندا كەلگەن.

گارۆارد ۋنيۆەرسيتەتىنىڭ دج. كەننەدي اتىنداعى جوعارى باسقارۋ مەكتەبىن بىتىرگەن، ماماندىعى بويىنشا ينجەنەر-ەكونوميست، مەملەكەتتىك باسقارۋ ماگيسترى نۇرلان قاپپاروۆ وتكەن جىلدىڭ تامىز ايىندا «قازاتومونەركاسىپ» باسشىسى بولىپ تاعايىندالعان ەدى. بۇل قىزمەتىنە دەيىن قر قورشاعان ورتانى قورعاۋ ءمينيسترى(2012 جىلدىڭ قاڭتارىنان 2014 تامىزىنا دەيىن) بولعان ول بۇگىن 45 جاسقا تولۋى ءتيىس ەدى.

«قازاتومونەركاسىپ» اق (قازاقستاننىڭ ۇلتتىق اتوم كومپانياسى) — قازاقستاننىڭ ۋران جانە وزگە مەتالداردى ەكسپورتتاۋ جونىندەگى ۇلتتىق وپەراتورى. 1997 ج. 14 شىلدەدە قۇرىلعان كومپانيانىڭ 100% اكتسياسى مەملەكەتكە تيەسىلى. بۇگىندە الەمدەگى ۋران قاجەتتىلىگىنىڭ 38% ءىن قامتاماسىز ەتەتىن ءىرى ونەركاسىپ بولىپ سانالادى.  «قازاتومونەركاسىپ» جارعىسىنا ساي اكتسيونەرلىك قوعامنىڭ ديرەكتورلار كەڭەسىنىڭ شەشىمدەرى باسقارما باسشىسىنان بيىك تۇرادى. 2009 جىلى 22 مامىردان باستاپ بىلتىر ەنەرگەتيكا ءمينيسترى قىزمەتىنە تاعايىندالعانعا دەيىن «قازاتومونەركاسىپ» كومپانياسىنىڭ باسشىسى بولعان ۆلاديمير شكولنيك قازىرگى كۇندە اتالعان كاسىپورىننىڭ ديرەكتورلار كەڭەسىنىڭ توراعاسى.

«قازاتومونەركاسىپ» دەسە ەلدىڭ ەسىنە الدىمەن ورالاتىن ەسىم مۇحتار جاكىشەۆ. بۇگىندە تۇرمەدە وتىرعان ەكس-باسشى العاش رەت 1998 جىلى كامپانياعا باسشى بولىپ تاعايىندالعان. «مۇلىكتى يەمدەنىپ، پارا العانى ءۇشىن» 2010 جىلى 14 جىلعا سوتتالعان ول، 2012 جىلى ەكىنشى قىلمىستىق ءىس بويىنشا 10 جىلعا باس بوستاندىعىنان ايىرىلدى. ول قاماۋعا الىنعان مەرزىمدە جۇبايىنىڭ تۇتقىندالۋى، ءوزىڭنىڭ تۇرمەدە سوققىعا جىعىلۋى تۋرالى اقپاراتپەن قاتار، بىلتىر قايىن اتاسىنا قاراقشىلىق شابۋىل جاسالعانى تۋرالى دا اقپاراتتار تارالعان بولاتىن.

نۇرعالي نۇرتاي

Abai.kz