اقتاۋدا 400 وتباسى «قولجەتىمدى تۇرعىن ءۇي – 2020» باعدارلاماسىمەن سالىنعان پاتەرلەردىڭ كىلتىن الدى

اقتاۋ قالاسىنىڭ 32 ا ىقشاماۋدانىنان 400 وتباسى تۇرعىن ءۇي قۇرىلىس جيناق بانكى جەلىسى بويىنشا «قولجەتىمدى تۇرعىن ءۇي – 2020» باعدارلاماسىمەن سالىنعان پاتەرلەردىڭ كىلتىن الدى. جىل سوڭىنا دەيىن  قتقجب جەلىسى بويىنشا باعدارلاماعا قاتىسۋشىلار ءۇشىن 120 جانە 670 پاتەرلى تاعى دا ەكى ءۇيدىڭ قۇرىلىسىن اياقتاۋ جوسپارلانىپ وتىر.

سالتاناتتى جيىنعا ماڭعىستاۋ وبلىسىنىڭ اكىمى اليك ايدارباەۆ جانە «قازاقستاننىڭ تۇرعىن ءۇي قۇرىلىس جيناق بانكى» اق باسقارما توراعاسىنىڭ ورىنباسارى ەربول قاراشۇكەەۆ قاتىستى.

- بىلتىر ماڭعىستاۋ وبلىسىندا 587 مىڭ شارشى مەتر تۇرعىن ءۇي پايدالانۋعا بەرىلدى. «قولجەتىمدى تۇرعىن ءۇي – 2020» باعدارلاماسى اياسىندا 492 وتباسى جاڭا پاتەرگە يە بولدى. بيىل جاس وتباسىلارعا ارنالعان 60 پاتەرلى ەكى ءۇيدىڭ، 32 «ا» ىقشاماۋدانىندا تۇرعىن ءۇي قۇرىلىس جيناق بانكى جەلىسى بويىنشا «حالىقتىڭ بارلىق ساناتىنا ارنالعان» 120 پاتەرلى تۇرعىن ءۇيدىڭ، ءۇيدىڭ كەزەگىندە تۇرعاندارعا 120 پاتەرلى ءۇش ءۇيدىڭ، «اققۋ ىقشاماۋدانىنداعى ەكىنشى كەزەكتەگى ۇيلەردىڭ قۇرىلىسى  اياقتالادى. سونداي-اق مەملەكەتتىك باعدارلاما بويىنشا سالىناتىن «اققۋ» ىقشاماۋدانىنداعى ءۇشىنشى كەزەكتەگى ۇيلەردىڭ جانە 34 ىقشاماۋداندا 60 پاتەرلى ۇيلەردى سالۋ جوسپارلانىپ وتىر. ءبىز ماڭعىستاۋلىقتاردىڭ ءبارىن تۇگەلدەي قولجەتىمدى ءارى ساپالى تۇرعىن ۇيمەن قامتاسىز ەتۋگە ءتيىسپىز، – دەدى ماڭعىستاۋ وبلىسىنىڭ اكىمى اليك ايدارباەۆ.

ەلباسى جاريالاعان «نۇرلى جول» جەس جۇزەگە اسا باستاعاندا، قولجەتىمدى باسپانامەن قامتاماسىز ەتۋگە باسا نازار اۋدارىلاتىن بولادى. ماسەلەن، قتقجب جەلىسىمەن الەۋمەتتىك تۇرعىن ءۇي قۇرىلىسىن دەر كەزىندە ءبىتىرۋ ءۇشىن، 2015 جىلى ۇلتتىق قوردان قوسىمشا 30 ميلليارد تەڭگە بولىنبەك.

- ەلىمىز ءۇشىن اسا ماڭىزدى وقيعا – پرەزيدەنت سايلاۋى قارساڭىندا جاڭا قونىس يەلەرى جاڭا ءومىردى باستاماق، - دەدى، قتقجب باسقارماسى توراعاسىنىڭ ورىنباسارى ە.قاراشۇكەەۆ، – ءبىز قازىرگى پرەزيدەنت جاريالاعان «نۇرلى جول» جاڭا ەكونوميكالىق ساياساتىن  قولدايمىز. ونىڭ باستى باعىتى – ازاماتتاردى قولجەتىمدى باسپانامەن قامتاماسىز ەتۋ. بيىل تەك قانا تۇرعىن ءۇي قۇرىلىس جيناق بانكى جەلىسىمەن سالىنىپ جاتقان قۇرىلىستاردىڭ ۋاقتىلى اياقتالۋى ءۇشىن  ۇكىمەت ۇلتتىق قوردان قوسىمشا 30 ميلليارد تەڭگە ءبولىپ وتىر. جۇزدەگەن قازاقستاندىق وتباسىنىڭ كوپتەن كۇتكەن قونىس تويىن تويلاۋى ءۇشىن، ءبىز، اكىمدىكتەرمەن بىرگە، قولىمىزدان كەلگەننىڭ ءبارىن جاسايتىن بولامىز، – دەپ تۇيىندەدى قاراشۇكەەۆ. 

بيىل ەلىمىزدە «حالىقتىڭ بارلىق ساناتىنا ارنالعان تۇرعىن ءۇي» باعىتىمەن 301,7 مىڭ شارشى مەتر ءۇيدىڭ قۇرىلىسىن اياقتاۋ جوسپارلانىپ وتىر. الايدا، جەرگىلىكتى اتقارۋ ورگاندارىمەن جاسالعان كەلىسىم بويىنشا،  2015 جىلى اۋدانى 400 مىڭ شارشى مەتر بولاتىن تۇرعىن ءۇي پايدالانۋعا بەرىلمەك. بۇل جوسپارداعىدان 100 مىڭ شارشى مەترگە ارتىق. ال «جاس وتباسىعا ارنالعان تۇرعىن ءۇي» باعىتى بويىنشا 191, 7 مىڭ شارشى مەتر سالىنۋعا ءتيىس.

2015 جىلدىڭ 1 قاڭتارىنان باستاپ «قولجەتىمدى تۇرعىن ءۇي – 2020» باعدارلاماسى كەشەندى «2020 جىلعا دەيىن وڭىرلەردى دامىتۋ باعدارلاماسىنىڭ» ءبىر بولىگىنە اينالدى. جاڭا قۇجات ايماقتار مەن ءىرى اگلومەراتسيالاردى كەشەندى تۇردە دامىتۋعا مۇمكىندىك بەرەدى.

ەستەرىڭىزگە سالا كەتسەك، «قازاقستاننىڭ تۇرعىن ءۇي قۇرىلىس جيناق بانكى» اق «بايتەرەك» ۇلتتىق باسقارۋشى حولدينگىنىڭ» ەنشىلەس كومپانياسى بولىپ تابىلادى. حولدينگتىڭ ماقساتى – ەكونوميكانىڭ دامۋىنا جانە ارتاراپتاندىرۋعا ىقپالداستىق جاساۋ، كلاستەرلەردى دامىتۋ جانە  ونىڭ ەنشىلەس ۇيىمدارىندا كورپوراتيۆتى  باسقارۋ جۇيەسىن جەتىلدىرۋ.

اباي-اقپارات.