بيىل قازاقستاندىقتار تۇرعىن ءۇي قۇرىلىس جيناق بانكى جەلىسىمەن 10 مىڭعا جۋىق پاتەر الادى

ەلىمىزدەگى 17 ەلدىمەكەننىڭ تۇرعىندارى باعاسى قىمبات ەمەس، قولجەتىمدى تۇرعىن ءۇيدىڭ يەسى اتانباق. وڭىرلەردى دامىتۋدىڭ 2020 جىلعا دەيىنگى باعدارلاماسى ءىرى مەگاپوليستەردى عانا ەمەس، ەلىمىزدىڭ وبلىس ورتالىقتارى مەن شاعىن قالالارىن دا قامتىعان. قۇرىلىستار ۋاقىتىندا اياقتالسا، تۇرعىن ءۇي قۇرىلىس جيناق بانكى جەلىسىمەن اۋدانى 570 مىڭ شارشى مەتر بولاتىن تۇرعىن ۇيلەر پايدالانۋعا بەرىلۋى ءتيىس.

ماسەلەن، جەرگىلىكتى اكىمدىكتەرمەن ارادا قول قويىلعان كەلىسىم نەگىزىندە، «حالىقتىڭ بارلىق ساناتىنا ارنالعان تۇرعىن ءۇي» باعىتىمەن 6 906 پاتەردىڭ قۇرىلىسى اياقتالۋعا جاقىن تۇر. پايدالانۋعا بەرىلگەن تۇرعىن ءۇي سانى جونىنەن الماتى مەن استانا كوش باستاپ كەلەدى. دالىرەك ايتساق، الماتىدا – 1 376 پاتەر، ال استانادا 994 پاتەر ءوز يەلەرىن تاپقان.

«جاس وتباسىعا ارنالعان تۇرعىن ءۇي» باعىتىمەن بيىل 2 760 پاتەر پايدالانۋعا بەرىلۋى ءتيىس. بۇل جەردە دە ەلوردامىز توپ جارىپ تۇر – بەرىلەتىن پاتەرلەردىڭ سانى 672. ەكىنشى ورىن وسكەمەنگە تيەسىلى. بۇل جەردە 435 وتباسى پاتەر كىلتىن الاتىن بولادى. ءۇشىنشى ورىن شىمكەنت پەن قاراعاندى شاھارلارىنىڭ ەنشىسىنە ءتيىپ وتىر. بۇل قالالاردىڭ ارقايسىسى 216 پاتەردى پايدالانۋعا بەرمەك.

بيىل العاشقىلاردىڭ ءبىرى بولىپ اقتاۋ قالاسىنىڭ تۇرعىندارى قونىس تويىن تويلادى. 400 وتباسىنا «قولجەتىمدى تۇرعىن ءۇي–2020» باعدارلاماسى بويىنشا تۇرعىن ءۇي قۇرىلىس جيناق بانكى جەلىسىمەن سالىنعان پاتەرلەردىڭ كىلتى تابىس ەتىلدى. بۇدان بولەك، ماڭعىستاۋ وبلىسىندا وسى جىلدىڭ سوڭىنا قاراي ءبىرى – 120 پاتەرلى، ءبىرى – 670 پاتەرلى ەكى ءۇيدىڭ قۇرىلىس اياقتالماق. بۇل پاتەرلەرگە قتقجب جەلىسىمەن باعدارلاماعا قاتىسۋشىلاردىڭ يە بولاتىنى تۇسىنىكتى.

بانك باعىتىمەن قولجەتىمدى تۇرعىن ءۇي قۇرىلىسىنىڭ دەر كەزىندە اياقتالۋى ءۇشىن، 2015 جىلى ۇلتتىق قوردان قوسىمشا 30 ميلليارد تەڭگە ءبولىندى.

تۇرعىن ءۇي قۇرىلىس جيناق بانكى تۇرعىن ءۇي قۇرىلىس جيناق جۇيەسىنىڭ قارجىسىن دا ۇتىمدى پايدالانىپ كەلەدى. بۇل مەملەكەت بيۋدجەتىنە تۇسەتىن سالماقتى ەداۋىر ازايتتى. ايتالىق، «قولجەتىمدى تۇرعىن ءۇي–2020» باعدارلاماسىمەن سالىنعان ۇيلەردىڭ وتەۋى رەتىندە، بانك بيۋدجەتكە 60 ميلليارد تەڭگەنى مەرزىمىنەن بۇرىن قايتارىپ بەردى. بيىل تاعى دا 30 ميلليارد تەڭگەنى قايتارۋدى جوسپارلاپ وتىر.

ايتا كەتەتىن جايت، «قازاقستاننىڭ تۇرعىن ءۇي قۇرىلىس جيناق بانكى» اق – «بايتەرەك» ۇلتتىق باسقارۋشى حولدينگى» اق-نىڭ ەنشىلەس كومپانياسى.

اباي-اقپارات