تۇرعىن ءۇي قۇرىلىس جيناق بانكى جانىنداعى قوعامدىق كەڭەس استاناداعى تۇيتكىلدى نىساننىڭ قۇرىلىس الاڭىندا كوشپەلى وتىرىس وتكىزەدى.

ءدال قازىر باستاماشىل توپتىڭ 20-دان استام ادامى – بانك سالىمشىلارى، قوعامدىق كەڭەستىڭ مۇشەلەرى، اكىمدىك وكىلدەرى، قۇرىلىسشىلار مەن جۋرناليستەر سالىنىپ بىتپەگەن ۇيگە جينالدى. اڭگىمە استاناداعى ساۋران جانە №24 كوشەلەرىنىڭ قيىلىسىنداعى كوپ پاتەرلى تۇرعىن ءۇي كەشەنى تۋرالى بولىپ وتىر. جاڭا ۇيدە 242 پاتەر بار. بۇل پاتەرلەر «قولجەتىمدى تۇرعىن ءۇي–2020» باعدارلاماسى اياسىندا «حالىقتىڭ بارلىق ساناتىنا ارنالعان تۇرعىن ءۇي» باعدارلاماسى بويىنشا ساتىلۋى ءتيىس ەدءى. بىراق ادامدار ءبىر جارىم جىلدان بەرى بۇل پاتەرلەردىڭ كىلتىنە قول جەتكىزە الماي كەلەدى.

تۇرعىن ءۇيدى سارىلا كۇتىپ جۇرگەن قتقجب سالىمشىلارى ءالى كۇنگە دەيىن پاتەر جالداپ نەمەسە تۋىسقاندارىنىڭ ءۇيىن جاعالاپ كۇن كەشۋگە ءماجبۇر. ولار بىرنەشە مارتە قوعامدىق كەڭەسكە شاعىم ءتۇسىردى. شاعىم جيىلەپ كەتكەن سوڭ، بۇل ادامدارمەن قۇرىلىس نىسانىندا كەزدەسۋ وتكىزۋگە بايلام جاسالدى.

قۇرىلىس سالۋشى 2013 جىلدىڭ جەلتوقسان ايىنا دەيىن تۇيتكىلدى كەشەننىڭ قۇرىلىسىن سالىپ ءبىتىرۋى كەرەك ەدى. بىراق پايدالانۋعا بەرۋ مەرزىمى ۇدايى كەيىن شەگەرىلىپ كەلەدى. بۇل جولى قۇرىلىس كومپانياسى 2015 جىلدىڭ جاز ايىندا بەرەمىز دەپ مەجە بەلگىلەپ وتىر. ايتا كەتەيىك, بۇل پاتەرلەردىڭ جالپى اۋدانى 10 مىڭ شارشى مەتردەن اسىپ جىعىلادى.

تۇرعىن ءۇي قۇرىلىس جيناق بانكى ماماندارىنىڭ سوزىنە قاراعاندا، ءىس جۇزىندە ءۇي دايىن تۇر. بىراق وعان جىلۋ كوزدەرى ورناتىلماعان. شاھاردىڭ كوممۋنالدىق قىزمەتىنىڭ تالابى بويىنشا، قۇرىلىس سالۋشى جىلۋ جۇيەسىن وسى ۋاقىتقا دەيىن ەكى مارتە قايتا جۇرگىزىپتى.

نىسانداعى ولقىلىقتاردىڭ قاشان جويىلاتىنى، ادامداردىڭ پاتەرلەرگە قاشان كوشىپ كىرەتىنى وتىرىس اياقتالاردا بەلگىلى بولماق. قوعامدىق كەڭەس مۇشەلەرى بۇل جايىندا قوسىمشا حابارلاماقشى.

اباي-اقپارات