قازاقستان رەسپۋبليكاسىندا قىزمەتتىك اۆتوكولىكتى ساتىپ الۋعا باعىتتالعان 1 ملرد. تەڭگەدەن استام قارجىلىق شىعىستار وڭتايلاندىرىلادى. قر قارجى مينيسترلىگى قارجىلىق باقىلاۋ كوميتەتى جۇرگىزگەن ءىس-شارالاردىڭ ارقاسىندا نەگىزسىز شىعىندارعا جول بەرىلمەدى، دەپ حابارلايدى BNews.kz. 

مەملەكەت باسشىسىنىڭ بيۋدجەت قاراجاتىن ءتيىمدى جانە دۇرىس پايدالانىلۋدى قامتاماسىز ەتۋ جونىندەگى تاپسىرماسىن ورىنداۋ ماقساتىندا قر قارجى مينيسترلىگى ۆەدومستۆو قۇرامىنا كىرەتىن كوميتەتتەردىڭ قۇزىرەتتى قىزمەتكەرلەرىنىڭ اراسىندا ارنايى جۇمىس توبىن قۇرعان. ولار تەكسەرۋ بارىسىندا ەلدىڭ وڭىرلەرىندە ءبىر ساناتتاعى ءاۆتوموبيلدى ساتىپ الۋعا بولىنەتىن بيۋدجەت قاراجاتىنداعى ايىرماشىلىق 40%-عا دەيىن جەتەتىنىن انىقتاعان. ياعني ءبىر ساناتتاعى سول ءبىر ءاۆتوموبيلدىڭ قۇنى ءبىر وڭىردە باسقا وڭىرلەرگە قاراعاندا ءبىرشاما جوعارى بولعان. قر بويىنشا باعانى اسىرىپ كورسەتۋ ايىرماشىلىعى 1 ملرد. تەڭگەنى قۇراعان.
ۆەدومستۆونىڭ مالىمەتىنشە، اۆتوكولىكتى ساتىپ الۋ ءۇشىن بيۋدجەت قاراجاتىن قاراستىرىلعان قارجى كولەمىن اسىرىپ كورسەتۋ جاعىنان العاشقى ۇشتىككە جامبىل (146 956,1 مىڭ تەڭگە), شىعىس قازاقستان (90 630,9 مىڭ تەڭگە) جانە اقمولا (78 863,6 مىڭ تەڭگە) وبلىستارى ەنىپ وتىر.

قر قم قبك-ءنىڭ ساراپشىلارى بيۋدجەت قاراجاتىنىڭ اركەلكى جانە ساپاسىز جوسپارلانۋى مەملەكەتتىك بيۋدجەت قاراجاتىن ۇنەمدەۋدە نەگىزسىز شىعىندارعا جول بەرەر ەدى دەپ وتىر. كوميسسيانىڭ جۇمىسى ناتيجەسىندە كولىك قۇرالدارىنا بولىنگەن جوسپارلى قارجىلاندىرۋدىڭ شىعىندارى 1 305, 8 ملن تەڭگەگە قىسقاردى. وسىنىڭ نەگىزىندە ۇنەمدەلگەن قارجىنى باسقا دا الەۋمەتتىك ماڭىزى بار ماقساتتارعا جۇمساۋعا مۇمكىندىك تۋدى. بۇل باعىتتاعى جۇمىستار جالعاستىرىلاتىن بولادى، دەيدى قۇزىرلى مەكەمەدەگىلەر. 

اباي-اقپارات