قازاقستان رەسپۋبليكاسى پرەزيدەنتى ن.ءا.نازارباەۆتىڭ قازاقستان حالقىنا ارناعان «قازاقستان جاڭا جاھاندىق ناقتى احۋالدا: ءوسىم، رەفورمالار، دامۋ» جولداۋىنداعى مىندەتتەردىڭ جۇزەگە اسۋى وڭتۇستىك قازاقستان وبلىسىندا ناقتى كورىنىس تاۋىپ جاتىر.  اتاپ ايتساق،  وقو-دا  بىرنەشە ءىرى جوبالار ىسكە اسىپ كەلەدى دەپ حابارلايدى وڭتۇستىك قازاقستان وبلىسى اكىمى اپپاراتىنىڭ ءباسپاسوز قىزمەتى. ءباسپاسوز قىزمەتى تاراتقان مالىمەتتەرگە سۇيەنسەك، بيىل  بىلتىرعى جىلمەن سالىستىرعاندا ەكونوميكاداعى جالپى ءونىم كولەمى 1,2 پايىزعا ارتىپ، جىلدىڭ توعىز ايىندا 523,4 ملرد  تەڭگەنىڭ ونەركاسىپ ءونىمى شىعارىلىپتى.

اۋىلشارۋاشىلىعى سالاسىندا دا ەلەۋلى ءوسىم بايقالىپ، اگروكاسىپورىندار كەشەنىمەن 300 ملرد. تەڭگەنىڭ ءونىمى وندىرىلگەن. بۇل وتكەن جىلمەن سالىستىرعاندا 101,9 پايىزعا سايكەس كەلەدى.   وڭتۇستىك قازاقستان وبلىسىنىڭ ەكونوميكاسىن دامىتۋدىڭ نەگىزگى باسىمدىقتارىنىڭ ءبىرى – اۋىلشارۋاشىلىعى سالاسى بولىپ تابىلادى. وسى باعىتتا اگروونەركاسىپ كەشەنىندە جاڭا تەحنولوگيالار مەن يننوۆاتسيالاردى ەندىرۋگە ايرىقشا نازار اۋدارىلىپ وتىر. ء«وزىمىز وندىرەتىن اۋىلشارۋاشىلىعى ونىمدەرىنىڭ باسەكەگە قابىلەتتىلىگىن ارتتىرۋ ماقساتىندا باقشا، كوكونىس، جەمىس-جيدەك ساقتايتىن زاماناۋي قويمالار سالۋىمىز قاجەت. وسى ماقساتتا شىمكەنتتە ءىرى ساۋدا-لوگيستيكالىق ورتالىعىن سالۋ جوسپارلانۋدا»،- دەيدى اۋلىشارۋاشىلىعىنا جاۋاپتى وڭىردەگى ماماندار.  وقو-داعى  ساۋدا-لوگيستيكالىق ورتالىعىنىڭ جالپى كولەمى 90 گا. اسادى. كەشەندە حالىقارالىق ستاندارتتارعا سايكەس «ا» جانە «ب» سىنىپتى اۋىلشارۋاشىلىعى ونىمدەرىن ساقتايتىن زاماناۋي قويمالار سالىنباق. مۇنداي قويمالار الداعى ۋاقىتتا سارىاعاش جانە ماقتارال اۋداندارىندا، تۇركىستان قالاسىندا سالىنادى دەپ جوسپارلانۋدا.

اباي-اقپارات