الماتى وبلىسى اكىمىنىڭ ورىنباسارى جاقسىلىق ومار تالدىقورعاندىق «اسار» اۆتو-ەركىتىلەر قوزعالىسىنا ءۇن قوسىپتى، - دەپ حابارلايدى وڭىردەگى ءتىلشىمىز. اۆتو-ەركىتىلەر قوزعالىسى ەلدوس بايالىشباەۆتىڭ باستاماسىمەن اقپان ايىنىڭ باسىندا قۇرىلعان. جوبانىڭ ماقساتى مۇمكىندىگى شەكتەۋلى جانداردىڭ ءجۇرىپ-تۇرىسىن جەڭىلدەتىپ، قاجەتتى جەرىنە جەتكىزۋدى كوزدەيدى. بۇگىندە جيىرماعا جۋىق ەركىكتىلەردىڭ باسىن قوسقان باستاماعا جاقسىلىق ومار دا ءوز ۇلەسىن قوسىپ، العاشقى جولاۋشىسىن سۇراعان جەرىنە جەتكىزىپ بەردى.

– شىنىمدى ايتسام، مەنىڭ سۇرانىسىما وبلىس اكىمىنىڭ ورىنباسارى كەلەدى دەپ، ءۇش ۇيىقتاسام دا، تۇسىمە كىرمەيتىن. ديسپەتچەرگە قوڭىراۋ شالىپ، ءوتىنىمدى قالدىرعاننان كەيىن اراعا جارتى ساعات سالىپ، كولىك ەسىك الدىنا كەلگەندىگى جايلى حابار كەلدى. اياڭداپ شىققانىمدا وبلىس اكىمى تابالدىرىقتان توسىپ الدى، - دەيدى ءى توپتاعى مۇگەدەك ميراس ءمۇرسالى. – جول بويى قالادعى الەۋمەتتىك نىسانداردىڭ مۇمكىندىگى شەكتەۋلى جاندارعا قولجەتىمدىلىگى جايلى ءسوز ءوربىتىپ جول قىسقارتتىق، - دەگەن جولاۋشى جوبا اۆتورلارىنا ءوز العسىن جەتكىزدى.

ءوز كەزەگىندە وبلىس اكىمىنىڭ ورىنباسارى جاقسىلىق ومار وسى ارقىلى شاھار بەلسەندىلەرىنىڭ باستاماسىنا ۇنقوسۋشىلار قاتارىن كوبەيتۋدى كوزدەيتىندىگىن ايتتى.

«مۇمكىندىگى شەكتەۋلى ازاماتتارعا كۇندەلىكتى كولىك قىزمەتىن ۇسىنۋ ءۇشىن ۋاقىت تاپشى. دەگەنمەن، ايىنا ءبىر رەت ارنايى ۋاقىت ءبولۋدى كوزدەيمىن. يگى ىسكە قالامىزدىڭ وزگە دە ازاماتتارى ءۇن قوسىپ، مۇگەدەكتەرگە قول ۇشىن سوزادى دەپ سەنەمىن»، - دەگەن جاقسىلىق ومار جولاۋشىسىن قالاعان جەرىنە جەتكىزىپ سالدى.

«اسار» اۆتو-ەركىتىلەر قوزعالىسى بۇگىندە جيىرماعا جۋىق جۇرگىزۋشىلەردىڭ باسىن بىرىكتىردى. بۇگىنگى تاڭدا تاعى ونشاقتى ەرىكتىلەردىڭ سۇرانىسى قاراستىرىلۋدا. جوبا اۆتورلارىنىڭ سوزىنشە، مۇمكىندىگى شەكتەۋلى جاندارعا قىزمەت اتقاراتىن كولىككە بىلگىلى تالاپ قويىلادى. باستىسى، تەمىر تۇلپاردىڭ سىيىمدىلىعى، جۇرگىزۋشىنىڭ ءوتىلى ءجىتى نازارعا الىنادى.     

Abai.kz