ءبىر قۋانارلىق جايت، ەلىمىزدە اۋىل شارۋاشىلىعى سالاسى بىرتىندەپ جولعا قويىلىپ كەلەدى. ءبىر كەزدەرى جەرلەرىمىز كەرەكسىز بولىپ، ءوز وزىنەن توزا باستاسا، قازىر جەردى ءتيىمدى يگەرەتىن شارۋالار دا كوبەيۋدە. بۇل ءوز كەزەگىندە اۋىلشارۋاشىلىعى سالاسىنىڭ وركەندەۋىنە جول اشىپ وتىر. ەڭ باستىسى تاۋەلسىزدىك العان 25 جىل ىشىندە سالاداعى وزگەرىستىڭ جاقسى جاققا وزگەرۋى ەل مەرەيى بولىپ وتىر.

اسىرەسە سوڭعى كەزدەرى وڭتۇستىكتەگى شارۋالاردىڭ جەردىڭ جايىن ءدوپ باسىپ، مول ءونىم الا باستاعانى رەسپۋبليكا جۇرتشىلىعىن قۋانتىپ وتىر. ماسەلەن ەگىن شارۋاشىلىعى بويىنشا جۇرگىزىلگەن جۇيەلى ءارتاراپتاندىرۋدىڭ ارقاسىندا وڭتۇستىك قازاقستان وبلىسىندا 1991 جىلمەن سالىستىرعاندا مايلى داقىلداردىڭ ەگىس كولەمى 73 مىڭ گەكتاردان 80 مىڭ گەكتارعا، باۋ باقشا ونىمدەرى 49 مىڭنان 59 مىڭ گەكتارعا، ال كوكونىس 27 مىڭ گەكتاردان 40,4 مىڭ گەكتارعا، كارتوپ توعىز مىڭ گەكتاردان 15,3 مىڭ گەكتارعا ارتقان.

سونىمەن قاتار، ەگىس كولەمىمەن قاتار الىنعان ءونىم كولەمى دە ارتقان. ماسەلەن، 1991 جىلى وبلىس بويىنشا 163,4 مىڭ توننا كوكونىس جينالسا، بيىلعى جىلى 866 مىڭ تونناعا كوبەيىپ، ياعني بەس ەسەگە ارتىپ وتىر. تاعى ءبىر ايتا كەتەر جايت، بيىلعى جىلى ورتاشا ەسەپپەن - 470 مىڭ توننا استىق جينالىپ، تۇسىمدىلىگى ورتاشا 22 تسن/گا. قۇراعان. ال 1991 جىلى استىقتىڭ تۇسىمدىلىگى گەكتارىنا 17,8 تسەنتنەر بولعان. جاقىن كۇندەرى وڭتۇستىك شارۋالارى وزدەرىنىڭ ەڭبەكقورلىعىمەن قازاقستاننىڭ تاۋەلسىزدىك كەزەڭىندەگى ەڭ ۇلكەن رەكوردتىق كورسەتكىشكە قول جەتكىزىپ وتىر. شىن مانىندە بۇل ەل تاۋەلسىزدىگىنىڭ مەرەيلى مەرەكەسى تۇسىندا ۇلكەن قۋانىش بولىپ وتىر. 

Abai.kz