تاۋەلسىزدىكتىڭ 25 جىلدىعىنا ارنالعان قالامگەرلەر اراسىنداعى «التىن تۇعىر» ادەبي بايقاۋى مارەگە جەتتى.

«اۋىل» پارتياسى مەن «ادەبيەت پورتالى» بىرلەسىپ وتكىزگەن ادەبي-ونلاين كونكۋرستىڭ جەڭىمپازدارى بۇگىن، ياعني، 7-جەلتوقساندا، ەلوردادا ماراپاتتالدى. شارت بويىنشا اۋىل تاقىرىبىندا جازىلعان ۇزدىك شىعارمالاردى ارنايى بەكىتىلگەن قازىلار انىقتاعان. ماراپاتتاۋ ءراسىمى استاناداعى س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە ءوتتى.

بايقاۋ قورىتىندىسى بويىنشا «پوەزيا» اتالىمىندا باق سىناسقان ۇلاربەك دالەيۇلى 1-ورىنعا يە بولدى. ال داۋرەن بەرىكقاجى مەن ادال قاليۇلى ەكىنشى-ءۇشىنشى ورىنداردى ءوزارا بولىسكە سالدى.

ۇمىتكەرلەر سانى كوپ بولعاندىقتان ۇيىمداستىرۋشىلار تاعايىندالاتىن 9 جۇلدەلى ورىنعا قوسىمشا 8 ارنايى ادەبي سىيلىق قوسۋدى ۇيعارعان ەكەن.

پوەزيا اتالىمى بويىنشا تۇمانباي مولداعاليەۆ اتىنداعى سىيلىققا ءىلياس مۇقايۇلى يەلىك ەتتى. ال فاريزا وڭعارسىنوۆا اتىنداعى سىيلىق ايجان تاباراكقىزىنا، ەسەنقۇل جاقىپبەكوۆ اتىنداعى سىيلىق التىنقادىس كۇنتۋعانۇلىنا، «ادەبيەت پورتالىنىڭ» "اقىن ءامىرحان بالقىبەك" اتىنداعى سىيلىعى  نازەركە رامازانقىزىنا بۇيىردى.

پروزا اتالىمى بويىنشا «Abai.kz» پورتالىنىڭ كونتەنت-رەداكتورى ءومىرجان ابدىحالىقۇلى 1-ورىندى قانجىعاسىنا بايلادى. جازۋشى ماقسات رامازانۇلى 2-ورىنعا، ەسبولات ايدابوسىنۇلى 3-ورىنعا يە بولدى.

پروزا اتالىمى بويىنشا سايىن مۇراتبەكوۆ اتىنداعى سىيلىق اسان اليەۆكە، تاكەن الىمقۇلوۆ اتىنداعى سىيلىق قانات ابىلقايىرعا جانە ساكەن ءجۇنىسوۆ اتىنداعى ارنايى سىيلىق مۇرات الماسبەكۇلىنا تابىس ەتىلدى.

دراماتۋرگيا اتالىمى بويىنشا ماناربەك قىدىرباي – 1-ورىن، الماس مىرزاحمەت – 2-ورىن، اسكەرحان اقتاي – 3-ورىنعا يە بولدى. ال ارنايى جۇلدەگەرلەر ساپىندا:  مارجان ەرشۋ – وزبەكالى جانىبەكوۆ اتىنداعى سىيلىققا، ءمىنايحان سالتانات – اسقار توقپانوۆ اتىنداعى سىيلىققا، ايسۇلۋ جولتايقىزى – قالتاي مۇحامەدجانوۆ اتىنداعى سىيلىققا قول جەتكىزدى.

ايتا كەتەيىك، بارلىق اتالىمدار بويىنشا جۇلدەگەرلەرگە اقشالاي سىيلىق تابىس ەتىلدى.

كونكۋرستىڭ گران-ءپريى «التىن تۇعىر» جۇلدەسى اقىن ۇلاربەك دالەيۇلىنا تابىس ەتىلدى.

«اۋىل» پارتياسى مەن «ادەبيەت پورتالى» بىرلەسىپ وتكىزگەن ادەبي-ونلاين كونكۋرستىڭ جەڭىمپازدارىن شىن جۇرەكتەن قۇتتىقتاي وتىرىپ، پروزا نوميناتسياسى بويىنشا ەكى بىردەي جۇلدەگە قول جەتكىزگەن ءومىرجان مەن قاناتتىڭ جەڭىسىنە جەلپىنە قۋاناتىنىمىزدى جەتكىزگىمىز كەلەدى. كوسەمسوزدىڭ سەركەسى بولىپ تانىلعان قوس ورەننىڭ كوركەم شىعارما الامانىندا ءاردايىم اتى وزسىن دەگەن تىلەكتەمىز!

قۇرمەتپەن، اbai.kz ۇجىمى